खुला दौड प्रतियोगिताको उपाधि अजय र अनिषालाई- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खुला दौड प्रतियोगिताको उपाधि अजय र अनिषालाई

अमृता अनमोल

बुटवल — गणतन्त्र दिवस २०७९ को पूर्वसन्ध्यामा बुटवलमा आयोजित खुला दौड प्रतियोगिता (रोड रेस) को उपाधि कपिलवस्तुका अजय पाण्डे र घोराहीकी अनिषा चौधरीले पाएका छन् ।

लुम्बिनी प्रदेशको शिक्षा, विज्ञान, युवा तथा खेलकुद मन्त्रालय र लुम्बिनी प्रदेश खेलकुद परिषद्को संयुक्त आयोजनामा शनिबार पाँच किलोमिटर खुल्ला दौड प्रतियोगिता आयोजना भएको थियो ।

कपिलवस्तु वाणगंगा बहुमुखी क्याम्पसका पाण्डेले १६ मिनेट ३० सेकेन्डमा पाच किलोमिटरको दुरी पार गरेका थिए । प्रतियोगितामा नवीन औद्योगिक माविमा ११ कक्षामा अध्ययरत प्रशान्त थापा दोस्रो भए । उनले सो दुरी १७ मिनेट ४२ सेकेन्डमा पार गरेका थिए । कालिका मानवज्ञानका राजन बलाल थापा प्रतियोगितामा तेस्रो भए । उनले १८ मिनेट १२ सेकेन्डमा दुरी पार गरेका थिए ।

यसैगरी महिलातर्फ दाङको घोराहीकी अनिषा चौधरीले २२ मिनेट २७ सेकेन्डमा दुरी पार गरी प्रथम भएकी थिइन् । यसैगरी कालिका माविकी अन्जना पाण्डेले २९ मिनेट १३ सेकेन्डमा दुरी पार गर्दै दोस्रो भइन् । कालिकाकै सन्जना अधिकारी ३० मिनेटमा दुरी पार गदै प्रतियोगितामा तेस्रो भइन् ।

लुम्बिनी प्रदेशमा भौतिक पुर्वाधारसंगै खेलकुद गतिविधिलाई अगाडि बढाउन कार्यक्रम गरिएको परिषद्का सदस्य सचिव जयप्रकाश भट्टराईले बताए । प्रतियोगितामा प्रथम, दोस्रो र तेस्रो हुने खेलाडीले क्रमश नगद १० हजार, ८ हजार र ५ हजारसहित प्रमाणपत्र पाउनेछन् । उनीहरुलाई आइतबार हुने औपचारिक कार्यक्रममा पुरस्कृत गरिने छ ।

त्यसअघि कार्यक्रमको एक समारोहका बीच लुम्बिनी प्रदेशका मुख्यमन्त्री कुलप्रसाद केसीले उद्घाटन गर्दै खेलकुदको विकासमा प्रदेश सरकार लागेको बताएका थिए । दौड प्रतियोगितामा रुपन्देही, कपिलवस्तु, घोराही, पाल्पा, नवलपरासी, गुल्मी लगायतका एक सय बढी खेलाडीहरु सहभागी रहेका थिए ।

प्रकाशित : जेष्ठ १४, २०७९ १०:३९
प्रतिक्रिया
पठाउनुहोस्

‘संगीत उद्गम र विकास’ सार्वजनिक

कान्तिपुर संवाददाता

काठमाडौँ — लामो समयदेखि संगीत क्षेत्रको विकासका लागि खोज, अध्ययन, अनुसन्धान एवं लेखनमा सक्रिय दिनेश नेपालको ‘संगीत उद्गम र विकास’नामक संगीतग्रन्थ सार्वजनिक भएको छ । 

शुक्रबार राजधानीको जमलस्थित राष्ट्रिय नाचघरमा भएको कार्यक्रममा गीतकार एवं चलचित्र निर्देशक यादव खरेल, अग्रज मूर्तिकार ठाकुरप्रसाद मैनाली, गायक रामेश श्रेष्ठ र चित्रकार कृष्ण मानन्धरले ग्रन्थको लोकार्पण गरे । ग्रन्थमा संगीतको उद्गम तथा विकास, पूर्वीय तथा पश्चिमा सिद्धान्त, यसको शैलीगत विशेषता र प्रणालीबारे व्याख्या एवं विश्लेषण गरिएको लेखक नेपालले बताए ।

ग्रन्थको समीक्षा गर्दै खरेलले मानिसको जन्मदेखि मृत्युपर्यन्तसम्म संगीत अपरिहार्य रहे पनि यसका सैद्धान्तिक पक्षबारे लेखिएका थोरै मात्र पुस्तक आएको उल्लेख गरे । ‘हामी जन्मेर च्याँ गरेर रोएदेखि नमरुन्जेल कहीँ न कतै संगीतसँगै हुन्छौं’, उनले भने,‘तर संगीतको ऐतिहासिक पक्षबारे किताब लेख्ने प्रचलन आएको छैन जस्तो मलाई लाग्छ । संगीतका सिद्धान्त र इतिहासलाई जोडेर तयार पारिएका पुस्तकहरु पढ्न पाएकै छैन ।’

नेपालद्वारा लिखितग्रन्थले संगीतको उद्गमदेखि कसरी विकास हुँदै आयो भन्ने ऐतिहासिक पक्षलाई समेटिएकाले संगीतप्रेमी र संगीतका सर्जकहरुलाई समेत उत्तिकै उपयोगी हुने उनले ठहर गरे ।

संगीतमा नवजीवन, भावना र प्रत्येक लयमा समायोजन हुने भएकाले यसको सैद्धान्तिक पक्षको अध्ययन पनि उत्तिकै महत्त्वपूर्ण भएकाले ग्रन्थले संगीतको महिमा र आयामहरूलाई बुझ्न सघाउ पुराउने मानन्धर, श्रेष्ठ र मैनालीले जिकिर गरे । गायक श्रेष्ठले भने,‘संगीतको तालले मानिसको भावनालाई छुन्छ । चेतना प्रभावमा समेत यो शक्तिशाली र प्रभावशाली माध्यम हो । यससम्बन्धी ग्रन्थहरु भए अझ यसको महत्त्व मानिसले बुझ्न सक्छन् ।’

प्रकाशित : जेष्ठ १४, २०७९ १०:२९
पूरा पढ्नुहोस्
प्रतिक्रिया
पठाउनुहोस्
×