अमेरिकासँग नेपाल ३९ रनले पराजित- खेलकुद - कान्तिपुर समाचार
विश्वकप लिग-२ क्रिकेट

अमेरिकासँग नेपाल ३९ रनले पराजित

विनोद पाण्डे, तस्बिर : हेमन्त श्रेष्ठ

ह्युस्टन, अमेरिका — आरिफ शेख र सोमपाल कामीले शतकीय साझेदारी गरे पनि नेपाल बुधबार विश्वकप लिग-२ क्रिकेटमा अमेरिकासँग पराजित भएको छ । अमेरिकाले मुसा क्रिकेट मैदानमा नेपाललाई ३९ रनले पराजित गर्‍यो ।

आरिफ र सोमपालले छैटौं विकेटमा १ सय ६ रनको साझेदारी गरे पनि अन्तिम ५ विकेट ८ रनमा गुमाउदा नेपालले पराजय भोग्नु परेको हो । २ सय ४६ रनको लक्ष्य लिएर आएको नेपाल ४७.४ ओभरमा २ सय ६ रनमा अलआउट भयो ।


अली खान र सौरभ नेत्राभाल्करले ३–३ विकेट लिदैं नेपाललाई रोकेका थिए । नेत्राभाल्करले अन्तिम ५ मध्येको ३ विकेट लिए । आरिफ र सोमपालको साझेदारी नेत्राभाल्करले नै तोडेका थिए । ४५ औं ओभरमा आरिफ ६३ रन बनाई आउट भए भने त्यसपछि नेत्राभाल्करले करण केसी (१) र कप्तान सन्दीप लामिछाने (०) लाई लगातार बलमा बोल्ड गरे ।


आरिफलाई आउट गरेपछि नेत्रभाल्करले सोमपाललाई रनआउट गरे । नेपालबाट आउट हुने अन्तिम ब्याटर आदिल आलम थिए । उनले अलीको बलमा मिडविकेट बाउन्ड्री लाइनमा क्याच दिन पुगे । नेत्राभाल्करले ९ ओभरमा ४४ र अलीले ८.४ ओभरमा १ मेडन राख्दै ३२ रन खर्चे ।


नेपालको सुरुआत राम्रो हुन सकेन् । कुशल भुर्तेल १० र आसिफ शेख १८ रनमा आउट भए । क्रिजमा आए लगत्तै छक्का प्रहार गरेका उपकप्तान रोहित पौडेल १९ रनमा आउट भए । देव खनाल रनआउट हुनु नेपालको दुर्भाग्य बन्यो । उनले ४७ बलमा २ चौका र १ छक्कासहित ३४ रन बनाए । अमेरिका भ्रमणमा ठुलो स्कोर बनाउन नसकेका दीपेन्द्रसिंह ऐरी ७ रनमा आउट भएपछि आरिफ र सोमपालले नेपाली इनिङ्स तानेका थिए ।


आरिफले यस भ्रमणमा दोस्रो अर्धशतक बनाउने क्रममा ६३ रन बनाए । उनले ७६ बल खेली ३ चौका प्रहार गरे । सोमपालले ७२ बल खेल्दै १ चौकासहित ४७ रन जोडे ।

यसअघि नेपालले टस जितेपछि ब्याटिङका लागि बोलाइएको अमेरिकाले सुशान्त मोदानी र गजानन्द सिंहको अर्धशतकमा निर्धारित ५० ओभरमा ७ विकेट गुमाई २ सय ४७ रन बनाएको थियो । करणले यसअघिका खेलमा जस्तै नेपाललाई राम्रो सुरुआत दिलाएका थिए । पहिलो ओभरको पाँचौं बलमै उनले स्टेभन टेलरलाई १ रनमा बैकल्पिक फिल्डर सुनिल धमलाबाट प्वाइन्टमा क्याच आउट गराए ।


