२६.१२°C काठमाडौं
काठमाडौँ — दोस्रो हाफको अन्तिमतिर गरेको ३ गोलको मद्दतमा म्यानचेस्टर सिटीले २०२१/२०२२ को इंग्लिस प्रिमियर लिगको उपाधि जितेको छ । आइतबार इतिहाड रंगशालामा एस्टन भिल्लाविरुद्ध २ गोलले पछि परेको अवस्थामा म्यानचेस्टर सिटीले रोमाञ्चक जित हात पारेको हो ।
पहिलो हाफमै १-० को अग्रता बनाएको एस्टन भिल्लाले ६९औं मिनेटमा २-० को अग्रता बनाएको थियो ।
भिल्लाका लागि म्याटी क्यासले ३७औं र फिलिप कोटिन्होले ६९औं मिनेटमा गोल गरेका थिए । अर्कोतिर लिभरपुल र उल्भ्सबीचको खेल बराबरी चलिरहँदा उपाधि जित्न सिटीलाई कम्तीमा पनि बराबरी नतिजा निकाल्नुपर्ने अवस्था थियो ।
लिभरपुलले खेल जितेको अवस्थामा सिटीलाई स्पष्ट जितसहित ३ अंक नै आवश्यक थियो । उल्भ्ससँगको खेल लिभरपुलले पनि ३-१ ले जित हात पारे पनि एक अंकले सिटीले उपाधि उचाल्न सफल भयो ।
सिटीका लागि जर्मन खेलाडी इल्काई गुन्डोआनले पहिलो गोल गरेका थिए । सिटीले ५ मिनेटको अन्तरालमै ३ गोल गरेको हो । गुन्डोआनले ७६औं मिनेटमा र ८१औं मिनेटमा गोल गरे भने ७८औं मिनेटमा स्पेनी खेलाडी रोद्रीले दोस्रो गोल गरेका थिए ।
पेप ग्वार्डिओलाको टिम सिटी पाँच वर्षमा चौथोपल्ट उपाधि जित्न सफल भएको छ । सन् २०१८ यता २०२० मा लिभरपुलले प्रिमियर लिगको उपाधि जितेको थियो । त्यसबाहेक सबै उपाधि सिटीले जितेको छ ।
