अब नेपाल टी–२० लिगमात्रै- खेलकुद - कान्तिपुर समाचार

अब नेपाल टी–२० लिगमात्रै

‘देशमा अब एउटै लिग हुन्छ, अरु कुनै लिग हुँदैन । क्यानले अरु कुनै लिगलाई मान्यता दिएको छैन ।’ 
विनोद पाण्डे

काठमाडौँ — नेपाल क्रिकेट संघ (क्यान) को आफ्नै आयोजनामा नेपाल टी–२० लिग क्रिकेट हुने भएको छ । आधिकारिक लिग प्रतियोगिता असोजमा हुने बुधबार घोषणा गरिएको हो । विगतमा निजी क्षेत्रबाट लिग हुँदै आए पनि अहिले नेपाली क्रिकेटको सर्वोच्च निकायले नै ट्वान्टी–२० लिग गर्ने निर्णय गरेको हो ।

क्यानका अध्यक्ष चतुरबहादुर चन्दले असोज ८ देखि कात्तिक ५ (सेप्टेम्बर २४ देखि अक्टोबर २२) सम्म प्रतियोगिता गरिने जानकारी गराए । घोषित मितिअनुसार २८ दिने प्रतियोगिताको बीचमा नेपालीको महान चाड दसैं पर्नेछ । उनका अनुसार ६ फ्रेन्चाइज टोलीले प्रतिस्पर्धा गर्नेछन् । सबै खेल कीर्तिपुरस्थित त्रिवि क्रिकेट मैदानमा हुनेछ । जहाँ होम एन्ड अवेका झल्को दिँदै प्रतियोगिता गरिने क्यानका कार्यबाहक सचिव प्रशान्तविक्रम मल्लले बताए । अर्को वर्षदेखि ८ टोली पुर्‍याइने क्यानको लक्ष्य छ ।

‘नेपाल क्रिकेट निलम्बनमा भएका बेला विगतमा आईसीसीले विभिन्न लिग आयोजना गर्न दिएको र अहिले क्यान आएपछि देशमा अब एउटामात्र क्रिकेट लिग हुनेछ । आईसीसीले पनि एउटा देशमा एकमात्र लिग आयोजना गर्न दिन्छ,’ अध्यक्ष चन्दले नेपाल टी–२० लिग घोषणा गर्दै भने ।

प्रतियोगिताका लागि सन् २०२० को जनवरी ९ मा भारतीय कम्पनी सेभेन थ्री स्पोर्ट्ससँग सम्झौता पत्रमा हस्ताक्षर गरेको थियो । तर, कोभिड–१९ कारण प्रतियोगिता हुन नसकेको चन्द बताउँछन् । उनका अनुसार सेभेन थ्री स्पोर्टस नेपाल ट्वान्टी–२० लिगको कमर्सियल एन्ड स्ट्रेजेटिक साझेदार हुनेछ । त्यसवापत सेभेन थ्रीले ८ वर्षको ३३ करोड रुपैयाँ शुल्क तिर्नेछ । त्यसअनुसार वार्षिक ४ करोड १२ लाख ५० हजार क्यानले पाउने छ । सेभेन थ्रीले त्यसबाहेक मैदानको स्तरोन्नति पनि गरिदिने चन्दले बताए ।

सम्झौता भएपछि १५ प्रतिशत रकम क्यानको खातामा सेभेन थ्रीबाट दाखिला भइसकेको, अर्को १५ प्रतिशत त्यसको ४५ दिनपछि र बाँकी ७० प्रतिशत प्रतियोगिता सुरु हुने अघिल्लो दिनसम्म दाखिला गरिसक्नुपर्ने प्रावधान रहेको सचिव मल्लले जनाए । ‘क्यानको साधारणसभाबाट नेपाल टी–२० लिग आयोजना दुई पटक सर्वसम्मत पारित भएर आज यो स्थितिमा आएका छौं,’ उनले भने । नेपाल सरकारसँग स्वीकृति लिएर क्यानले नेपाल टी–२० लिग आयोजना गर्न लागेको हो । क्यान र सेभेन थ्री स्पोर्टसबीचको सम्झौतामै सरकारको अनुमति राखिएको थियो ।

घोषणा कार्यक्रममा युवा तथा खेलकुदमन्त्री महेश्वरजंग गहतराजले सरकार नेपाल टी–२० लिगलाई सबैखाले सहयोग गर्न तयार रहेको जनाए ।

