सूर्य नेपाल प्रिमियर आइतबारदेखि- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

सूर्य नेपाल प्रिमियर आइतबारदेखि

कान्तिपुर संवाददाता

काठमाडौँ — सूर्य नेपाल प्रिमियर गल्फ च्याम्पियनसिप आइतबार सुरु हुँदै छ । सूर्य नेपाल गल्फ टुर २०२१–२२ को अन्तिम प्रतियोगिता यो शुक्रबारसम्म चल्नेछ । गोकर्ण गल्फ क्लबमा हुने प्रतियोगिता ७२ होलमा खेलिने छ । दुई चरणपछि ३६ होलमा कट हुनेछ । शीर्ष २१ मात्र अन्तिम ३६ होलका लागि छानिनेछन् । 

सूर्य नेपाल गल्फ टुरको सबैभन्दा बढी पुरस्कार राशिको प्रतियोगिता विजेताले २ लाख ५० हजार रुपैयाँ पाउनेछन् । उपविजेताले १ लाख ५५ हजार, तेस्रो हुनेले १ लाख ११ हजार, चौथो हुनेले ९५ हजार, पाँचौं हुनेले ८७ हजार पाउनेछन् । शीर्ष २१ को नाममा पुरस्कार रहने छ । १४ लाख ६१ हजार पुरस्कार राशि रहेको छ ।

१२ एमेच्योर खेलाडीले व्यावसायिक खेलाडीमाथि दबाब तेर्स्याउने छन् । सूर्य नेपाल गल्फ टुरको शीर्षस्थानमा रहेका भुवन नगरकोटी, जयराम श्रेष्ठ र पीजीटीआईमा खेलिरहेका शुक्रबहादुर राई व्यावसायिकतर्फका दाबेदार हुन् । एमेच्योरतर्फ १३ औं सागका दोहोरो स्वर्ण विजेता सुवास तामाङ पनि प्रतियोगिताको मुख्य दाबेदार हुन् ।

एमेच्योरका सद्भाव आचार्य, टासी छिरिङ, वाङचेन ढोन्डुपबीच मुख्य प्रतिस्पर्धा हुने देखिन्छ । प्रोएम प्रतिस्पर्धा आइतबार हुनेछ । त्यसमा व्यावसायिक र एमेच्योर गरी १ सय जनाले खेल्नेछन् । ‘जुन हिसाबले गल्फ नेपालमा अगाडि बढिरहेको छ, त्यसबाट हामी निकै उत्साही छौं,’ नेपाल प्रोफेसनल गल्फ संघका महासचिव दीपक आचार्यले भने, ‘यो खेलले नयाँ माहोल बनाइरहेको छ, सूर्य नेपाल प्रिमियर गल्फले त्यसमा ठूलो उर्जा दिएको छ ।’

प्रकाशित : जेष्ठ ६, २०७९ २३:१३
प्रतिक्रिया
पठाउनुहोस्

हेटौंडाको पहिलो महिला मेयर बनिन् मीना लामा

सुवास विडारी

मकवानपुर — चौतर्फी घेराबन्दीलाई तोड्दै हेटौंडा उपमहानगरपालिकाको मेयरमा नेकपा (एस) की नेता मीना लामा निर्वाचित भएकी छन् । जितसँगै उनी वाग्मती प्रदेशको एकमात्र उपमहानगर हेटौंडाको पहिलो महिला मेयरसमेत बनिन् । नेकपा एमाले र राप्रपाको चुनौती पन्छाउँदै लामाले पाँचवर्षका लागि शासनसत्ता आफ्नो हातमा पार्न सफल भइन् । 

चुनावी प्रचारप्रसारका क्रममा मीना लामा र राजेश बानियाँ । फाइल तस्बिर : सुवास विडारी/कान्तिपुर

लामाले २३ हजार ७५ मत ल्याएर विजयी भइन् । दोस्रो स्थानमा रहेका नेकपा एमालेका नेता अनन्तप्रसाद पौडेलले २० हजार ९ सय ८ मत ल्याए । त्यस्तै राप्रपाका दीपकबहादुर सिंहले २० हजार ५ सय ३१ मत ल्याए । लामाले पौडेललाई २ हजार १ सय ६७ मतले पराजित गरेकी हुन् ।

