चन्दन र राजेन्द्र विजेता

भेट्रान पुरुष सिंगल्सको ४० वर्षमाथि चन्दन र ५० वर्षमाथि राजेन्द्र विजेता हुन् । स्पिन इभेन्ट्सद्वारा आयोजित प्रतियोगिताको फाइनलमा चन्दनले एमआईएसका नरेश रावललाई ७–११, ११–८, ११–३, ११–७, ११–६ को सेटमा हराए । ललितपुरका राजीप महर्जन र कीर्तिपुरका प्रशान्त महर्जनले तेस्रो स्थानमा चित्त बुझाए ।

लैनचौरस्थित राष्ट्रिय टेबलटेनिस प्रशिक्षण केन्द्रमा सम्पन्न ५० वर्षमाथि फाइनलमा राजेन्द्रले एनसीसीएसका कपुर शर्मा पौडेललाई १२–१४, ७–११, ११–७, ११–८, ११–८, १४–१२ को सेटमा हराए । एपीएमका विश्वास गौचन र एएनएस १९८० का किरणमुनि वज्राचार्य तेस्रो बने ।

भेट्रान र विभिन्न उमेरसमूह गरी ८ विधामा प्रतिस्पर्धा भइरहेको आयोजक स्पिनका सचिव ज्याकी महर्जनले जनाएका छन् । सबै विधामा नगद पुरस्कार रहेको छ । सोमबारसम्म चल्ने प्रतियोगितामा करिब २ सय ५० खेलाडीले भाग लिएका छन् । प्रतियोगितालाई अमेरिका बस्ने श्रवण चिपालुले मुख्य प्रायोजन गरेका छन् । टेबलटेनिसका पूर्वखेलाडी मिलन श्रेष्ठको स्मृतिमा उक्त प्रतियोगिता भएको हो ।