कृतिकाको कप्तानीमा टोली
काठमाडौँ — कृतिका मरासिनीको कप्तानीमा नेपालले मलेसियामा हुने आईसीसी यू–१९ विश्वकप एसिया क्वालिफायरका लागि अन्तिम टोली छनोट गरेको छ ।
नेपाल क्रिकेट संघ (क्यान) ले जेठ २० देखि मलेसियामा हुने प्रतियोगितामा १४ सदस्यीय टोली चयन गरेको छ । नेपालले जेठ २० मा कतार, जेठ २१ मा यूएई, जेठ २३ मा भुटान, जेठ २४ मा थाइल्यान्ड र जेठ २५ मा आयोजक मलेसियाविरुद्ध खेल्ने तालिका छ ।
नेपाली टिम शीर्षस्थानमा रहन सके अर्को वर्ष (सन् २०२३) दक्षिण अफ्रिकामा हुने टी–२० विश्वकप खेल्न पाउनेछ । यू–१९ महिला विश्वकप पहिलोपल्ट हुन लागेको हो । कृतिकासहित स्नेहा महरा (उपकप्तान), सृष्टि जैसी, मनीषा उपाध्याय, मनीषा रानामगर, एलिसा यादव (विकेटकिपर), साना प्रवीण, रञ्जु श्रेष्ठ (विकेटकिपर), आस्मा पुलामीमगर, सानु राजवंशी, किरण कुँवर, अञ्जली विक, अनु कडायत र सुस्मिता भुसाल छन् ।