खेलाडीलाई स-सम्मान फर्काउँछौं : नवनिर्वाचित अध्यक्ष नेम्वाङ
काठमाडौँ — अखिल नेपाल फुटबल संघ (एन्फा) को अध्यक्षमा निर्वाचित भएलगत्तै पंकजविक्रम नेम्वाङले पहिलो बैठकबाटै विवादास्पद प्रशिक्षक अब्दुल्लाह अल्मुताइरीबारे निर्णय गर्ने बताएका थिए । त्यसैअनुसार बुधबारको बैठकले राष्ट्रिय टिमका प्रशिक्षक र खेलाडीबीच भएको विवादलाई लिएर प्रतिवेदनको सुझावअनुसार अगाडि बढ्ने निर्णय गरेको छ ।
‘हामीले खेलाडीहरूलाई स–सम्मान आउने राष्ट्रिय टिमको बन्द प्रशिक्षणमा बोलाउने निर्णय गरेका छौं,’ अध्यक्ष नेम्वाङले भने, ‘प्रशिक्षकको विषयमा प्रतिवेदनले जे सिफारिस गर्यो त्यसको कार्यान्वयनका निम्ति सचिवालयलाई जिम्मा दिएका छौं । प्रशिक्षकबारे प्रतिवेदनको सुझावअनुसार प्रशिक्षक र कतार एफएसँग सम्पर्क गरेर अगाडि बढ्छ ।’ छानबिन समितिको प्रतिवेदनले एसियन कप २०२३ छनोटपछि अल्मुताइरीको विकल्प खोज्न सुझाव दिएको थियो ।
कतार फुटबल संघको अनुदानमा आएका अल्मुताइरीले एसियन कप छनोटको तयारीमा खेलाडीलाई होटल कि होस्टेल बस्ने भनेर सोधेपछि होटल बस्ने भनेर हात उठाएका रोहित चन्दलाई तत्कालै टिमबाट हटाएका थिए । रोहितले सबै खेलाडीको आवाज बोलेकाले उनलाई अन्याय भएको कुरा उठाएका ९ खेलाडीले पनि अल्मुताइरीले ‘बारम्बार घर जा’ भनेपछि होटलमा राखेर सञ्चालन गरिएको बन्द प्रशिक्षण छाडेका थिए । लगत्तै अल्मुताइरीले उनीहरूलाई टिममा नबोलाउने पत्र एन्फालाई पठाउँदै नयाँ र युवा खेलाडीहरूलाई टिममा बोलाएका थिए । उनले खेलाडीहरू अन्यायमा परेको बताएका नियमित कप्तान किरण चेम्जोङलाई पनि टिममा बोलाएनन् । उनी युवा टिम लिएरै छनोट खेल्न कुवेत सिटी पुगेका थिए ।
छनोटमा अल्मुताइरीको युवा टिमले जोर्डनविरुद्ध २–०, कुवेतविरुद्ध ४–१ र इन्डोनेसियाविरुद्ध ७–० को हार बेहोरेको थियो । एन्फा अध्यक्षमा नेम्वाङ निर्वाचित भएलगत्तै अल्मुताइरीले सामाजिक सन्जालमा लेख्दै नेपाली टिम छाड्ने संकेत दिएका थिए । तर, त्यो लेखेको केही बेरमै उनले हटाएका थिए । उनले गत वर्षपछि नेम्वाङकै कारण नेपाली टिम छाड्ने घोषणा गरेका थिए । राजीनामा भने दिएनन् । उनी खेलाडीप्रति गरिएको कठोर व्यवहार र समर्थकलाई आकर्षित गर्ने फेसबुक स्टाटसहरूका कारण चर्चामा रहँदै आएका छन् । उनको नेतृत्वमा नेपाल टिम गत वर्ष माल्दिभ्समा भएको साफ च्याम्पियनसिपको फाइनलमा पुगेको थियो, जुन साफको इतिहासमै नेपालको सबैभन्दा ठूलो उपलब्धि हो ।
महासचिवमा किरण
एन्फाको नवनिर्वाचित कार्यसमितिको पहिलो बैठकले महासचिवमा किरण राई, कोषाध्यक्षमा रवीन्द्र जोशी र अन्तर्राष्ट्रिय सम्बन्ध प्रमुखमा नवीन पाँडेलाई नियुक्त गर्यो ।
नेम्वाङ निवर्तमान अध्यक्ष कर्माछिरिङ शेर्पालाई ४५–३९ मतले पराजित गरेर एन्फा अध्यक्षमा निर्वाचित भएसँगै उनीहरू महत्त्वपूर्ण जिम्मेवारीमा फर्किएका हुन् । शेर्पाको चारवर्षे कार्यकालमा उदयपुरका राई एन्फाको केन्द्रीय सदस्य तथा प्रवक्ता रहेका थिए । उनी गत वर्ष प्रवक्ताबाट राजीनामा गरेर नेम्वाङ समूहमा खुलेर लागेका थिए । पुल्चोक क्लबका अध्यक्ष जोशी यसअघि पनि कोषाध्यक्ष थिए । कोषाध्यक्षको अघिल्लो कार्यकालमै प्रश्न उठेको भन्दै उपाध्यक्ष दीर्घबहादुर केसी (कुमार) ले फरक मत राखेका थिए ।
चार वर्षअघि शेर्पा अध्यक्ष चुनिएपछि अन्तर्राष्ट्रिय सम्बन्ध प्रमुख र अध्यक्षको प्रमुख सल्लाहकार नियुक्त भएका पाँडेले भने त्यसको आठ महिनापछि नै पदबाट राजीनामा दिएका थिए । चार वर्षअघि शेर्पा र यसपालि नेम्वाङलाई नेपाली फुटबलको नेतृत्वमा पुर्याउन उनले महत्त्वपूर्ण भूमिका निर्वाह गरेका थिए । त्यस्तै, बैठकले न्युरोड टिम (एनआरटी) का अध्यक्ष सुन्दर नरसिंह जोशीलाई जुलाई २ मा ढाकामा हुने दक्षिण एसियाली फुटबल महासंघ (साफ) को निर्वाचनमा उपाध्यक्षमा प्रस्ताव गर्ने निर्णय पनि गर्यो ।
प्रकाशित : असार ९, २०७९ ०६:२०