ईपीएल पुग्यो सर्वोच्च- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

ईपीएल पुग्यो सर्वोच्च

कान्तिपुर संवाददाता

काठमाडौँ — नेपाल क्रिकेट संघ (क्यान) को कदमविरूद्ध एभरेस्ट प्रिमियर लिग (ईपीएल) र त्यसका फ्रेन्चाइज टोली सर्वोच्च अदालतको ढोका ढकढक्याउन पुगेका छन् । ईपीएलले क्यानसँग पाँचौं संस्करण आयोजना गर्न माग गरेको थियो ।

तर क्यानले भारतीय कम्पनी सेभेन थ्री स्पोर्ट्ससँग साझेदार गर्दै सेप्टेम्बर २४ देखि अक्टोबर २२ सम्म नेपाल टी–२० लिग आयोजना घोषणा गर्दै एउटा देशमा एकमात्र फ्रेन्चाइज लिग हुने जनाएको थियो । नेपाल टी–२० लिगको घोषणा गरेपछि ईपीएलको अस्तित्व संकटमा परेको छ । क्यानको निर्णयले आफूहरू दुःखी हुन पुगेको ईपीएल र त्यसका ६ फ्रेन्चाइज टोलीले जनाएका थिए ।

क्यान आफ्नो निर्णयमा यथावत रहेमा आफूहरूले क्यानको कार्यक्रम बहिष्कार गर्ने चेतावनी ईपीएल र सम्बन्धित फ्रेन्चाइज टोलीले दिएका थिए । ईपीएलले धम्कीपूर्ण भाषा प्रयोग गरेको जनाउँदै क्यानले त्यसमा आपत्ति जनाएको थियो । ईपीएलले क्यान र सेभेन थ्री स्पोर्ट्ससँग गरेको सम्झौता कानुन विपरीत रहेको जनाउँदै यसलाई तत्काल रोक्का गर्न अन्तरिम आदेशको मागसहित बिहीबार सर्वोच्चमा रिट दायर गरेको जनाएको छ ।

प्रकाशित : जेष्ठ १३, २०७९ ०६:४१
प्रतिक्रिया
पठाउनुहोस्

तिलोत्तमाको मेयरमा कांग्रेसका खाँण र उपमेयरमा एमालेकी चौधरी निर्वाचित

सन्जु पौडेल

तिलोत्तमा — रुपन्देहीको तिलोत्तमा नगरपालिकाको मेयरमा नेपाली कांग्रेसका रामकृष्ण खाँण विजयी भएका छन् । नेकपा एमालेका मोहन चापागाईंलाई ७६५ मतान्तरले पराजित गर्दै खाँण तिलोत्तमा नगरपालिकाको मेयरमा निर्वाचित भएका हुन् ।

निर्वाचन अधिकृतको कार्यालयका अनुसार खाँणले २४ हजार ३९६ मत ल्याएर नगर प्रमुखमा विजयी भएका हुन् । खाँणका निकटतम प्रतिद्वन्द्वी एमालेका चापागाईंले २३ हजार ६३१ मत प्राप्त गरेका छन् । खाँण नेपाली कांग्रेस रुपन्देहीका जिल्ला सभापतिसमेत हुन् । उनी गृहमन्त्री तथा नेपाली कांग्रेसका केन्द्रीय सदस्य बालकृष्ण खाँणका सहोदर भाइ हुन् । गत मंसिरमा सम्पन्न कांग्रेसको १४ औं महाधिवेशनबाट कांग्रेस रुपन्देहीको सभापतिमा निर्विरोध निर्वाचित भएका हुन् ।

त्यस्तै, उपमेयरमा भने फराकिलो मतान्तरसहित नेकपा एमालेकी जागेश्वरीदेवी चाधरी विजयी भएकी छन् । चौधरीले २३ हजार ८६ मत प्राप्त गरी उपप्रमुखमा निर्वाचित भएकी हुन् । उनका निकटतम प्रतिद्वन्द्वी गठबन्धनको तर्फबाट माओवादी केन्द्रका हेमलाल पाण्डेले ११ हजार ५४६ मत प्राप्त गरेका छन् । २०७४ को स्थानीय तह निर्वाचनमा तिलोत्तमा नगरपालिकाको मेयर र उपमेयर दुवै एमाले विजयी भएको थियो । कुल १७ वटा वडा रहेको तिलोत्तमा नगरपालिकामा ९ वटा वडाको अध्यक्षमा कांग्रेस र ८ वडाको अध्यक्षमा एमालेले जित हासिल गरेको छ ।

तिलोत्तमा नगरपालिकामा वडा नं १, ४, ७, ८, १०, ११, १२ र १५ मा नेकपा एमालेले विजय हासिल गरेको छ भने वडा नं २, ३, ५, ६, ९, १३, १४ १६ र १७ मा नेपाली कांग्रेसले जित हासिल गरेको छ । यससँगै रुपन्देहीका १६ वटै स्थानीय तहमा मतगणना सकिएको छ । जसमध्ये १० वटा स्थानीय तहको प्रमुख काँग्रेसले जितेको छ भने ३ वटामा एमालेले जितेको छ ।

तीन वटा स्थानीय तहमा जनता समाजवादी पार्टी, लोकतान्त्रिक समाजावादी पार्टी र जनता प्रगतिशील पार्टीले एक/एक स्थानीय तहको प्रमुख जितेका छन् । माओवादी र नेकपा एकीकृत समाजवादी भने शून्य भएका छन् ।

प्रकाशित : जेष्ठ १३, २०७९ ०६:४१
पूरा पढ्नुहोस्
प्रतिक्रिया
पठाउनुहोस्
×