वाटसनमा बेलायती आस- खेलकुद - कान्तिपुर समाचार
कान्तिपुर वेबसाईट
AdvertisementAdvertisement
विम्बल्डन टेनिस

वाटसनमा बेलायती आस

एपी

विम्बल्डन — विम्बल्डन टेनिसमा निकै उतारचढावपूर्ण व्यक्तिगत प्रदर्शनको इतिहास बोकेकी बेलायती खेलाडी हिथर वाटसन शुक्रबार पहिलोपल्ट चौथो चरण पुगेकी छन् ।

विम्बल्डनको तेस्रो चरणमा स्लोभेनियाकी प्रतिद्वन्द्वीविरुद्ध बल फर्काउने क्रममा कोर्टै लडेकी बेलायती हिथर वाटसन । तस्बिर : एपी

अल इंग्ल्यान्ड क्लबमा १२ पल्ट खेलिरहेकी १ सय २१ औं वरीयताकी वाटसनले स्लोभानियाकी काजा जुभानलाई ७–६ (८–२), ६–२ ले पराजित गरिन् । सन् २०१० मा विम्बल्डनमा डेब्यु गरेकी वाट्सन छपल्ट प्रतियोगिताको पहिलो चरणमै पराजित रहेकी छन् । अब उनले अर्को चरणमा जर्मनीकी जुली निमरको सामना गर्नेछिन् । जुलीले लेसा सुरेन्कोलाई ६–४, ३–६, ६–३ ले पराजित गरिन् । तेस्रो वरीयताकी ओन्स जबेर पनि चौथो चरण पुगेकी छन् । उनले फ्रान्सकी डानी पेरीलाई ६–२, ६–३ ले पराजित गरिन् ।

कोर्ट नम्बर एकमा खेल जितेपछि ३० वर्षीया वाटसनले भनिन्, ‘घरेलु कोर्टमा तपाईहरू सबैसामु खेल्न पाउनु नै मेरा लागि ठूलो वातावरण हो । त्यसैले पनि म त्यति नर्भस थिइनँ ।’

बेलायती खेलाडीलाई घरमा ग्रान्ड स्लाम जित्नु ठूलो दबाब नै हुन्छ । त्यो वाट्सन र अन्य बेलायती खेलाडीलाई राम्रोसँग थाहा छ ।

विम्बल्डन जित्ने एन्डी मरे पछिल्लो बेलायती खेलाडी हुन् । उनले जितेको पनि दशक बित्न लागिसक्यो । सन् २०१३ मा उनले विम्बल्डन जितेका थिए । त्यसअघि फ्रेड पेरी र भर्जिनिया वाडे अल इंग्ल्यान्ड क्लबमा उपाधि जित्ने बेलायती खेलाडी थिए । पेरीले १९३६ र वाडेले १९७७ मा यस ग्रासकोर्ट ग्रान्ड स्लाम जितेका थिए ।

पुरुषतर्फ नोभाक जोकोभिचले पनि प्रतियोगिताको चौथो चरणको यात्रा तय गरेका छन् । उनले एकपक्षीय खेलमा मिमिर केसमानोभिचलाई ६–०, ६–३, ६–४ ले पराजित गरे । सर्बियाका विश्व नम्बर एक जोकोभिचले सुरुआती दुई सेट सजिलै जितेपछि तेस्रो सेटमा आफ्नै देशका खेलाडीबाट केही चुनौतीको सामना गर्नुपरेको थियो ।

प्रकाशित : असार १८, २०७९ ०७:०५
प्रतिक्रिया
पठाउनुहोस्

पहिरोले घर पुरिँदा पाँचथरमा ३ जना बेपत्ता

लक्ष्मी गौतम

पाँचथर — अविरल वर्षापछि माथिबाट खसेको पहिरोले घर पुरिँदा पाँचथरको फालेलुङ गाउँपाकिा–७ मा ३ जना बेपत्ता भएका छन् ।

शुक्रबार राति १० बजेतिर बिहिदिन बजारनजिकै रहेको दलबहादुर मगरको घर पहिरोले पुर्दा तीन जना बेपत्ता भएको पाँचथरका प्रमुख जिल्ला अधिकारी सुरेश न्यौपानेले जानकारी दिए ।

उनका अनुसार पहिरोमा दलबहादुरका ४२ वर्षीय छोरा दलप्रसाद, ३८ वर्षीया बुहारी गोमा र १९ वर्षीया भतिजी एलिसा मगर बेपत्ता भएका छन् । दलबहादुरलाई भने स्थानीयले तत्कालै उद्धार गरेका थिए ।

स्थानीय बासिन्दा, नेपाल प्रहरी, सशस्त्र प्रहरी र नेपाली सेनाले बेपत्ताहरूको खोजी गरिरहेको पनि न्यौपानेले जानकारी दिए ।

प्रकाशित : असार १८, २०७९ ०६:४८
पूरा पढ्नुहोस्
प्रतिक्रिया
पठाउनुहोस्
×