खेलाडी पारिश्रमिक ५ देखि १५ लाख

अक्सन र त्यसको मोडालिटीबारे हाल तय नभए पनि खेलाडीले नेपाल टी–२० लिग खेलेर पाउने पारिश्रमिक तय भइसकेको अध्यक्ष चन्दले सुनाए । त्यसअनुसार प्रतियोगिता खेल्ने नेपाली खेलाडीलाई समूह ‘ए’, ‘बी’ र ‘सी’ समूहमा वर्गीकरण गरिने छ ।

समूह ‘ए’ का खेलाडीले न्युनतम १५ लाख, समूह ‘बी’ का खेलाडीले न्युनतम १० र समूह ‘सी’ का खेलाडीले न्युनतम ५ लाख रुपैयाँ पाउने अध्यक्ष चन्द बताउँछन् । धनगढीमा सम्पन्न अघिल्लो साधारणसभामा नेपाल टी–२० लिग खेलेर न्युनतम ५ लाख पाउने घोषणा आफूले गरेको र त्यहीअनुरुप सेभेन थ्री स्पोर्टससँग खेलाडीको पारिश्रमिकका लागि वर्गीकरण गरिएको चन्दले बताए ।

‘नेपाली खेलाडीको भविष्य निर्धारण गर्ने र दर्जनौं खेलाडीलाई आर्थिक हैसियत उकास्न नेपाल टी–२० लिग गर्न लागेका हौं, दुई वर्षको प्रयासपछि आज हामी यो प्रतियोगिताको घोषणा गर्न गइरहेका छौं,’ चन्दले भने, ‘नेपाल टी–२० लिगले नेपालमा क्रिकेट विकासमात्र होइन क्यान पनि आर्थिक रूपमा बलियो हुनेछ । यो नेपाली खेलाडीको टेक्ने आधार बन्ने छ । व्यावसायिक र पर्यटकीय हिसाबमा पनि फड्को मार्ने विश्वास क्यानको छ ।’

नेपालको पहिलो आधिकारिक ट्वान्टी–२० लिगलाई लिएर आफूहरू उत्साहित रहेको जनाउँदै राष्ट्रिय टोलीका कप्तान सन्दीप लामिछानेले भने, ‘नेपाल टी–२० लिगले खेलाडीको व्यावसायिक स्किल बढाउन मदत गर्नुका साथै खेलाडीलाई चाहिएको अनुभव दिलाउने छ । नेपाली क्रिकेटका लागि यो कोसेढुंगा पनि हो ।’

यद्यपि विना टेन्डर क्यानले सेभेन थ्री स्पोर्ट्सलाई व्यावसायिक तथा रणनीतिक साझेदार बनाएको छ । सचिव मल्लले भने विना टेन्डर अधिकार दिने क्यानको प्रक्रियाबारे रक्षा गरे । ‘संसारको परिपाटी हेर्नुभयो भने पनि कमर्सियल पार्टनर भित्र्याउदा टेन्डर गरेको हुँदैन । यो नेपाल क्रिकेट संघको आफ्नो सम्पत्ति हो । क्रिकेट लिगका लागि विभिन्न मान्छेहरू प्रस्ताव लिएर आए । सबैभन्दा राम्रो र आकर्षक प्रस्ताव सेभेन थ्री स्पोर्ट्सबाटै आयो । त्यसलाई हामीले आफ्नो हिसाबमा निर्णय गर्ने हो । सर्वोच्च निकाय क्यानको साधारणसभा हो, त्यसले नै पास गरेको छ ।’

उनले थपे, ‘हरेक देशमा त्यस देशको बोर्डले जसरी गरेको छ, क्यानले पनि त्यसैगरी कमर्सियल साझेदार खोजेको हो । हामीले ३३ करोड रुपैयाँको सम्झौता गरेका छौं । टेन्डर आह्वान गर्दा १५ करोडभन्दा बढी नआएको भए के हुन्थ्यो ? १८ करोड घाटा कसले बेहोर्थ्यो ? त्यो स्थिति पनि हेर्नुपर्ने हुन्छ । आजको क्रिकेटको स्तर जुन छ, त्यो हेरेर हामीले मूल्यांकन गर्‍यौं, हाम्रो क्रिकेटमा आउने पैसा र यो पैसाको मूल्यांकन गर्दा यो राम्रो रकम हो भनेर साधारणसभा लगेर पास गरेका हौं । यो रातारात भएको होइन । दुई वर्षको अवधिमा हरेक पाटो केलाएका छौं । हामी भ्रष्टाचारको पाटोमा अवगत छौं ।’

