राधेमाईले जित्यो नेक्सस कप- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

राधेमाईले जित्यो नेक्सस कप

कान्तिपुर संवाददाता

काठमाडौँ — वीरगन्जको अपन राधेमाई युथ क्लबले यू–१६ पाँचौं नेक्सस कप टी–२० क्रिकेटको उपाधि जितेको छ । वाग्मती प्रदेश खेलकुद विकास परिषद्को सहकार्यमा भएको प्रतियोगिताको फाइनलमा राधेमाईले आयोजक नेक्सस क्रिकेट एकेडेमीलाई ३९ रनले हरायो ।

मूलपानी क्रिकेट मैदानमा राधेमाईले २० ओभरमा अलआउट हुनुअघि ८२ रन जोड्यो । सगिर मियाले २१ र सफवान अलीले १९ रन जोडे । नेक्ससका हिमाल न्यौपाने र चन्दु यादवले २–२ विकेट लिए । जवाफमा नेक्ससले ११.४ ओभरमा ४३ रन जोड्दै सबै विकेट गुमायो । सन्दीप विष्टले ३० रन जोडे । म्यान अफ द म्याच राधेमाईका अनिश साह कानुले ५ रन खर्चेर ५ विकेट लिए ।

राधेमाईले १ लाख र नेक्ससले ७५ हजार रुपैयाँ पुरस्कार पाए । मोफसलको टोलीले उपाधि जितेको तेस्रो पटक हो । पहिलो संस्करण महेन्द्रनगरको सनराइज र दोस्रो वीरगन्जको युनाइटेड क्लबले जितेका थिए । तेस्रोमा आयोजक नेक्सस च्याम्पियन बन्दा चौथोमा ग्रेट हिमालय क्रिकेट एकेडेमी (जीएचसीए) ललितपुर विजेता भएको थियो ।

राधेमाईका अनिश म्यान अफ द सिरिजका साथै उत्कृष्ट बलर भए । उनले एक ह्याट्रिकसहित १४ विकेट लिएका थिए । प्रतियोगिताभर ११५ रन जोडेका नेक्ससका उत्तम थापा मगर उत्कृष्ट ब्याटर चुनिए । उदीयमान खेलाडीको उपाधि काठमाडौं क्रिकेट ट्रेनिङ सेन्टर (केसीटीसी) का कमल शाहीले जिते ।

विजेतालाई काठमाडौं जिल्ला क्रिकेट संघका उपाध्यक्ष विजय शर्मा, नेक्ससका अध्यक्ष भरतकुमार शाहीलगायतले पुरस्कृत गरे ।

प्रकाशित : असार १४, २०७९ २१:४४
प्रतिक्रिया
पठाउनुहोस्

पद धारण गर्न शैक्षिक योग्यताको प्रमाणपत्र किर्ते 

कान्तिपुर संवाददाता

काठमाडौँ — नेपाल प्रहरीको केन्द्रीय अनुसन्धान ब्युरोले शैक्षिक योग्यताको प्रमाणपत्र किर्ते गरेको अभियोगमा एक जनालाई पक्राउ गरेको छ । प्रक्राउ पर्नेमा ललितपुर महानगरपालिका–१३ कुसुन्ती ५३ वर्षीय माधवप्रसाद तिमल्सिना छन् । 

नेपाल सरकार भूमि व्यवस्था सहकारी तथा गरिबी निवारण मन्त्रालयअन्तर्गत राष्ट्रिय सहकारी विकास बोर्डको सञ्चालक पदमा नियुक्तिका लागि शैक्षिक योग्यताको प्रमाणपत्र किर्ते गरेको प्रारम्भिक अनुसन्धानमा खुलेको ब्युरोका प्रवक्ता एसपी श्यामकुमार महतोले बताए ।

पाटन बहुमुखी क्याम्पसबाट स्नातक तह उत्तीर्ण गरेको माधवप्रसाद तिमल्सिनाको नाममा जारी भएको चारित्रिक प्रमाणपत्र र उनकै नाममा पाटन मल्टिपल क्याम्पसको स्नातकको ‘हुम्यानिटिज र सोसल साइन्सको ट्रान्सक्रिप्ट’ किर्ते गरी २०७८ चैत ६ गते निवेदन साथ राष्ट्रिय सहकारी विकास वोर्डमा पेश गरेको पाइएपछि उनलाई मंगलबार ललितपुर थसीखेलबाट पक्राउ गरेको एसपी महतोले बताए । उनलाई लिखतसम्बन्धी कसुरमा जिल्ला अदालत काठमाडौंबाट ५ दिन म्याद लिई थप अनुसन्धान भइरहेको प्रहरीले जनाएको छ ।

प्रकाशित : असार १४, २०७९ २१:२८
पूरा पढ्नुहोस्
प्रतिक्रिया
पठाउनुहोस्
×