त्यस्तै उपमेयरमा कांग्रेसका राजेश बानिया निर्वाचित भए । उनले ३२ हजार ५ सय ९३ मत ल्याउँदा नेकपा एमालेकी सुमित्रा काफ्लेले २३ हजार ९ सय ९ मत ल्याए । राप्रपाकी इन्दिरा न्यौपानले ५ हजार ४ सय ८३ मत ल्याइन् । हेटौंडा उपमहानगरपालिकामा ७३ हजार ४ सय १४ मत खसेको थियो ।

सत्तारुढ गठबन्धनबाट मेयरको उम्मेदवार बन्नेबित्तिकै नेपाली कांग्रेस र आफ्नो पार्टीभित्रकै चरम असन्तुष्टिबीच लामा चुनावी मैदानमा होमिएकी थिइन् । टिकट नपाएको झोकमा तत्कालीन नेकपा (एस) जिल्ला अध्यक्ष श्रीधर पोखरेलले पार्टी नै परित्याग गरी नेकपा एमाले प्रवेश गरेर उनलाई असहयोग गरे । कांग्रेसका असन्तुष्ट नेताहरुले पनि लामालाई खुलेर सहयोग गरेनन् । एमालेका बलियो संगठन, गठबन्धनबाटै असहयोग भएको अवस्थामा पनि उनी दृढतापूर्वक निर्वाचन अभियानमा होमिएकी थिइन् । फलस्वरुप उनी निर्वाचित भइन्

एमालेबाट संविधानसभा सदस्य अनन्त पौडेल र राप्रपाबाट दीपकबहादुर सिंह उनीसँगै चुनावी मैदानमा थिए । एमालेको बलियो संगठन र सिंहको लोकप्रियताबीच लामालाई सत्तामा पुग्न त्यति सहज थिएन । तर, उनलाई नेकपा (एस) को नेता तथा स्वास्थ्यमन्त्री विरोध खतिवडा र नेपाली कांग्रेस वाग्मती प्रदेश सभापति इन्द्रबहादुर बानियाँको दरिलो साथ रह्यो । कांग्रेसका रुष्ट नेता तथा कार्यकर्तालाई विस्तारै फकाउँदै उनले आफ्नो पक्षमा मतदान गर्ने अवस्था सिर्जना गरिन् । उनी अघिल्लो स्थानीय तह निर्वाचनमा एमालेबाटै उपमेयरमा निर्वाचित भएकी थिइन् । एमाले विभाजन भएको अवस्थामा त्यसभित्रको कमजोरीमा खेल्दै उनले आफ्नो पक्षमा माहौल सिर्जना गरिन् ।

विशेष गरी तामाङ बाहुल्य बसोबास रहेको हेटौंडा–१२ र १३ बाट ५० प्रतिशतभन्दा बढी मत प्राप्त गर्ने वातावरण उनले आफ्नै अगुवाइमा तयारी पारिन् । बजार क्षेत्रको मत राप्रपको उम्मेदवारको पक्षमा जाँदा ग्रामीण भेगको मत लामाको पक्षमा आउनु पनि उनले चुनाव जित्ने एउटा आधार हो । एमाले बलियो भएको वडामा सत्तारुढ गठबन्धनले एकता गर्दै जनमतलाई आफ्नो पक्षमा तान्दा लामालाई थप सहज भयो । ‘सुन्दर र स्मार्ट’ हेटौंडा बनाउने नारा दिएकी लामालाई महिला मतदाताले बढी रुचाएको देखिन्छ । उपमेयर हुँदा महिलाका क्षेत्रमा उनले गरेको कार्यका कारण पनि अहिलेको अवस्थामा पुग्ने आधार तयार भएको हो ।

२०३३ साल पुस २७ गते हेटौंडा–११ नवलपुरमा जन्मिएकी लामाले २०४६ सालबाट राजनीतिमा प्रवेश गरेकी थिइन् । उनले समाजशास्त्रमा एमए गरेकी छन् । २०७१ सालमा तत्कालीन एमाले मकवानपुरको उपसचिव र विद्यार्थी इञ्चार्ज भई काम गरेकी लामा २०७१ सालमै अखिल नेपाल महिला संघको जिल्ला सचिव भएकी थिइन् । २०७२ सालमा नेपाल लोकतान्त्रिक आदिवासी जनजाति महासंघको केन्द्रीय सदस्य भएकी लामासँग आदिवासी जनजाति जिल्ला समन्वय समिति मकवानपुरको उपाध्यक्ष भएर काम गरेको अनुभवसमेत छ ।

प्रकाशित : जेष्ठ ६, २०७९ २३:११
पूरा पढ्नुहोस्
प्रतिक्रिया
पठाउनुहोस्
×