टी-२० सिरिजको अन्तिम खेलमा युगान्डाविरुद्ध नेपाल विजयी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

टी-२० सिरिजको अन्तिम खेलमा युगान्डाविरुद्ध नेपाल विजयी

कान्तिपुर संवाददाता

काठमाडौँ — युगान्डाको महिला टोलीसँगको पाँच खेलको ट्वान्टी–२० श्रृंखला अन्तर्गत शनिबार सम्पन्न अन्तिम खेलमा नेपालले युगान्डालाई ३३ रनले जितेको छ ।

कीर्तिपुरस्थित त्रिभुवन विश्वविद्यालयको मैदानमा सम्पन्न पाँचौं तथा अन्तिम ट्वान्टी–२० खेलमा नेपालले दुबै पक्ष ब्याटिङ र बलिङमा सुधारिएको प्रदर्शन गरेको थियो । यस क्रममा नेपालले ३३ रनको जित निकालेको हो ।

यद्यपि पाँच म्याचको टी–ट्वान्टी सिरिजमा युगान्डा ३–२ ले विजयी बनेको छ । यससँगै घरेलु टोली नेपालले जितसहित शृंखलाको अन्त्य गरेको छ । १ सय २४ रनको लक्ष्य पछ्याएको युगान्डाले निर्धारित २० ओभरमा ६ विकेट गुमाएर ९० रन मात्र बनाउन सक्यो ।

नेपालको कसिलो बलिङ समक्ष युगान्डाको ब्याटिङ अघिल्ला खेलको तुलनामा चल्न सकेन । जवाफी ब्याटिङ गर्ने क्रममा युगान्डाका लागि रिता मुसामालीले सर्वाधिक २६ रन बनाउँदा ओपनर केभिन अविनोले १५, फियानो कुलुमे ८, जेनेट बाबाजिले १०, लियोना बाबिरियले २ र सुसान काकाईले ७ रन बनाए ।

सकिरा सादिक ७ र कान्सी अवेको १३ रनमा नटआउट रहे । कसिलो बलिङ गरेको नेपालका लागि नेपालकी इन्दु वर्मा र सिता राना मगरले समान दुई/दुई विकेट निकाल्दा आस्मिना कर्मचार्य र हिरामाइ रोयले समान एक/एक विकेट आफ्नो नाममा लेखाए ।

जितपछि नेपाली टोलीकी कप्तान रुबिना क्षेत्रीले नेपाली टोलीलाई अभ्यस्त बनाउन यस्तै प्रतियोगिताको आवश्यक भएको प्रतिक्रिया दिइन् । धेरै पछि घरेलु मैदानमा आयोजना भएको शृंखलामा आफ्नो कमी कमजोरी औल्याउँदै १०/१५ रनका लागि मिहिनेत गर्दा सफल भएको उनले बताएकी थिइन् ।

यसअघि, ब्याटिङको निम्तो पाएको नेपालले पूरै २० ओभरको समाप्तिमा ६ विकेट गुमाएर १ सय २३ रनको स्कोर बनाएको थियो । अघिल्ला खेलमा भन्दा राम्रो स्कोर निस्किएको खेलमा नेपालका लागि ज्योति पाण्डे अर्धसतक बनाउन १ रनले चुकिन् ।

प्रकाशित : जेष्ठ ७, २०७९ १८:३३
प्रतिक्रिया
पठाउनुहोस्

ऊर्जा क्षेत्रमा सहकार्य गर्न बाङ्लादेशलाई नेपाल चेम्बर अफ कमर्सको प्रस्ताव

कान्तिपुर संवाददाता

काठमाडौँ — नेपाल चेम्बर अफ कमर्सले ऊर्जा क्षेत्रमा सहकार्य गर्न बाङ्लादेश समक्ष प्रस्ताव गरेको छ । नेपाल छिट्टै विद्युत निर्यात गर्न सक्ने हैसियतमा पुग्न लागेको सन्दर्भमा बाङ्लादेशसँग विद्युत व्यापारका लागि चेम्बरले आग्रह गरेको विज्ञप्तीमा भनिएको छ ।

नेपाल बाङ्लादेशबीच कुटनीतिक सम्बन्ध स्थापना भएको ५० वर्ष पुगेको अवसरमा काठमाडौंस्थित बाङ्लादेशी दुतावासमा शुक्रबार आयोजित कार्यक्रममा चेम्बर अध्यक्ष राजेन्द्र मल्लले नेपाल, भारत र बाङ्लादेशबीच भएको विद्युत व्यापार सम्बन्धी त्रिपक्षी सम्झौताको व्यवहारिक कार्यन्वयन हुनुपर्नेमा जोड दिएका थिए ।

नेपाल कम्तिमा अबको १ वर्षपछि विद्युत निर्यात गर्न सक्ने हैसियतमा पुग्ने अध्यक्ष मल्लको भना‍इ थियो । भारतमा हालकै ट्रान्समिसन लाईनबाट कम्तिमा ५० मेगावट विद्युत निर्यातका लागि तयारी गर्न सकिने र अन्य सेवा-सर्तका लागि तीनवटै मुलुकले गृहकार्य गर्नुपर्ने अध्यक्ष मल्लले बताएका थिए ।

बाङ्लादेशमा ऊर्जाको माग उच्च रहेको सन्दर्भमा ‍नेपालबाट निर्यात गर्ने विभिन्न विकल्पमा दुई पक्षीय छलफल भएको थियो । नेपाल, बाङ्लादेश र भारतबीच ऊर्जा व्यापार सम्बन्धी सम्झौता भए पनि यसको व्यवहारिक कार्यन्वयन हुन सकेको छैन । चेम्बर अध्यक्ष मल्ले विद्युत व्यापारको सहजिकरणसँगै नेपालमा जलविद्युतमा लगानी गर्न बाङ्लादेशका राजदूत सलाउद्दिन चोधुरीसँग आग्रह गरेका थिए ।

राजदूत चोधुरीले नेपालमा उत्पादित विद्युत किन्नका लागि बाङ्लादेश तयार रहेको बताए । ‘अवको केही देशक भित्रै बाङ्लादेशले ग्रिन इनर्जीलाई प्रोत्साहन गर्नेछ,’ उनले भने, ‘सोहीअनुसार हाम्रा प्राथमिकताहरू, योजनाहरू बनिरहेकाछन् । नेपालको विद्युत खरिद गर्नका लागि हामी आतुर छौं ।’

प्रकाशित : जेष्ठ ७, २०७९ १८:२३
पूरा पढ्नुहोस्
प्रतिक्रिया
पठाउनुहोस्
×