खेलाडीको सम्मान, परिवारको निःशुल्क उपचार- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खेलाडीको सम्मान, परिवारको निःशुल्क उपचार

विनोद भण्डारी

विराटनगर — ओलम्पिक, एसियाली र दक्षिण एसियाली खेलकुदमा प्रदेश १ बाट अहिलेसम्म सहभागी खेलाडीको स–परिवारलाई ५ वर्षसम्म निःशुल्क स्वास्थ्य उपचार उपलब्ध गराइने भएको छ । यसको चाँजोपाँजो मिलाउँदै प्रदेश १ खेलकुद विकास बोर्डले पहिलोपल्ट आइतबार खेलकुद इतिहासको गरिमा बोकेका खेलाडीको सम्मान गर्ने तयारी गरेको छ । बोर्डले प्रदेशबाट हालसम्म ओलम्पिक खेलेका ९, एसियाली खेलकुद खेलेका ३६ र साग खेलेका १ सय ५० खेलाडीलाई सम्मान गरिने भएको छ ।

खेलाडीलाई सम्मान गरिँदै उनीहरूसहित श्रीमती, छोराछोरी, आमाबुबालाई पाँच वर्षसम्म निःशुल्क स्वास्थ्य उपचारको व्यवस्था गर्ने तयारी गरेको बोर्डका सदस्यसचिव हंशराज वाग्लेले शुक्रबार सञ्चारकर्मीलाई बताए ।

सम्मानित हुनेको सूचीमा नेपाली भलिबल टिमका पहिलो कप्तान विराटनगरका ऋषिराज आचार्य र पूर्व भलिबल खेलाडी दीपक सापकोटा छन् । आचार्य २०३३ मा पाकिस्तानमा भएको काइदे आजम स्पोर्ट्स फेस्टिभलमा नेपाली राष्ट्रिय भलिबल टिमले भाग लिँदा पहिलो कप्तान थिए । त्यो नेपाली भलिबल टिमको पहिलो अन्तर्राष्ट्रिय सहभागिता थियो । त्यतिबेला टिमले पाकिस्तानमा एक म्याच जित्दा तीन म्याच गुमाएको आचार्यको स्मरण छ ।

ओलम्पियनतर्फ बक्सिङमा धरानका नरेन्द्र पुमा (१९८० मस्को), एथलेटिक्समा मोरङका पुष्पराज ओझा (१९८४ लस एन्जलस), एथलेटिक्समा झापाकी मेनुका रावत (१९८८ सोल), सुटिङमा सुनसरीका टीकाराम श्रेष्ठ (२००४ एथेन्स), एथलेटिक्समा झापाका डम्बर कुवँर (१९८८ सोल) र एथलेटिक्समै इलामकी प्रमिला रिजाल (२०१२ लन्डन) सहित ९ खेलाडी छन् ।

एसियाली खेलकुदतर्फ १९९४ की हिरोसिमामा करातेबाट कांस्य पदक जितेकी इलामकी सीता राईसहितका ३७ जना र साग खेलकुदमा सहभागी १ सय ५० जनालाई सम्मान गर्ने कार्यक्रम रहेको पूर्व राष्ट्रिय भलिबल कप्तानसमेत रहेका वाग्लेले बताए । सम्मान घोषणा गर्नेमध्ये अधिकांश पनि विदेशमा छन् । शनिबारसम्म उपलब्ध हुने पुराना खेलाडीलाई कदरपत्र प्रदान गरिने उनले बताए ।

यो सम्मान प्रदेशका लागि गौरवको बन्ने वाग्लेको दाबी छ । ‘यहाँ कसैले पनि पुराना खेलाडीलाई सम्झने र सम्मान गरेका छैनन्,’ वाग्लेले भने । उनका अनुसार प्रदेश १ खेलकुद बोर्डले पहिलो पटक यस्तो कार्यक्रम गरेको हो । ‘खेलाडीलाई नगदबाट सम्मान गर्न बोर्डको आर्थिक हैसियत अहिले छैन, उनीहरूलाई सम्झँदै दोसल्ला ओढाएर सम्मानको थालनी मात्र गरेका हौं,’ उनले भने, ‘सबै कुरा पैसामात्र होइन, उनीहरूलाई सम्झनु र एकै ठाउँमा भेला गराउनु पनि ठूलो उपलब्धि हो ।’ वाग्लेका अनुसार बाजागाजासहित एयरपोर्ट मोडदेखि मुख्यमन्त्री, सामाजिक विकासमन्त्री, प्रमुख जिल्ला अधिकारी, निजामती कर्मचारी, खेलकर्मी र सर्वसाधारणले पूर्वखेलाडीलाई स्वागत गर्दै करिब ५ सय मिटर र्‍याली गरेर सम्मान गरिने छ ।

