अस्मिनाको ५ विकेट, भारी वर्षा बाधक
काठमाडौँ — नेपालको महिला ट्वान्टी–२० एसिया कपमा छनोट हुने सम्भावना शुक्रबार पीडादायी स्थितिमा समाप्त भएको छ । किनरारा ओभलमा यूएईविरुद्धको सेमिफाइनल खेल वर्षाले रद्द भएपछि नेपाल अभाग्यशाली साबित भयो ।
खेल रोकिएपछि समूह चरणको प्रदर्शनका आधारमा यूएई अगाडि बढ्यो । समूह ‘बी’ बाट विजेता भएर सेमिफाइनल पुगेका कारण यूएई फाइनल पुग्यो । नेपाल भने आफ्नो समूह ‘ए’ को उपविजेता भएर सेमिफाइनल पुगेको थियो ।
अब फाइनलमा यूएईको सामना मलेसियाविरुद्ध हुनेछ । अर्को सेमिफाइनलमा मलेसियाले हङकङलाई १२ रनले पराजित गरेको थियो । जितका लागि ८७ रनको लक्ष्य पाएको हङकङले ८ विकेट गुमाएर ८७ रनमात्र बनाउन सकेको थियो ।
यसअगाडि पहिलो सेमिफाइनलमा नेपालले टस जितेर फिल्डिङ गरेको थियो । वर्षाका कारण ढिला सुरु खेलमा यूएईले १९.५ ओभरमा सबै विकेट गुमाई ८१ रन बनाएको थियो । वैष्णवी महेशले १६, एसा रोहितले १५ र छाया मगुलले १४ रन बनाए । नेपालबाट अस्मिना कर्माचार्यले उत्कृष्ट बलिङ गरेकी थिइन् । यूएईलाई सस्तैमा समेट्ने क्रममा उनले ३.५ ओभरमा १० रनमात्र खर्चेर ५ विकेट लिएकी थिइन् । इन्दु बर्माले ३ र सीता राना मगरले २ विकेट लिए ।
वर्षाका कारण खेल आधा घण्टा ढिला सुरु भएको थियो । नेपालको इनिङ्स भने भारी वर्षाका कारण सम्भव नै भएन । नेपालका लागि समूह चरणको खेलमा हङकङविरुद्धको खेल गुमाउनु नै अन्ततः निर्णायक साबित भयो । नेपालले भुटान, कुवेत र बहराइनलाई भने पराजित गरेको थियो ।
प्रकाशित : असार ११, २०७९ ०७:०६