महिला फुटबलको उपाधि धनकुटा नगरलाई- खेलकुद - कान्तिपुर समाचार

महिला फुटबलको उपाधि धनकुटा नगरलाई

रमेशचन्द्र अधिकारी

धनकुटा — अन्तरपालिकास्तरीय सहिद रामकृष्ण श्रेष्ठ स्मृति महिला फुटबल प्रतियोगिताको उपाधि धनकुटा नगरपालिकाले हात पारेको छ । सहिद रामकृष्ण श्रेष्ठ स्मृति प्रतिष्ठानले आयोजना गरेको प्रतियोगिताको मंगलबार भएको फाइनल खेलमा धनकुटा नगरपालिकाले चौबिसे गाउँपालिकालाई ३-० गोल अन्तरले पराजित गर्दै उपाधि जितेको हो ।

विजेता धनकुटाले नगद ५० हजार रुपैयाँसहित कप प्राप्त गरेको छ । उपविजेता चौबिसे गाउँपालिकाले ३० हजार रुपैयाँ नगदमा चित्त बुझाएको छ ।

धनकुटा तर्फबाट अनिता लम्जेलले २ गोल तथा अञ्जना थुलुङले १ गोल गरेकी थिइन् । फाइनल खेलको वुमन अफ द म्याच धनकुटा नगरपालिकाकी अनिता लम्जेल घोषित भइन् भने प्रतियोगिताको उत्कृष्ट खेलाडी धजकुटा नगरपालिकाकै तिर्था लिम्बु घोषित भइन्।

प्रतियोगितामा धनकुटा जिल्लाका ७ वटा पालिकाको सहभागिता रहेको थियो । धनकुटा नगरपालिकाले छथर जोरपाटी गाउँपालिकालाई र चौबिसे गाउँपालिकाले सहिदभूमि गाउँपालिकालाई पराजित गर्दै फाइनल यात्रा तय गरेको थियो ।

धनकुटा नगरपालिका ७ निवासी रामकृष्ण श्रेष्ठको २०३० चैत ३ गते विराटनगरमा बम विस्फोटका क्रममा निधन भएको थियो । श्रेष्ठलाई २०७४ साल माघ ३ गते तत्कालीन सरकारले राष्ट्रिय सहिद घोषणा गरेको थियो ।


प्रकाशित : जेष्ठ ३१, २०७९ १९:५५
प्रतिक्रिया
पठाउनुहोस्

प्रदेश र प्रतिनिधिसभा निर्वाचनको तयारी सुरु : आयोग

कान्तिपुर संवाददाता

काठमाडौँ — निर्वाचन आयोग नेपालले आगामी मंसिरको पहिलो सातासम्म प्रदेश र संघीय निर्वाचन गर्ने गरी तयारी थालेको जनाएको छ । मंगलबार आयोजित पत्रकार सम्मेलनमा आयोगका प्रवक्ता शालिग्राम शर्मा पौडेलले आसन्न प्रदेश र संघको निर्वाचन आगामी मंसिर महिनाको पहिलो सातासम्म गर्ने गरी आयोगले आन्तरिक तयारी थालेको बताएका हुन् ।

उनले आयोगले एकै चरणमा निर्वाचन गर्दा मंसिरको पहिलो सातासम्म निर्वाचन गर्ने गरी आन्तरिक तयारी गरेको पनि बताए । प्रवक्ता पौडेलले आयोगले सरकारलाई निर्वाचन कानुनबमोजिम दिएको परामर्शमा सरकारले निर्वाचन मिति घोषणा गर्ने भएकोले आयोगले आन्तरिक तयारी गरिरहेको पनि स्पष्ट पारे ।

उनले भने, ‘आयोगको आन्तरिक र अनौपचारिक छलफलमा अहिले पनि आयोग एकै चरणमा निर्वाचन हुनुपर्छ भन्नेमा नै छ । एकै चरणमा निर्वाचन गर्दा मंसिरको पहिलो सातासम्म निर्वाचन गर्ने गरी आन्तरिक तयारी गरेको छ । यस सम्बन्धमा आयोगले सरकारलाई निर्वाचन कानुनबमोजिम आयोगको परामर्शमा सरकारले निर्वाचनको मिति घोषणा गर्ने भएकोले आयोगले परामर्श गरिरहेको छ ।’

उनले निर्वाचन आयोग, नेपालले आसन्न प्रतिनिधिसभा र प्रदेशसभा सदस्यको निर्वाचनलाई मध्यनजर गरी असार १ गतेदेखि मतदाता नामावली संकलन र अद्यावधिक गर्ने कार्यक्रम सुरु गर्ने बताए । प्रवक्ता पौडेलले प्रतिनिधिसभा र प्रदेशसभा सदस्यको मिति निकट भविष्यमा घोषणा हुने सम्भावनालाई मध्यनजर गरेर असार १ गतेदेखि सबै निर्वाचन कार्यालयहरु र सबै जिल्ला प्रशासन कार्यालय एवं ७३ वटा इलाका प्रशासन कार्यालयबाट मतदाता नामावली संकलन र अद्यावधिक गर्ने कार्यक्रम सुरु गर्न लागेको बताए । उनले हाल अस्थायी बसोबास गरिरहेकै जिल्लाको निर्वाचन कार्यालय गइ मतदाता नामावली दर्ता गर्न सकिने पनि उल्लेख गरे ।

प्रवक्ता पौडेलका अनुसार मतदाता नामावलीमा रहेको आफ्नो नाम, ठेगाना, जन्ममिति लगायत विवरण सच्याउन प्रमाणसहित निवेदन दिएमा आवश्यक निर्णय गरी त्रुटि सच्याउन सकिने छ । कुनै मतदाताले झुटो विवरण दिइ मतदाता नामावलीमा नाम समावेश गरेको भनि नाम हटाउन प्रमाणसहित उजुरी आएमा नाम दर्ता अधिकारीले छानबिन गरी नाम हटाउन सक्ने व्यवस्था गरेको पनि आयोगले जनाएको छ ।

प्रवक्ता पौडेलका अनुसार कुनै मतदाताले विवाह वा बसाइँ सरेको कारण मतदाता नामावलीमा रहेको आफ्नो ठेगाना परिवर्तन गर्न चाहेमा साविकमा नाम दर्ता भएको जिल्ला वा नाम सार्न चाहेको जिल्लाको निर्वाचन कार्यालयमा निवेदन दिन सक्ने व्यवस्था छ ।

साथै मतदाताले आवश्यक कागजातसहित आयोगको कार्यालयमा निवेदन दिएमा निर्वाचन अधिकारीले नामावली अद्यावधिक गर्ने बताइएको छ ।

प्रकाशित : जेष्ठ ३१, २०७९ १९:५१
पूरा पढ्नुहोस्
प्रतिक्रिया
पठाउनुहोस्
x
×