करणले आफ्नो अर्को ओभरमा कप्तान मोनांक पटेललाई ४ रनमा आउट गरी नेपाललाई सानदार सुरुआत दिलाए । आदिल आलमले पटेलको कभरमा सानदार क्याच लिए ।

तर मोदानीले आरोन जोन्ससँग तेस्रो विकेटमा ८८ रनको साझेदारी गरी अमेरिकाको इनिङ्स समहाले । मोदानीले ८३ बल खेली ७ चौकासहित ५४ रन बनाए । सन्दीपको बलमा केही अत्तालिदैं देवले लङ अनमा उनको क्याच लिए । जोन्सले ४३ रन बनाउनेक्रममा ६० बल खेली ३ चौका प्रहार गरे ।


साइतेजा मुकामल्ला र गजानन्दले पाँचौं विकेटमा ८५ रनको साझेदारी गरे । मुकामल्लाले ५२ बल खेली ३ चौकासहित ३६ र गजानन्दले ६० बल खेली ५ चौका र १ छक्का प्रहार गरी ५८ रन बनाए । मुकामल्लालाई सोमपाल कामी र गजानन्दलाई सन्दीपले आउट गरे । नोस्थुस केन्जुगेले ९ रनमा आउट गरी करणले तेस्रो विकेट लिए । करणले ९ ओभरमा ६७ रन खर्चेर ३ विकेट लिए । सन्दीपले १० ओभरमा ४३ रन खर्चेर २ तथा सोमपाल र दीपेन्द्रले १–१ विकेट लिए ।


नेपालले ओमानलाई अघिल्लो दिन ७ विकेटले पराजित गरेको थियो । लिग २ मा नेपालको यो चौथो शृंखला हो र नेपालले अहिलेसम्मकै थोरै अंक जोड्यो । नेपालले ४ खेलमा ३ अंकमात्र जोडेको हो । नेपाल र अमेरिका बीच शनिबार भएको खेल ‘टाई’ मा टुंगिएको थियो ।


नेपालले यसअघिका तीन शृंखलामा सबैमा ४–४ अंक जोडेको थियो । नेपाल पहिलो खेलमा ओमानसँग १३ रनले पराजित भएको थियो भने त्यसपछिको अर्को खेलमा ओमानलाई मंगलबार ७ विकेटले पराजित गरेको थियो । अमेरिकाले यसपटक सबैभन्दा बढी ५ र ओमानले ४ अंक बटुल्यो । पहिलो खेलमा ओमानलाई पहिलो खेलमा १ सय १४ रनले पराजित गरेको अमेरिका त्यसपछि ओमानसँगको अर्को खेलमा १३ रनले पराजित भएको थियो ।


लिग २ मा अमेरिका २४ खेलमा २३ र नेपाल १६ खेलमा १५ अंक जोडि अंक तालिकामा क्रमश: चौथो र पाँचौं स्थानमा छ । लिग २ अर्को वर्ष हुने एकदिवसीय विश्वकप छनोट र एकदिवसीय अन्तर्राष्ट्रिय मान्यताको आधार हो । लिग २ मा सहभागि ७ टोलीले ९ शृंखला अर्थात ३६ एकदिवसीय अन्तर्राष्ट्रिय खेल खेल्नु पर्ने प्रावधान छ ।


लिग २ को शीर्ष ३ टोली सोझै जुलाईमा हुने एकदिवसीय विश्वकप छनोटमा पुग्ने छन् भने चौथो र पाँचौं हुने टोलीले शीर्ष तीन टोलीले जस्तै एकदिवसीय अन्तर्राष्ट्रिय मान्यता कायम राख्दै विश्वकप छनोटमा पुग्ने अर्को मौका पाउने छन् ।

