कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १४९

रोनी भन्छन्– ‘रोनाल्डो नभएकै राम्रो’

रोयटर्स

लन्डन — म्यानचेस्टर युनाइटेडका पूर्वफरवार्ड वायन रोनीले क्रिस्टियानो रोनाल्डोलाई टिममा कायम नराख्नु नै ठीक हुने आइतबार बताएका छन् । म्यानचेस्टरले आफ्नो भविष्यलाई लिएर सोच्ने हो भने रोनाल्डोलाई टिममा नराख्नु नै बुद्धिमानी निर्णय हुने दाबी गरे । नयाँ मुख्य प्रशिक्षक एरिक टेन हागको नेतृत्वमा म्यानचेस्टर नयाँ टिम बनाउने योजनामा छ ।

रोनी भन्छन्– ‘रोनाल्डो नभएकै राम्रो’

रोनी मान्छन्, यही योजनाका लागि रोनाल्डो ठीक छैनन् । गत सिजन मात्रै ३७ वर्षीय रोनाल्डोले युभेन्ट्स छाडेर म्यानचेस्टरसँग अनुबन्ध गरेका थिए । तर अहिले भने रोनाल्डो म्यानचेस्टर छाड्न चाहन्छन् । म्यानचेस्टर युरोपेली च्याम्पियन्स लिगमा छनोट हुन असफल रहेपछि रोनाल्डोको मनसाय बाहिर आएको हो ।

इंग्लिस प्रिमियर लिगको नयाँ सिजनको आफ्नो पहिलो खेलमा म्यानचेस्टर ब्राइटनको हातबाट पराजित भएको छ र त्यसमा रोनाल्डो सब्स्टिच्युट खेलाडीका रूपमा दोस्रो हाफमा मैदानमा छिरेका थिए । आफ्नो पुराना सहकर्मी साथी खेलाडीबारे रोनीले द टाइम्समा लेखेका छन्, ‘रोनाल्डो म्यानचेस्टर छाड्न चाहन्छन् भने त्यसो गर्न दिएकै राम्रो ।’

अहिले मेजर लिग सकर क्लब डीसी युनाइटेडका प्रशिक्षक रहेका रोनीले थपेका छन्, ‘रोनाल्डोले टेन हागको रणनीति अनुसार म्यानचेस्टरका लागि खेल्न नसक्ने भन्ने होइन् । उनले विश्वका कुनै पनि टिमका लागि खेल्न सक्छन् । रोनाल्डोले पनि गोल पनि गर्नेछन् । तर मेरो विचारमा अहिले तत्काल म्यानचेस्टरले कुनै उपाधिका लागि चुनौती दिन सक्दैन् । त्यसैले म्यानचेस्टरले नयाँ टिम बनाउनमै ध्यान दिनुपर्छ ।’

रोनीको तर्क हो, म्यानचेस्टरको टिमले अबको केही वर्षमा उपाधि जित्नु छ भने युवा खेलाडीमा जोड दिनुपर्छ, रोनाल्डोमा होइन । गत सिजन रोनाल्डोले म्यानचेस्टरका लागि सबै खाले प्रतियोगितमा २४ गोल गरेका थिए । तर टिमको समग्र प्रदर्शन भने राम्रो रहेन र टिम निराशाजनक रूपमा छैटौं स्थानमा रहेको थियो ।

प्रकाशित : श्रावण २३, २०७९ ०७:००
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?