वाग्मती युवा सेमिफाइनलमा- खेलकुद - कान्तिपुर समाचार

वाग्मती युवा सेमिफाइनलमा

वाग्मती र संकटाका दुवै प्रशिक्षकलाई रातो कार्ड, वाग्मतीले फाइनल पुग्न एपीएफसँग खेल्ने
लक्ष्मी साह

बारा — सिमरा रंगशालामा जारी १२ औं जितपुरसिमरा गोल्डकप फुटबलमा मंगलबार साबिक विजेता संकटालाई १–० ले हराउँदै वाग्मती युवा क्लब सर्लाही सेमिफाइनलमा प्रवेश गरेको छ । रोमाञ्चक प्रतिस्पर्धामा वाग्मती अतिरिक्त समयमा गोल गर्दै जित निकालेको हो । छैटौं दिनको खेल रोमाञ्चक बन्यो । खचाखच दर्शक भरिएको मैदानमा जित हात पार्न दुवै टीमबीच कडा प्रतिस्पर्धा भएको थियो । 


अन्तिम क्वाटरफाइनलमा वाग्मतीले जित निकाल्दै अन्तिम चारको स्थान सुरक्षित गरेको हो । यो खेलसँगै गोल्डकपको सेमिफाइनलको समीकरण पूरा भएको छ । निर्धारित समयमा दुवै टिमले गोलरहित बराबरी खेलेपछि खेल अतिरिक्त समयमा धकेलिएको थियो । अतिरिक्त समयको २७ औं मिनेटमा वाग्मतीका अनिल रानामगरले गोल गरेका थिए । डिना गुरुङले प्रहार गरेको फ्रिकिकमा अनिलले गरेको गोल निर्णायक साबित बन्यो । वाग्मतीले अब फाइनल प्रवेशका लागि विभागीय क्लब एपीएफसँग प्रतिस्पर्धा गर्नेछ । हिमालयन शेर्पा क्लबलाई पराजित गर्दै एपीएफ यसअघि नै सेमिफाइनलमा प्रवेश गरिसकेको छ ।

वाग्मतीको तुलनामा आकर्षक खेल प्रदर्शन गरेको संकटा फिनिसिङमा चुकेको थियो । यही कारणले टोली उपाधि रक्षाका लागि फाइनल पुग्न सकेन । संकटाले खेलको सुरुआतदेखि वाग्मतीमाथि दबाब बनाएको थियो । ‘ए’ डिभिजन लिगका अनुभवी खेलाडीसहित मैदानमा उत्रिएको संकटा पहिलो हाफमा वाग्मतीलाई अवसर बनाउन दिएन ।

अधिकांश समय बल आफ्नो नियन्त्रणमा लिएको संकटाले पहिलो हाफमा बनाएको केही अवसर गुमाएको थियो । खेलको ३५ औं मिनेटमा फोडे फोफनाको क्रसमा संकटाका दीपेश आले मगरले राम्रो अवसर खेर फालेका थिए । प्रतिस्पर्धात्मक बनेको पहिलो हाफको इन्ज्युरी समयमा दुवै टोलीका प्रशिक्षकले रातो कार्ड पाएका थिए । खेलाडीबीचको विवादमा अपशब्द प्रयोग गरेको भन्दै रेफ्री प्रकाशनाथ श्रेष्ठले दुवै प्रशिक्षकलाई प्लेयर बक्सबाहिर पठाएका थिए ।

संकटा दोस्रो हाफमा पनि हाबी देखियो । खेलको ६२ औं मिनेटमा संकटाका फोफाना वान भर्सेस वानको अवस्थामा गोल गर्न चुके । उनको प्रहार पोस्टमा ठोक्किएर फर्कियो । लगत्तै यानिकले अर्को मौका गुमाए । फोफानाको क्रसबललाई उनले पोस्टको दिशा दिन सकेनन् । वाग्मतीले दोस्रो हाफमा धेरै अवसर बनाउन सकेन । खेलको ८२ औं मिनेटमा सुसन लामाले निकालेको पासमा डिना गुरुङ गोल गर्न चुकेका थिए । दबाबमा देखिएको वाग्मतीले संकटाको अग्रपंक्तिका खेलाडीलाई सफल हुन भने दिएनन् ।