प्रकाशित : असार १८, २०७९ ०७:०६
प्रतिक्रिया
पठाउनुहोस्

वाटसनमा बेलायती आस

एपी

विम्बल्डन — विम्बल्डन टेनिसमा निकै उतारचढावपूर्ण व्यक्तिगत प्रदर्शनको इतिहास बोकेकी बेलायती खेलाडी हिथर वाटसन शुक्रबार पहिलोपल्ट चौथो चरण पुगेकी छन् ।

विम्बल्डनको तेस्रो चरणमा स्लोभेनियाकी प्रतिद्वन्द्वीविरुद्ध बल फर्काउने क्रममा कोर्टै लडेकी बेलायती हिथर वाटसन । तस्बिर : एपी

अल इंग्ल्यान्ड क्लबमा १२ पल्ट खेलिरहेकी १ सय २१ औं वरीयताकी वाटसनले स्लोभानियाकी काजा जुभानलाई ७–६ (८–२), ६–२ ले पराजित गरिन् । सन् २०१० मा विम्बल्डनमा डेब्यु गरेकी वाट्सन छपल्ट प्रतियोगिताको पहिलो चरणमै पराजित रहेकी छन् । अब उनले अर्को चरणमा जर्मनीकी जुली निमरको सामना गर्नेछिन् । जुलीले लेसा सुरेन्कोलाई ६–४, ३–६, ६–३ ले पराजित गरिन् । तेस्रो वरीयताकी ओन्स जबेर पनि चौथो चरण पुगेकी छन् । उनले फ्रान्सकी डानी पेरीलाई ६–२, ६–३ ले पराजित गरिन् ।

कोर्ट नम्बर एकमा खेल जितेपछि ३० वर्षीया वाटसनले भनिन्, ‘घरेलु कोर्टमा तपाईहरू सबैसामु खेल्न पाउनु नै मेरा लागि ठूलो वातावरण हो । त्यसैले पनि म त्यति नर्भस थिइनँ ।’

बेलायती खेलाडीलाई घरमा ग्रान्ड स्लाम जित्नु ठूलो दबाब नै हुन्छ । त्यो वाट्सन र अन्य बेलायती खेलाडीलाई राम्रोसँग थाहा छ ।

विम्बल्डन जित्ने एन्डी मरे पछिल्लो बेलायती खेलाडी हुन् । उनले जितेको पनि दशक बित्न लागिसक्यो । सन् २०१३ मा उनले विम्बल्डन जितेका थिए । त्यसअघि फ्रेड पेरी र भर्जिनिया वाडे अल इंग्ल्यान्ड क्लबमा उपाधि जित्ने बेलायती खेलाडी थिए । पेरीले १९३६ र वाडेले १९७७ मा यस ग्रासकोर्ट ग्रान्ड स्लाम जितेका थिए ।

पुरुषतर्फ नोभाक जोकोभिचले पनि प्रतियोगिताको चौथो चरणको यात्रा तय गरेका छन् । उनले एकपक्षीय खेलमा मिमिर केसमानोभिचलाई ६–०, ६–३, ६–४ ले पराजित गरे । सर्बियाका विश्व नम्बर एक जोकोभिचले सुरुआती दुई सेट सजिलै जितेपछि तेस्रो सेटमा आफ्नै देशका खेलाडीबाट केही चुनौतीको सामना गर्नुपरेको थियो ।

प्रकाशित : असार १८, २०७९ ०७:०५
पूरा पढ्नुहोस्
प्रतिक्रिया
पठाउनुहोस्
×