नेपालले जिम्बावे 'ए' लाई ९ विकेटले हरायो - खेलकुद - कान्तिपुर समाचार

नेपालले जिम्बावे 'ए' लाई ९ विकेटले हरायो 

कान्तिपुर संवाददाता

काठमाडौँ — नेपालले दोस्रो एकदिवसीय खेलमा जिम्बावे ‘ए’लाई ९ विकेटले हराएको छ ।  जिम्बावे 'ए' ले दिएको ८८ रनको लक्ष्य नेपालले ११.२ ओभरमा १ विकेट गुमाउँदै पूरा गरेको  हो । 

नेपालका लागि सुनील धमलाले ३८ रन बनाएर आउट भए भने आसिफ शेखले नटआउट रहँदै ३४ रन बनाए । धमलालाई ब्रान्डन माभुटाले आउट गराएका थिए ।

यसअघि टस हारेर पहिले ब्याटिङ गरेको जिम्बावे सस्तैमा समेटिएको थियो । जिम्बावे ३१.५ ओभरमा ८७ रन मात्र बनाएर अलआउट भएको थियो । उसका लागि जोनाथन क्याम्पबेलले २७ र ब्राड इभान्सले २० रन बनाए । त्यस्तै सेफास झुवाओले १० रन बनाउँदा अन्य ब्याट्सम्यानले दोहोरो अंकमा रन बनाउन सकेनन् ।

नेपालका लागि करण केसी र सोमपाल कामीले ३/३ विकेट लिए । त्यस्तै कप्तान सन्दीप लामिछानेले २ विकेट लिँदा सागर ढकालले १ विकेट लिए । यसअघि शुक्रबारको पहिलो एकदिवसीय खेलमा नेपाल जिम्बावेसँग ३ विकेटले हराएको थियो ।

जिम्बावेको 'ए' टिम नेपालमा तीन ट्वान्टी-२० र तीन एकदिवसीय शृंखला खेल्न आएको हो । तीन ट्वान्टी-२० शृंखलामा जिम्बावेले पहिलो खेलमा नेपाललाई ६ विकेटले हराएको थियो । त्यस्तै दोस्रो खेल वर्षाका कारण रद्द गरिएको थियो । तेस्रो खेलमा भने नेपालले जिम्बावे 'ए' लाई ८ विकेटले हराएको थियो ।

जिम्बावेको कुनै पनि टोली नेपालमा आएर पहिलो पटक खेलिरहेको छ । टोनी मुनिओङ्गाको कप्तानीमा रहेको जिम्बावे ‘ए’ को प्रशिक्षकमा पूर्व टेस्ट खेलाडी डगलस होन्डो रहेका छन् ।

प्रकाशित : वैशाख २४, २०७९ १३:४८
प्रतिक्रिया
पठाउनुहोस्

गठबन्धन राष्ट्रिय आवश्यकता हो : देउवा

'कांग्रेस नेतृत्वको गठबन्धनको सरकारले मात्रै सुकुम्बासी, गरिबी लगायतको समस्या समाधान गर्छ'
अमृता अनमोल

बुटवल — प्रधानमन्त्री तथा नेपाली कांग्रेसका सभापति शेरबहादुर देउवाले गठबन्धनको जनलहरलाई देखेर विपक्षी दलहरु आत्तिएको बताएका छन् ।बुटवलमा शनिबार चुनावी सभालाई सम्बोधन गर्दै उनले गठबन्धनको तागतबाट डराएकाहरुले विभिन्न भ्रम छरेको बताउँदै त्यस्तो भ्रमका पछाडि नलाग्न आग्रह गरे ।

‘कांग्रेस नेतृत्वको गठबन्धनको सरकारले मात्रै सुकुम्बासी, अव्यवस्थित बसोबास, गरिबीलगायतको समस्या समाधान गर्छ,’ उनले भने, ‘र, तपाईंको ठाउँमा एमालेले यतिका वर्ष जितेर केही गरेन ।’ उनले विपन्न र सुकुम्बासीहरु सधैं भोट बैंक हुने कि आफ्नो समस्या सधैंका लागि समाधान गर्न आफ्नो भोट प्रयोग गर्ने भन्नेबारे सोच्नुपर्ने बताए ।

सभापति देउवाले कांग्रेसलगायत गठबन्धनका नेता कार्यकर्तालाई हौसला दिन र विकासको प्रतिबद्धता जनाउन आफू बुटवल आएको बताए । गठबन्धनले जिते ५ वर्षमा देखिनेगरी विकास गर्ने उनले जनाए । उनले आफ्नो ठाउँ र देशको विकास र सुशासनका लागि पनि गठबन्धनलाई भोट दिन आग्रह गरे । ‘गठबन्धन संविधान र लोकतन्त्रको संरक्षणका लागि बनेको हो । विकास र निकासको राष्ट्रिय आवश्यकता हो,’ उनले भने, ‘त्यसैले यसपालि गठबन्धनका सबै उम्मेदवारलाई जिताउनुस् ।’

प्रधानमन्त्री देउवाले मुलुकको आर्थिक विकासका लागि एमसीसी लगायतका सम्झौता गरेर परिवर्तनको सुरुवात गरेको बताए । ‘एमसीसी बिना ब्याजको अनुदान हो विकासको काम गर्न एमसीसी ल्याएका हौं,’ उनले भने, ‘ब्याजसहितको ऋण दिन त भिएना, कोरिया, जापानलगायत पनि तयार छन् । तर, लिन सक्दैनौं ।’

प्रकाशित : वैशाख २४, २०७९ १३:३५
पूरा पढ्नुहोस्
प्रतिक्रिया
पठाउनुहोस्
x
×