चौथो खेलमा जितको स्वाद- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

चौथो खेलमा जितको स्वाद

कान्तिपुर संवाददाता

काठमाडौँ — ‘डेब्यु’ गरिरहेकी हिरनमायी रोयले सानदार बलिङ प्रदर्शन गरेपछि नेपाली महिला क्रिकेट टोलीले युगान्डासँगको ट्वान्टी–२० अन्तर्राष्ट्रिय शृंखलामा पहिलो जित हात पारेको छ । पहिलो तीन खेल नै हारेर शृंखला गुमाइसकेको नेपालले शुक्रबार चौथो खेलमा युगान्डामाथि १५ रनको विजय नतिजा निकाल्यो । 

अघिल्लो दिनको वर्षाले मैदान भिजेका कारण १८–१८ ओभरमा छोट्याइएको खेलमा टस जितेको नेपाल १७.५ ओभर खेल्दै ९७ रनमा अलआउट भयो । जबाफमा युगान्डाले निर्धारित पूरा ओभर खेल्दै ८ विकेट गुमाई ८२ रनमात्र बनाउन सक्यो ।

नेपालबाट ओपनर ज्योति पाण्डेले सर्वाधिक १७ रन बनाइन् । उनले १३ बल खेली ४ चौका प्रहार गरिन् । अर्का ओपनर विन्दु रावलले ३५ बलमा १६ र सीता रानामगरले ११ रन बनाए । उपकप्तान इन्दु बर्मा १, सरिता मगर २, कप्तान रुबिना क्षेत्री १, अप्सरी बेगम ४, डली भट्ट र अस्मिना कर्माचार्यले ६–६ रन बनाए । कविता कुँवर ६ रनमा अविजित रहिन् ।

युगान्डाकी कप्तान कोन्की अवेकोले ४ ओभरमा १३ रन खर्चेर ३ विकेट लिइन् । सराह अकिटेङले ४ ओभरमा १ मेडन राख्दै १० रन खर्चेर २ तथा फिओना कुलुमे र जेनेट एमबाबाजीले १–१ विकेट लिए । १५ वर्षीया लेग स्पिनर हिरनमायीले ३ ओभरमा ११ रनमात्र खर्चेर २ विकेट लिएपछि युगान्डा विजय गति रोकिएको थियो । उनलाई अन्तर्राष्ट्रिय क्रिकेट परिषद् (आईसीसी) की वित्तीय एवं अप्रेसन अफिसर नितिशा कोठारीले प्लेयर अफ द म्याचको पुरस्कार प्रदान गरिन् । कविता कुँवर, अस्मिना र रुबिनाले १–१ विकेट लिए ।

युगान्डाबाट सर्वाधिक २१ रन बनाएकी जेनेटलाई हिरनमायीले बोल्ड गरेकी थिइन् । रिता नयनगेन्डो र इभेलिन एनिइपोले १६–१६ तथा केभिन अविनोले ११ रन बनाए । पाँचौं तथा अन्तिम खेल शनिबार हुनेछ ।

प्रकाशित : जेष्ठ ७, २०७९ ०८:०३
प्रतिक्रिया
पठाउनुहोस्

धनुषा मिथिला बिहारीको मेयरमा कांग्रेस र उपमेयरमा माओवादी विजयी

कान्तिपुर संवाददाता

धनुषा — धनुषाको मिथिला बिहारी नगरपालिकाको मेयरमा कांग्रेस र उपमेयरमा माओवादीका उम्मेदवार निर्वाचित भएका छन् । निर्वाचत आयोगका अनुसार मिथिला बिहारीको मेयरमा कांग्रेसका उम्मेदवार राजेन्द्रप्रसाद यादव र उपमेयरमा मा‌ओवादी केन्द्रका उम्मेदवार शोभादेवी साह निर्वाचित भएका छन् । 

मेयरमा निर्वाचित नेपाली कांग्रेस उम्मेदवार यादव ४ हजार ३ सय ४ मत प्राप्त गरेर विजयी भएका छन् । उनले निकटतम प्रतिद्वन्द्वी नेपाल कम्युनिष्ट पार्टी (एमाले) का मेयरका उम्मेदवार अनिलकुमार यादवलाई २ सय १० को मतान्तरले पराजित गरेका छन् । पराजित अनिलकुमार यादवले ४ हजार ९४ मत प्राप्त गरेका थिए ।

उपमेयरमा निर्वाचित माओवादी केन्द्रकी उम्मेदवार शोभादेवी साहले ३ हजार ३ सय ३० मत प्राप्त गरिन् । यसैगरी एकीकृत समाजवादीका उम्मेदवारले २ हजार ७ सय ९७ प्राप्त गरेका थिए । उपमेयरमा जनता समाजवादीका उम्मेदवार जीवछ यादवले २ हजार ७ सय ११ मत प्राप्त गरेका थिए ।

यो नगरपालिकामा राजनीतक दलहरू छुट्टाछुट्टै चुनावी प्रतिस्पर्धामा थिए ।

प्रकाशित : जेष्ठ ७, २०७९ ०८:०२
पूरा पढ्नुहोस्
प्रतिक्रिया
पठाउनुहोस्
×