पछिल्ला वर्षहरू एभरेस्ट प्रिमियर लिग प्रालिले काठमाडौंमा एभरेस्ट प्रिमियर लिग (ईपीएल) तथा क्विन्स इभेन्टले पोखरामा पोखरा प्रिमियर लिग र धनगढी क्रिकेट एकेडेमीले धनगढीमा धनगढी प्रिमियर लिग आयोजना गर्दै आएका थिए ।

एभरेस्ट लिगले नोभेम्बर १२ देखि २६ मा ईपीएलको नयाँ मिति घोषणा गरिसकेको छ । सचिव मल्ल भन्छन्, ‘देशमा अब एउटै लिग हुन्छ, अरू कुनै लिग हुँदैन । क्यानले अरू कुनै लिगलाई मान्यता दिएको छैन ।’

सेभेन थ्री स्पोर्ट्स बेटिङ कम्पनी भएको आरोप पनि लागेको थियो । तर कम्पनीका संस्थापक जतिन अहुलावालियाले आफ्नो कम्पनी कुनै बेटिङ कम्पनी नभएको बताए । ‘हामी आईपीएल प्रसारण अधिकार, फिफा विश्वकप फुटबल प्रसारण अधिकार, बुन्डेसलिगा, फ्रेन्च ओपन, युएस ओपन, विम्बल्डन टेनिसको नेपाललगायत देशमा प्रसारण अधिकारको कार्य गर्दै आएका छौं र खेलकुदका यी ठूला इभेन्ट्समा भ्रष्टाचारविरुद्धको शून्य सहनशीलता अपनाइएको हुन्छ र नेपाल टी–२० लिगमा पनि त्यसैलाई निरन्तरता दिन्छौं,’ उनले भने, ‘हामी नेपाली क्रिकेट विकासका लागि आएका छौं ।’

प्रकाशित : जेष्ठ ५, २०७९ ०६:१०
प्रतिक्रिया
पठाउनुहोस्

कप्तानै परिवर्तन गरेको भए अझ राम्रो : सीता

नेपालले सन् २००७ मा अन्तर्राष्ट्रिय प्रतियोगिता खेलेयता सीताले निरन्तर राष्ट्रिय टोलीबाट खेल्दै आएकी छन् 
विनोद पाण्डे

काठमाडौँ — सीता रानामगरले आफूलाई उपकप्तानबाट हटाइएकोमा कुनै गुनासो नरहे पनि कप्तान परिवर्तन नै गरेको भए त्यसले नेपाली महिला क्रिकेटलाई फाइदा गर्ने बताएकी छन् । सीता यूएईमा फेयर ब्रेक इन्भिटेसन प्रतियोगिता खेलिरहेको समयमा आइतबार नेपाल क्रिकेट संघ (क्यान) ले उनको स्थानमा इन्दु बर्मालाई उपकप्तान बनाएको थियो । 

सीता सोमबार मात्र दुबईबाट फर्केकी हुन् । युगान्डासँगको दोस्रो ट्वान्टी–२० खेलका लागि उनी मंगलबार नेपाली टोलीमा मिसिएकी थिइन् । ‘भविष्य सोचेर क्यानले उपकप्तान परिवर्तन गरेको होला । मैले पनि मिडियाबाटै थाहा पाएकी हुँ, नत्र केही थाहा थिएन । म फेयर ब्रेकमा फाइनल खेल्न जाँदै गर्दा अरूबाट थाहा पाएको हुँ,’ युगान्डासँग दोस्रो खेलमा पनि नेपाल पराजित भएपछि सीताले भनिन्, ‘अझ अर्को एउटा युवा खेलाडीलाई मौका दिएर कप्तान र उपकप्तान नै परिवर्तन गरेको भए अझै राम्रो हुन्थ्यो होला । घरेलु मैदानमा शृंखला खेलिरहेकाले भविष्यलाई अझ राम्रो हुन्थ्यो ।’

नेपालले सन् २००७ मा अन्तर्राष्ट्रिय प्रतियोगिता खेलेयता सीताले निरन्तर राष्ट्रिय टोलीबाट खेल्दै आएकी छन् । सन् २००९ मा नेपाली टोलीमा आएकी रुबिना क्षेत्री त्यसको तीन वर्षपछि कप्तान बनेकी थिइन् । सीता २०१६ यता उपकप्तान रहेकी छन् । उनले आफूले कप्तानी पद कहिल्यै आस नगरेको जनाइन् ।

‘मलाई पनि कुनै दिन कप्तान हुन्छु कि जस्तो लाग्थ्यो, तर म भन्दा क्यान नै शक्तिशाली भइसकेपछि मैले संस्थाको निर्णय मान्नैपर्छ । त्यसमा म खुसी पनि छु,’ सीताले सुनाइन्, ‘एउटा सिनियर खेलाडीका रूपमा म खेलिरहेकी छु, एपीएफबाट मैले नेतृत्व गरेर राम्रो नतिजा पनि दिइरहेकी छु । कम्तीमा एपीएफमा मेरो कदर भइरहेको छ, त्यहाँ म सुरक्षित छु ।’

