आर्मीका हिमाल र मानबहादुरले कोर्स रेकर्डसहित ट्राई–एड्भेन्चर जिते- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

आर्मीका हिमाल र मानबहादुरले कोर्स रेकर्डसहित ट्राई–एड्भेन्चर जिते

हिमालयन गर्ल्स टिमका हुमी बुढामगर र इन्द्रकला नेम्बाङ पनि कोर्स रेकर्ड बनाउँदै महिलातर्फ पहिलो भए
राजु घिसिङ

जोमसोम, मुस्ताङ — त्रिभुवन आर्मी क्लबका हिमाल टमाटा र मानबहादुर थापाले १ घन्टा १५ मिनेट २ सेकेन्डको कोर्स रेकर्ड बनाउँदै शनिबार जोमसोममा सम्पन्न प्रधानसेनापति हाई अल्टिच्युड ट्राई–एड्भेन्चर प्रतियोगितामा पहिलो स्थान हात पारेका छन् ।

१३ औं दक्षिण एसियाली खेलकुद (साग)मा ट्रायथलनको स्वर्णपदक जितेका हिमालले हाई अल्टिच्युड ट्राई–एड्भेन्चरको खुला स्पर्धामा लगातार दोस्रोपल्ट उपाधि जितेका हुन् । उनले वसन्त थारुसँग सहकार्य गर्दै तीन वर्षअघि भएको दोस्रो संस्करणमा १ घन्टा १९ मिनेट ४२ सेकेन्डसाथ २०.२ किमि दूरी पार गर्दै सफलता हात पारेका थिए । उनले त्यही कोर्स रेकर्डलाई यसपाली मान बहादुरसँग मिलेर तोडेका हुन् । यो जोडी पहिलो संस्करण (२०७४ साल) मा दोस्रो भएको थियो ।

समुद्री सतहदेखि २,७८० मिटरदेखि ३,२०० मिटरसम्मको उचाइमा आयोजित रक क्लाइम्बिङ (१ सय मिटर), ट्रेल रनिङ (४.७५ किमि) र साइक्लिङ (१५.३५ किमि) को प्रतियोगितामा नेपाली सेनाकै टिमले शीर्ष तीन स्थान कब्जा गर्यो । वसन्त थारु र नवराज न्यौपाने दोस्रो स्थानमा आए । १३ औं सागका स्वर्ण विजेता वसन्त र यो रेसका नयाँ खेलाडी नवराजले १ घन्टा १७ मिनेट १६ सेकेन्डमा दूरी पार गरे । कमल ओली र प्रेमसिंह मन्याल १ घन्टा २१ मिनेट ३० सेकेन्डसहित तेस्रोमा रहे ।

महिलातर्फ हिमालयन गर्ल्सका हुमी बुढामगर र इन्द्रकला नेम्बाङले पनि १ घन्टा ४३ मिनेट २३ सेकेन्डको कोर्स रेकर्ड बनाउँदै पहिलो स्थान हासिल गरे । आर्मीका उषा खनाल र मन्जु कुमारी खड्का (१ घन्टा ५० मिनेट ३६ सेकेन्ड) दोस्रोमा रहे । १३ औं सागमा रजत हात पारेका हुमी र उषाको जोडी हाई अल्टिच्युड ट्राई–एड्भेन्चरको दोस्रो संस्करणमा उपविजेता भएको थियो ।

दुई संस्करणमा स्वदेशी खेलाडीले प्रतिस्पर्धा गरेको हाई अल्टिच्युड ट्राई–एड्भेन्चरलाई यसैपाली आएर अन्तर्राष्ट्रिय स्तरमा आयोजना गरियो । अन्तर्राष्ट्रिय विधामा भारतीय आर्मी (पिट्टु शिव कृष्ण रेड्डी र सप्पर विनायक पोपट कुटे) १ घन्टा ३५ मिनेट ६ सेकेन्डसाथ पहिलो भए । यसमा ब्रिटिश आर्मीका दुई र बंगलादेशी सेनाका एक टिम पनि सहभागी थिए ।

नेपाली सेनाद्वारा आयोजित प्रतियोगितामा छनोट भएका २२ टिम सहभागी भएका थिए । जसमध्ये ५ टिमले महिलातर्फ प्रतिस्पर्धा गरेका थिए ।

प्रकाशित : जेष्ठ ७, २०७९ १२:४१
प्रतिक्रिया
पठाउनुहोस्

गठबन्धनका उम्मेदवारलाई हराउँदै स्वतन्‍त्रबाट २३ वर्षीय युवा वडाध्यक्षमा निर्वाचित

डिल्लीराम खतिवडा

उदयपुर — उदयपुरको कटारी नगरपालिका–८ को अध्यक्षमा २३ वर्षीय नविनकुमार तामाङ निर्वाचित भएका छन् । कांग्रेसले टिकट नदिएपछि स्वतन्त्र उम्मेदवार बनेका तामाङ कांग्रेस माओवादी(सत्ता गठनबन्धन)का तर्फबाट माओवादीबाट उम्मेदवार बनेका कमलबहादुर श्रेष्ठलाई हराउँदै विजयी हासिल गरेका हुन् ।

शनिबार सर्वजनिक मतगणनाको अन्तिम परिणममा तामाङले १२ मतको अन्तरमा निर्वतमान वडाध्यक्ष समेत रहेका श्रेष्ठलाई हराएका हुन् । तामाङले ५ सय ५३ मत ल्याउँदा माओवादीका श्रेष्ठले ५ सय ४१ मत प्राप्त गरेको निर्वाचन अधिकृत राजकुमार राउतले बताए ।

तामाङ स्थानीय तह निर्वाचनमा गठबन्धन गर्नु हुँदैन भन्ने पक्षमा थिए । उनले सामाजिक सजालमा व्यापक रुपमा गठबन्धनको विरोध गर्दै आएका थिए । त्यसैले उनलाई कांग्रेस पार्टीले उम्मेदवार नबनाएको स्थानीयले बताए । तामाङ काग्रेसको १४ औं अधिवेशनमा कटारी – ८ बाट क्षेत्रीय प्रतिनिधि निर्वाचित सदस्य हुन् ।

‘पार्टीले टिकट नदिएपछि स्वतन्त्र उम्मेदवार दिएँ, ’ निर्वाचित तामाङले भने, ‘पार्टीले विश्वास नगरेपनि जनताले विश्वास गरेर जिताइ दिए ।’ अब जनताको मतलाई कदर गर्दै काम गर्ने उनले बताए ।

स्वतन्त्र उम्मेदवारी दिएका मध्ये अहिलेसम्म तामाङसहित उदयपुरबाट ३ जनाले विजय हासिल गरिसकेका छन् । तामाङसँगै लिम्चुङबुङ गाउँपालिका–३ बाट २८ वर्षीय गुरुमणि कुमाई र उदयुरगढी गाउँपालिका–२ बाट इन्द्रबहादुर राउत निर्वाचित भएको निर्वाचन आयोगले जनाएको छ ।

प्रकाशित : जेष्ठ ७, २०७९ १२:३५
पूरा पढ्नुहोस्
प्रतिक्रिया
पठाउनुहोस्
×