खुला महिला भलिबल आजदेखि- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खुला महिला भलिबल आजदेखि

कान्तिपुर संवाददाता

काठमाडौँ — वाग्मती प्रदेश खेलकुद विकास परिषद् तथा न्यु डायमन्ड स्पोर्ट्स क्लबको संयुक्त आयोजनामा वाग्मती प्रदेश न्यु डायमन्ड कप खुला महिला भलिबल प्रतियोगिता मंगलबारदेखि हुँदै छ ।

न्यु डायमन्डसहित एपीएफ क्लब, पुलिस क्लब र काठमाडौंको परोपकार आदर्श मावि गरी ४ टिमको सहभागिता रहने प्रतियोगिता संयोजक कुमार राईले सोमबार पत्रकार सम्मेलनमा बताए ।

सहभागी टिमबीच पहिले राउन्ड रोबिन लिगका आधारमा खेल हुनेछ । राउन्ड रोविनमा शीर्ष दुई स्थान हात पार्नेले उपाधिका लागि प्रतिस्पर्धा गर्नेछन् । तेस्रो र चौथोले तेस्रो स्थानका लागि खेल्नेछन् । शीर्ष चार स्थान हात पर्ने टिमले क्रमशः ५ लाख, २ लाख ५० हजार, १ लाख २५ हजार र ७५ हजार पुरस्कार प्राप्त गर्नेछन् । सर्वोत्कृष्ट खेलाडीले २५ हजार पुरस्कार पाउँदा विधागत ५ उत्कृष्ट खेलाडी र प्रशिक्षकले जनही १० हजार पाउनेछन् ।

प्रतियोगिताको मुख्य उद्देश्य न्यु डायमन्डको भलिबल कोर्ट निर्माण गर्न सहयोग जुटाउनु हो । नगद पुरस्कार प्राप्त गर्ने टिमले २० प्रतिशत न्यु डायमन्डलाई उपलब्ध गराउनुपर्ने प्रावधान छ ।



प्रकाशित : असार १४, २०७९ ०६:४५
प्रतिक्रिया
पठाउनुहोस्

क्यामरुनी टिमलाई शुभकामना गोल्डकप

कान्तिपुर संवाददाता

पोखरा — नेपाल आइस छैटौं शुभकामना गोल्डकप फुटबलको उपाधि क्यामरुनको एभिनियर क्लबले जितेको छ । गौरीशंकर खेलमैदानमा आइतबार सम्पन्न फाइनलमा एभिनियरले आयोजक हेमजा युनाइटेडलाई ३–१ ले हराएर ६ लाखसहित उपाधि उचालेको हो । हेम्जाले ३ लाख रुपैयाँ पायो ।

एभिनियरले खेलको छैटौं मिनेटमा नै अग्रता लियो । विल्लेले प्रहार गरेको कर्नरमा आनिसेले हेडर मार्फत गोल गरे । निकै दबाबमा परेको हेम्जाले खेलको ३५ औं मिनेटमा गोल गर्दै खेलमा फर्किएको थियो । एभिनियरका डिफेन्डर र गोलरक्षक कोभासिस झुक्किरहँदा सुशील राईले गोल गरे । खेलको पहिलो हाफ बराबरीमै रोकिएको थियो ।

प्रतिस्पर्धात्मक दोस्रो हाफमा हेम्जाको गोलपोस्ट निकै व्यस्त रह्यो । रक्षात्मक खेल खेलेको हेम्जाले दोस्रो हाफमा गोल गर्न नदिँदा निर्धारित समयको खेल १–१ को बराबरीमा सकिएको थियो । अतिरिक्त ३० मिनेटमा एभिनियरले २ गोल गर्दै ३–१ को स्थिति बनाएपछि उपाधि चुमेको हो । खेलको ९८ औं मिनेटमा साङले गोल गरे । यस्तै १ सय ६ औं मिनेटमा विल्लेले गोल गर्दै जित सुनिश्चित गराए ।

दीप कार्की सर्वोत्कृष्ट

हेम्जा युनाइटेडका गोलरक्षक दीप कार्की सर्वोत्कृष्ट खेलाडी भएका छन् । उनले ५० हजार रुपैयाँ ट्रफी प्राप्त गरे । आयोजक हेम्जा युनाइटेडलाई फाइनल पुर्‍याउन उनको महत्त्वपूर्ण योगदान रहेको थियो ।

हेम्जा युनाइटेडकै आशिक गुरुङ उत्कृष्ट डिफेन्डर भए भने सुशील राई उत्कृष्ट फरवार्ड घोषित भए । एभिनियरका गोलरक्षक कोभास्सी उत्कृष्ट गोलरक्षक, नेल्सन उत्कृष्ट मिडफिल्डर र आशिक थापा मगर उत्कृष्ट प्रशिक्षक घोषित भए । उदीयमान खेलाडी हेम्जाका मनीष थापा घोषित भए । सबैले २०–२० हजार रुपैयाँ प्राप्त गरे । अनुशासित टिम कालिका फुटबल क्लबले २५ हजार प्राप्त गर्‍यो । सर्वाधिक गोलकर्ता भने एभिनियरका विल्ले र हेम्जाका कमल थापा मगर रहे । दुवैले ३–३ गोल गरे । उनीहरूले २५ हजार रुपैयाँ पाए । विजेतालाई गण्डकी प्रदेश युवा तथा खेलकुदमन्त्री राजीव गुरुङले पुरस्कृत गरे ।

प्रकाशित : असार १४, २०७९ ०६:४४
पूरा पढ्नुहोस्
प्रतिक्रिया
पठाउनुहोस्
×