खेविस अध्यक्ष नहटाउन अदालतको आदेश- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

खेविस अध्यक्ष नहटाउन अदालतको आदेश

कान्तिपुर संवाददाता

पोखरा — उच्च अदालत पोखराले गण्डकी प्रदेश सरकारको युवा तथा खेलकुद मन्त्रालयलाई गत चैत २४ को मन्त्रिपरिषद् बैठकले जिल्ला खेलकुद विकास समितिका अध्यक्ष हटाउने निर्णय कार्यान्वयन नगरी यथास्थितिमा राख्न अल्पकालीन अन्तरिम आदेश दिएको छ । बदनियत र गैरकानुनी रूपमा अध्यक्ष पदबाट हटाइएको भन्दै ५ जिल्लाका खेलकुद विकास समितिका अध्यक्षले दायर गरेको रिट निवेदनमा अदालतले उक्त आदेश दिएको हो ।

न्यायाधीश श्रीधराकुमारी पुडासैनीको एकल इजलासले शुक्रबार निवेदकको निवेदन मागअनुसार आदेश जारी हुनु नपर्ने भए आधार, कारण र प्रमाणसहित १५ दिनभित्र मुख्य न्यायाधिवक्ताको कार्यालय गण्डकी प्रदेशमा लिखित जवाफ पेस गर्न भनेको छ । साथै अन्तरिम आदेश जारी हुने नहुने सन्दर्भमा विषयवस्तुको संवेदनशीलता एवं गाम्भीर्यताका कारण दुवै पक्षको कुरा सुनी निष्कर्षमा पुग्न उपयुक्त हुने भन्दै जेठ १० मा दुवै पक्षलाई छलफलमा बोलाएको छ ।

यसअघिको पृथ्वीसुब्बा गुरुङ मुख्यमन्त्री रहेको सरकारले २०७७ फागुन ९ को निर्णयअनुसार प्रदेशका विभिन्न जिल्लामा जिल्ला खेलकुद बिकास समितिको अध्यक्ष मनोनयन गरेको थियो । अहिलेको प्रदेश सरकारले सबै जिल्लाका अध्यक्षलाई चित्तबुझ्दो काम नगरेको भन्दै गत चैत ४ मा स्पष्टीकरण सोधेको थियो । चैत २४ को प्रदेश मन्त्रिपरिषद्को बैठकले हटाउने निर्णय गरेको भन्दै वैशाख ९ मा पत्र थमाइएको थियो । त्यसविरुद्ध विभिन्न ५ जिल्लाका अध्यक्षले बिहीबारमात्रै उच्च अदालतमा उत्प्रेषणयुक्त परामादेश मुद्दामा रिट दायर गरेका थिए ।


प्रकाशित : जेष्ठ ७, २०७९ ००:१४
प्रतिक्रिया
पठाउनुहोस्

युगान्डामाथि पहिलो विजय

विनोद पाण्डे

काठमाडौँ — ‘डेब्यु’ गरिरहेकी हिरनमायी रोयले सानदार बलिङ प्रदर्शन गरेपछि नेपाली महिला क्रिकेट टोलीले युगान्डासँगको ट्वान्टी–२० अन्तर्राष्ट्रिय शृंखलामा पहिलो विजय हात पारेको छ । पहिलो तीन खेल नै हारेर शृंखला गुमाइसकेको नेपालले शुक्रबार चौथो खेलमा युगान्डामाथि १५ रनको विजय हात पारेको छ । 

अघिल्लो दिनको वर्षाले मैदान भिजेको कारण १८–१८ ओभरमा छोट्याइएको खेलमा टस जितेको नेपाल १७.५ ओभर खेली ९७ रनमा अलआउट भयो । जबाफमा आएको युगान्डाले निर्धारित ओभर खेल्दै ८ विकेट गुमाई ८२ रनमात्र बनाउन सक्यो ।

नेपालबाट ओपनर ज्योती पाण्डेले सर्वाधिक १७ रन बनाए । उनले १३ बल खेली ४ चौका प्रहार गरिन् । अर्का ओपनर विन्दु रावलले ३५ बल खेली १६ र सीता रानामगरले ११ रन बनाए । उपकप्तान इन्दु बर्मा १, सरिता मगर २, कप्तान रुविना क्षेत्री १, अप्सरी बेगम ४, डली भट्ट र अस्मिना कर्माचार्यले समान ६–६ रन बनाए । कविता कुँवर ६ रनमा अविजित रहिन् ।


युगान्डाकी कप्तान कोन्की अवेकोले ४ ओभरमा १३ रन खर्चेर ३ विकेट लिइन् । त्यस्तै सराह अकिटेङले ४ ओभरमा १ मेडन राख्दै १० रन खर्चेर २ तथा फिओना कुलुमे र जेनेट एमबाबाजीले १–१ विकेट लिए ।

१५ वर्षे लेग स्पिनर हिरनमायीले ३ ओभरमा ११ रनमात्र खर्चेर २ विकेट लिएपछि युगान्डा विजय गति रोकिएको थियो । उनलाई अन्तर्राष्ट्रिय क्रिकेट परिषद् (आईसीसी) की वितिय एवंम अप्रेसन अफिसर नितिशा कोठारीले प्लेयर अफ द म्याचको पुरस्कार प्रदान गरिन् । कविता कुँवर, अस्मिना र रुविनाले १–१ विकेट लिइन् ।

युगान्डाबाट सर्वाधिक २१ रन बनाएकी जेनेटलार्य हिरनमायीले बोल्ड गरेकी थिइन् । रिता नयनगेन्डो र इभेलिन एनिइपोले १६–१६ तथा केभिन अविनोले ११ रन बनाइन् । पाँचौं तथा अन्तिम खेल शनिबार हुनेछ ।


प्रकाशित : जेष्ठ ६, २०७९ २३:३१
पूरा पढ्नुहोस्
प्रतिक्रिया
पठाउनुहोस्
×