निर्धारित समयमा दुवै टिमले स्कोर गर्न नसकेपछि खेलमा ३० मिनेट थपियो । अतिरिक्त समयको खेल पनि आफ्नो नियन्त्रणमा राखेको संकटाले थुप्रै अवसर गुमायो । संकटाले अवसर गुमाइरहँदा खेलको १ सय १७ औं मिनेटमा वाग्मतीले फ्रिकिक अवसरमा वाग्मतीले विजयी गोल गरेको हो ।

डिना गुरुङले प्रहार गरेको फ्रिकिक बललाई संकटाका गोलरक्षक राजाबाबु थापाले नियन्त्रणमा लिन खोज्दा रिबाउन्ड बलमा अनिलले हेडमार्फत गोल गरेका हुन् । बलियो देखिएको संकटाविरुद्ध स्कोर निकालेपछि उत्साहित वाग्मतीले अन्तिम समय सम्हालिएर खेल्दै नजिता आफ्नो पक्षमा पारेको हो । म्यान अफ द म्याच वाग्मतीका अभिषेक वाइबा घोषित भए । बुधबार एनआरटी र आयोजक नव जनजागृति युवा क्लबबीच पहिलो सेमिफाइनल खेल हुनेछ ।

प्रकाशित : चैत्र १६, २०७८ ०७:५८
प्रतिक्रिया
पठाउनुहोस्

बरोडालाई स्वर्ण

कान्तिपुर संवाददाता

काठमाडौँ — भारतको बैंक अफ बरोडाले चौथो सम्झना कप अन्तर्राष्ट्रिय टेबलटेनिस प्रतियोगिताको महिला टिम इभेन्टमा मंगलबार स्वर्ण जितेको छ ।लैनचौरस्थित राष्ट्रिय टेबलटेनिस प्रशिक्षण केन्द्रमा भएको फाइनलमा बरोडाले भारतकै अन्सुल गर्ग एकेडेमी (एजीए) लाई ३–१ गेमले हरायो । बरोडाले तीन सिंगल्समा जित हात पार्‍यो भने डबल्स स्पर्धा गुमायो ।

सिंगल्समा बरोडाकी इशाले एजीएकी फिल्जाहलाई १२–१०, १२–१०, १०–१२, १२–१० ले, गत संस्करणकी विजेता बरोडाकी ममता प्रभुले त्रिशालाई ११–९, ११–३, १०–१२, १५–१३ तथा फेरि ममताले फिल्जाहलाई ११–५, ११–७, ११–४ को सेटमा हराएका थिए । डबल्समा एजीएका फिल्जाह र त्रिशाको जोडीले बरोडाका ममता र इशाको जोडीलाई ११–५, ११–९, ६–११, ११–८ ले पन्छाउँदै सान्त्वना जित निकाले ।

पहिलो दिन पुरुष सिंगल्सका लिग चरणका खेल भए । उक्त स्पर्धामा सहभागी ८८ खेलाडीलाई १६ समूहमा विभाजन गरी खेल खेलाइएको छ । त्यसबाट १६ खेलाडीले नकआउट चरणमा स्थान बनाउने छन् । सम्झना ल्याबको प्रमुख प्रायोजन तथा स्पिन इभेन्ट प्रालिको व्यवस्थापनमा भइरहेको प्रतियोगितामा पुरुष/महिला सिंगल्स र टिम तथा भेट्रानको पुरुष ४० वर्षमाथि र ५५ वर्षमाथि गरी ६ स्पर्धामा समावेश छन् ।

सिंगल्स र टिममा शीर्ष तीन स्थान हात पार्नेले क्रमशः ५० हजार, २५ हजार र १०–१० हजार नगद पुरस्कार प्राप्त गर्नेछन् । भेट्रानतर्फ विजेताले १० हजार, उपविजेताले ५ हजार र तेस्रोले २ हजार ५ सय नगद पाउनेछन् ।

प्रतियोगितामा नेपालबाट ३ सय ४७ र भारतबाट ३८ खेलाडीको सहभागिता रहेको आयोजक ललितपुर जिल्ला टेबलटेनिस क्लबले जनाएको छ । अखिल नेपाल टेबलटेनिस संघको तत्त्वावधानमा भइहरहेको प्रतियोगिता शनिबारसम्म चल्नेछ ।

प्रकाशित : चैत्र १६, २०७८ ०७:५७
पूरा पढ्नुहोस्
प्रतिक्रिया
पठाउनुहोस्
x
×