भगवतीको नेतृत्वमा स्पोर्ट्स युनियन
भक्तपुर — रेस्लर भगवती खड्का (युनिका) को नेतृत्वमा ७ सदस्यीय भक्तपुर जिल्ला स्पोर्ट्स युनियन नेपालको शनिबार गठन भएको छ ।
मदन भण्डारी स्पोर्ट्स एकेडेमीका पूर्वअध्यक्ष विनोद श्रेष्ठ, स्पोर्ट्स युनियन नेपालका अध्यक्ष प्रदेश सांसद सीता लामा, केन्द्रीय महासचिव सुदीप शर्मालगायतको उपस्थितिमा शनिबार सम्पन्न भेलाले भगवतीको अध्यक्षतामा जिल्ला कार्यसमिति चयन गरेको हो ।
युनियनको उपाध्यक्ष क्रिकेटका सुसन श्रेष्ठ, सचिवमा क्रिकेटका पवन पौडेल र कोषाध्यक्षमा क्रिकेटका सञ्जय बस्नेत छन् । सदस्यमा करातेका श्रीकिसुन साह, क्रिकेटका सुरजरत्न शाक्य र करातेका हीरा तामाङ छन् ।
विभिन्न ६ जिल्लामा युनियन गठन भइसकेको स्पोर्टस नेपाल युनियनकी अध्यक्ष लामाले जानकारी दिइन् । यसअघि मकवानपुर, उदयपुर, ललितपुर, काठमाडौं र रूपन्देहीमा कार्यसमिति गठन भइसकेको छ ।
जिफन्टका पूर्वअध्यक्ष रहेका विनोद श्रेष्ठले सफल कार्यकालका लागि शुभकामना दिँदै खेलाडीको हकहितको पक्षमा लड्न युनियनलाई सुझाए । अध्यक्ष लामाले मुख्यतः खेलाडीको श्रमसम्बन्धी विषयवस्तुमा केन्द्रित रहेर कार्य गर्न युनियन बनाइएको बताइन् ।
प्रकाशित : असार ३२, २०७९ २०:३०