युगान्डासँग नेपालको दोस्रो हार- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

युगान्डासँग नेपालको दोस्रो हार

विनोद पाण्डे

काठमाडौँ — युगान्डाले नेपाली महिला क्रिकेट टोलीलाई दोस्रो ट्वान्टी-२० अन्तर्राष्ट्रिय खेलमा १ विकेटले पराजित गरेको छ । युगान्डाले १ सय २ रनको लक्ष्य १ बल अगाडि पूरा गरेको थियो ।

तस्बिर : केशव थापा

२ बलमा विजयका लागि १ रन बनाउनु पर्ने अवस्थामा कविता कुँवरको बलमा सराह एकिटेङले विजयी रन प्रहार गरेकी थिइन् । रिता मुसामालीले ३४ बलमा ३ चौका प्रहार गरी ३० रन प्रहार गरे । फ्रान्क्लिन नाजुम्बाले १९ र जेनेट एमबाबाजी १६ रन बनाए ।

नेपालबाट कविता कुँवर र सबनम राईले २–२ तथा कप्तान रुविना क्षेत्री र सीता रानामगरले १–१ विकेट लिए । युगान्डाले टस जितेपछि ब्याटिङमा आएको नेपालले निर्धारित २० ओभरमा ७ विकेट गुमाई १ सय १ रनमात्र बनाउन सकेको थियो ।

अघिल्लो दिन युगान्डाले नेपाललाई १२ रनले स्तब्ध पार्दै पाँच खेलको शृंखलामा अग्रता लिएको थियो । मंगलबार पनि नेपालको प्रदर्शनमा कुनै सुधार आएन र टोलीले युगान्डालाई सानो लक्ष्यमात्र दिन सक्यो । नेपालले पावर प्लेमा १ विकेट गुमाई १७ रनमात्र बनाउन सकेको थियो । नेपालले पहिलो ६ ओभरमा कुनै चौका प्रहार गर्न सकेको थिएन् । जबकी युगान्डाले ६ ओभरमा ३६ रन जोडेको थियो ।

नेपालले पहिलो ५० रन पूरा गर्न १२ ओभर लागेको थियो । जबकी युगान्डाले आठौं ओभरमै ५० रन पूरा गरेको थियो । नयाँ प्रयोग गर्दै नेपालले उपकप्तान इन्दु बर्मालाई विन्दु रावलसँगैं ओपनिङमा पठाएको थियो । त्यो निर्णय घात हुन पुग्यो । इन्दु १३ बलमा ५ रन बनाई आउट भए । अप्सरी बेगम पनि ३ रनमै आउट भए ।

विन्दुले २६ रन बनाइन् । उनले ३६ बल खेल्दै २ चौका प्रहार गरिन् । यूएईमा फेयर ब्रेक खेलेर अघिल्लो दिन आएकी सीता रानामगर ६ रनमा रनआउट भइन भने कविता जोशीले खाता खोल्न सकिनन् । सरिता मगरले २७ बलमा २ चौका प्रहार गर्दै २२ रन बनाइन् ।

कप्तान रुविना क्षेत्री इनिङ्सको अन्तिम बलमा आउट हुनु पूर्व १५ बलमा २ चौका प्रहार गर्दै १७ रन बनाइन् । डली थापा १ छक्का प्रहार गर्दै ७ बलमा ९ रन बनाई अविजित रहिन् । रुविना र डलीले अन्तिम ओभरमा १५ रन जोडेपछि नेपालको स्कोर हेर्न लायक बनेको थियो ।

युगान्डाकी जेनेट एमबाबाजीले ४ ओभरमा २६ रन खर्चेर २ विकेट लिइन् । इभ्लिन एनिइपो, कप्तान कोन्की अवेको र रिता मुसामालीले १–१ विकेट लिइन् ।

प्रकाशित : जेष्ठ ३, २०७९ १६:३५
प्रतिक्रिया
पठाउनुहोस्

बाजुराको बडिमालिका नगरपालिकामा एमाले विजयी

अर्जुन शाह

बाजुरा — बाजुराको बडिमालिका नगरपालिकाको मेयरमा एमालेका उम्मेदवार अमरबहादुर खड्का र उपमेयरमा नन्दाकुमारी थापा विजयी भएका छन् । 

एमाले उम्मेदवार खड्काले कांग्रेस उम्मेदवार धनराज पण्डितभन्दा ४६७ मत बढी ल्याएर जितेका छन् । खड्काले ४ हजार १९ मत पाएका छन् भने पण्डितले ३ हजार ५ सय ५२ मत पाए । यस्तै उपमेयरमा एमाले उम्मेदवार थापाले कांग्रेस उम्मेदवार राधिका कुमारी शाही (सिंह) भन्दा ८८२ मत बढी ल्याएर विजयी भएकी हुन् ।

थापाले ४ हजार २३३ मत प्राप्त गरिन् भने शाहीले ३ हजार ३५१ मत पाइन् । उप प्रमुखमा विजयी थापा नेपाल पत्रकार महासंघ बाजुरा शाखाको सचिव र प्रेस चौतारी जिल्ला शाखा अध्यक्षको पदबाट राजीनामा दिएर एमालेबाट उपमेयरमा उम्मेदवार बनेकी थिइन् ।

९ वटा वडा रहेको बाजुरा सदरमुकामस्थित बडिमालिका नगरपालिकामा एमालेले ७ वटा वडामा जित हात पारेको छ भने २ वटा वडामा कांग्रेसले जितेको छ । २, ३, ५, ६, ७,८, ९ नम्बर वडा एमालले जितेको छ भने कांग्रेसले वडा नम्बर १ र ४ जितेको छ ।

प्रकाशित : जेष्ठ ३, २०७९ १६:३३
पूरा पढ्नुहोस्
प्रतिक्रिया
पठाउनुहोस्
×