सीताले फेयर ब्रेकमा टर्नेडोजलाई उपाधि दिलाउनेक्रममा सबै ७ खेल खेल्दै ४ विकेट लिएकी थिइन्, जसका कारण उनलाई प्रतियोगिताको ‘सेलेक्टेड’ टिममा पनि छनोट गरिएको थियो । सोही क्रममा सीताले विकेट लिँदा खुसीमा ‘पुष्पा’ र ‘स्यालुट’ सेलिब्रेसन चर्चाको विषय बनेको थियो । त्यसलाई नेपाली पुरुष टिमले गरेको विद्रोहपछि खेलाडीले गरेको सेलिब्रेसनसँग जोडिएर हेरिएको थियो ।

सीताले त्यो पक्ष अस्वीकार गरे पनि आफूलाई कुनै डर नभएको जनाइन् । युगान्डासँग मंगलबार सीताले ‘पुष्पा’ शैली सेलिब्रेसनलाई निरन्तरता दिँदै आफ्नो जर्सी पछाडिको नाम देखाएर विकेटको खुसी साटिन् ।

‘उपकप्तानबाट हट्नुअघि नै मैले यो सेलिब्रेसन गरेकी हुँ,’ सीताले पुरुष खेलाडीको विद्रोहसँग पुष्पा शैलीको सेलिब्रेसन तुलना गर्दै भनिन्, ‘एउटा खेलाडीको रूपमा मैले पनि केही महसुस गरेको छु । त्यसैले म चाहिँ झुक्दिनँ । एउटा खेलाडीको रूपमा म अपग्रेड भइराख्छु । कसैसँग झुक्दिनँ भनेर नै मैले त्यस्तो सेलिब्रेसन गरेको थिएँ ।’

सीताले नोभेम्बरमा कतार भ्रमण र त्यसलगत्तै यूएईमा भएको विश्वकप एसिया छनोटदेखि नै क्यानले आफ्नो भूमिका स्पष्ट नपारेकाले नेपाली टोलीको सबैभन्दा वरिष्ठ सदस्य भए पनि टोलीको नेतृत्वमा कुनै अपेक्षा नराखेको जनाइन् ।

‘आफूलाई कप्तान बनाउँछ भनेर म अपेक्षा गर्दिनँ । यसभन्दा अघिको भ्रमणमा म उपकप्तान थिएँ कि थिइनँ भनेर निश्चित थिएन । यसअघि उपकप्तान भनेर क्यानको विज्ञप्तिमा केही जनाइएको थिएन । विश्वकप एसिया छनोटमै मेरो भूमिका स्पष्ट गरेको थिएन क्यानले, त्यही भएर खासै दुःख लागेको थिएन,’ सीताले गुनासो पोखिन्, ‘मिडियातिर सबै आइसकेको २४ घन्टापछि तिम्रो स्थानमा उपकप्तान अरू नै राख्दै छौं भनेर भनियो, त्यसमा अलिकति नराम्रो लाग्यो । खेलाडीबाट व्यावसायिकता खोजिन्छ भने उताबाट (क्यान) पनि व्यावसायिक हिसाबमा सबै आउनुपर्‍यो । इन्दु पनि मेरै बहिनी हो, उसले पनि मौका पाउनुपर्छ । म त भन्छु अझै अपग्रेड गरेर ऊ कप्तानमै आउनुपर्छ ।’

उपकप्तान नभएको आधिकारिक जानकारी पाएकामा आफू झनै खुसी भएको उनले सुनाइन् । टोलीमा कुनै ग्रुपिजम नरहेको दाबी गर्दै उनले भनिन्, ‘ग्रुपिजम हरेक ठाउँमा छ, नेपाली महिला टोलीमा पनि छ नै भनेर भन्न मिल्दैन । किनभने एउटा टिमबाट खेलिसकेपछि जितका लागि खेल्ने हो । एउटा ग्रुपले मात्र जित्ने होइन, अर्को ग्रुपले मात्र जित्ने होइन । जित्यो भने हामी १४ जनाले नै जित्ने हौं । बाहिर जतिसुकै भने टिममा ग्रुपिजम चाहिँ छैन ।’

प्रकाशित : जेष्ठ ४, २०७९ १३:१३
पूरा पढ्नुहोस्
प्रतिक्रिया
पठाउनुहोस्
×