प्रकाशित : असार २, २०७९ ०६:२३
प्रतिक्रिया
पठाउनुहोस्

ओमानमाथि नेपालको सानदार विजय

विनोद पाण्डे, तस्बिर : हेमन्त श्रेष्ठ

ह्युस्टन, अमेरिका — करण केसीको ५ विकेट तथा ओपनरद्वय आसिफ शेख र कुशल भुर्तेलको शतकीय साझेदारीमा नेपालले विश्वकप लिग २ क्रिकेटमा ओमानविरुद्ध सानदार विजय हात पारेको छ । नेपालले मंगलबार शीर्ष स्थानको ओमानलाई ७ विकेटले पराजित गर्‍यो ।

करणको सानदार बलिङपछि टस जितेर ब्याटिङमा आएको ओमान ४६.५ ओभरमा १ सय ६३ रनमा अलआउट भएको थियो । ह्युस्टनको मोसा क्रिकेट मैदानमा आसिफ र कुशलले पहिलो विकेटमा नेपालबाट कीर्तिमानी साझेदारी गरेपछि नेपालले ३३.१ ओभरमै लक्ष्य पूरा गर्‍यो । आसिफ ६२ र कुशल ५६ रन बनाई आउट भए ।

यस विजयपछि नेपाल सात राष्ट्र सहभागी लिग २ मा एक स्थान माथि उक्लँदै पाँचौं स्थानमा आएको छ । नेपालले १५ खेलमा १५ अंक बटुलेको छ । १४ खेलमा १४ अंक जोडेको नामिबिया छैटौं स्थानमा झरेको छ । ओमानविरुद्ध लिग २ को ६ खेलमा नेपालको यो दोस्रो विजय हो । अन्य ४ खेलमा ओमानले नेपाललाई पराजित गरेको थियो ।

आसिफ र कुशलले पहिलो विकेटमा १ सय १४ रनको साझेदारी गरे । एकदिवसीय अन्तर्राष्ट्रियमा नेपालबाट ओपनिङ ब्याटिङमा पहिलो पटक शतकीय साझेदारी सम्भव भएको हो । यी दुईले नै अमेरिकाविरुद्ध सेप्टेम्बरमा ओमानमा ६६ रनको साझेदारी गरेका थिए, जुन नेपालको पहिलो विकेटमा यसअघिको उच्च स्कोर थियो ।

आसिफ र कुशलले जोडेको १ सय १४ रन एकदिवसीय अन्तर्राष्ट्रियमा नेपालको चौथो शतकीय साझेदारी र कुल दोस्रो उच्च साझेदारी हो । देव खनाल र दीपेन्द्रसिंह ऐरीले मार्चमा पपुवा न्यु गिनीविरुद्ध तेस्रो विकेटमा जोडेको १ सय २९ रन नेपालको एकदिवसीय अन्तर्राष्ट्रियमा उच्च साझेदारी हो ।

अमेरिका भ्रमणमा लिग २ को पहिलो खेलमा नेपाल बिहीबार ओमानसँग १३ रनले पराजित हुँदा आसिफ र कुशल दुवै चोटका कारण खेल खेलेका थिएनन् । अमेरिकासँग शनिबार दोस्रो खेलमा टिममा फर्किएर आसिफ र कुशलले पहिलो विकेटमा ५६ रन जोडेका थिए ।

आसिफले लगातार दोस्रो अर्धशतक बनाएका हुन् । अमेरिकाविरुद्ध अघिल्लो खेलमा ६१ रन बनाएका आसिफले ८६ बलको इनिङ्समा ७ चौका र १ छक्का प्रहार गरे । कुशलले ७५ बल खेल्दै ५ चौका प्रहार गरे । देव खनाल रिभर्स स्विप गर्ने प्रयासमा १२ बल खेली १० रनमा आउट भए । उपकप्तान रोहित पौडेल २० बलमा २२ र विजयी चौका प्रहार गरेका दीपेन्द्र ६ रनमा अविजित रहे ।

यसअघि नेपालको बलिङमा करण र कप्तान सन्दीप लामिछाने छाएका थिए । करणले कश्यप प्रजापति र शोएव खानलाई समान २ रनमा आउट गरेपछि नेपालले सुरुआत देखि नै ओमानलाई दबाबमा राखेको थियो । सन्दीपले ओपनर जतिन्दर सिंहलाई २३ रनमा बोल्ड गरे भने आयान खानलाई शुन्य र खावर अलीलाई १ रनमा आउट गरेपछि ओमान १७ औं ओभरमा ४९–५ को स्थितिमा पुगेको थियो ।

ओमानका कप्तान जेसन मक्सदु र सन्दीप गौडले छैटौं विकेटमा ८३ रनको साझेदारी गरे नेपालमाथि चुनौती तेस्र्याएका थिए । दीपेन्द्रले मक्सुदलाई एलबीडब्लु आउट गरी नेपाललाई महत्वपूर्ण विकेट दिलाए । नेपालसँगको अघिल्लो खेलमा अन्तिम ओभरसम्म डटेर अविजित १ सय ४ रन बनाएका मक्सुदले अर्को अर्धशतकीय इनिङ्स खेले । उनले १ सय बल खेली ३ चौका प्रहार गर्दै ५२ रन बनाए ।

ओमानसँगको अघिल्लो खेलमा ३८ रन खर्चेर ५ विकेट लिएका करणले गौडलाई आउट गरे । गौडले ९१ बल खेली ३ चौका र १ छक्का प्रहार गरे । उनले नसिम खुशीलाई १० रनमा आउट गरे । कलिमुल्लाहलाई एलबीडब्लु आउट गर्दै आफ्नो ५ विकेट पूरा गरे । करणले १० ओभरमा ३३ रन खर्चे । सन्दीपले १० ओभरमा ४७ रन खर्चेर ३ विकेट लिए । अन्तिम विकेट सोमपाल कामीको नाममा रहयो ।

नेपाली टोलीमा एक खेलाडी परिवर्तन गरिएको थियो । सुशन भारीको स्थानमा अर्का देव्रे हाते स्पिनर सागर ढकाललाई समावेश गरिएको थियो । पहिलो दुई खेलमा सुशनले कुनै विकेट लिन सकेका थिएनन् । ५ ओभर बलिङ गरेका सागरले पनि ओमानविरुद्ध विकेट लिन सकेनन् ।

लिग २ को ३ वर्षे साइकलमा यो ओमानको अन्तिम खेल थियो र सबै ३६ खेल खेलेको ओमान ४४ अंकसहित शीर्ष स्थानमा छ । लिग २ अर्को वर्ष हुने एकदिवसीय विश्वकप छनोट र एकदिवसीय अन्तर्राष्ट्रिय मान्यताको आधार हो । अमेरिकामा भइरहेको लिग २ नेपालको चौथो शृंखला हो । लिग २ मा सहभागि ७ टोलीले ९ शृंखला अर्थात ३६ एकदिवसीय अन्तर्राष्ट्रिय खेल खेल्नु पर्ने प्रावधान छ ।

लिग २ को शीर्ष ३ टोली सोझै जुलाईमा हुने एकदिवसीय विश्वकप छनोटमा पुग्ने छन् भने चौथो र पाँचौं हुने टोलीले शीर्ष तीन टोलीले जस्तै एकदिवसीय अन्तर्राष्ट्रिय मान्यता कायम राख्दै विश्वकप छनोटमा पुग्ने अर्को मौका पाउने छन् ।

पहिलो खेलमा अमेरिकासँग १ सय १४ रनले पराजित ओमानले त्यसपछि नेपाल र अमेरिकालाई समान १३ रनले पराजित गरेको थियो । नेपाल र अमेरिका बीचको अघिल्लो खेल ‘टाई’ मा टुंगिएको थियो ।


प्रकाशित : असार १, २०७९ ०६:०५
पूरा पढ्नुहोस्
प्रतिक्रिया
पठाउनुहोस्
×