नेपाल यूएईसँग ९९ रनले पराजित
काठमाडौँ — विश्वकप लिग २ क्रिकेटमा नेपाल यूएईसँग ९९ रनले पराजित भएको छ । २०३ रनको विजयी लक्ष्यसहित जवाफी ब्याटिङमा उत्रिएको नेपाल ३५.१ ओभरमा १०३ रनमै अलआउट भएको हो ।
नेपालका लागि ज्ञानेन्द्र मल्लले सर्वाधिक ३० रन बनाए । ६५ बल खेलेका उनले २ चौकाको सहयोगमा ३० रन मात्र बनाएका हुन् । त्यस्तै आरिफ शेख र सोमपाल कामीले १५/१५ रन बनाए । त्यस्तै विनोद भण्डारीले १२ रन बनाए । अन्य ब्याट्सम्यानले भने दोहोरो अंकमा रन बनाउन सकेनन् ।
यूएईका लागि जुनैद सिद्दीकीले ४ विकेट लिए । त्यस्तै काशिफ दाउद र अहमद राजाले २/२ तथा बासिल हमीदले १ विकेट लिए ।
त्यसअघि टस हारेर पहिले ब्याटिङ गरेको यूएईले निर्धारित ५० ओभरमा ९ विकेट गुमाएर २०२ रन बनाएको थियो ।
दुबई अन्तर्राष्ट्रिय क्रिकेट मैदानमा मोहम्मद वासिम र चिराग सुरीले पहिलो विकेटमा १६ ओभरमा ५७ रन जोडेर यूएईलाई मध्यम सुरुवात दिलाएका थिए । सन्दीपले वासिमलाई एलबीडब्लू आउट गरी यो साझेदारी तोडेका थिए । वासिमले ५१ बल खेल्दै २ चौका र १ छक्का प्रहार गरी ३३ रन बनाए ।
सुरी २६ रन बनाई करण केसीको बलमा आउट भए । उनले ५४ बल खेली ३ चौका प्रहार गरे । सी रिजवानलाई दीपेन्द्रसिंह ऐरीले ४ रनमा आउट गरे । वृत्य अर्भिन्दले २४ रन बनाए । यूएईका प्रमुख यी ब्याटरले ४५ बल खेली १ चौका प्रहार गरे । उनलाई आरिफ शेखले बोल्ड गरे ।
नेपालसँगको पहिलो खेलमा विजय दिलाउँदाका नायक रोहन मुस्तफाले बसिल हमिदसँग पाँचौं विकेटमा ४७ रन जोडे । त्यस्तै १७ रन बनाएका हमिदलाई सन्दीपले आफ्नै बलिङमा क्याच आउट गरे । मुस्ताफाले यूएईबाट सर्वाधिक ६० रन बनाए । ७३ बल खेली २ चौका र १ छक्का प्रहार गरेका उनलाई सोमपाल कामीले बोल्ड गरे ।
सन्दीपले १० ओभरमा १ मेडन राख्दै ३२ रन खर्चेर ३ विकेट लिए भने सोमपाल र करणले २–२ विकेट लिए । सोमपालले १० ओभरमा ४४ र करणले ९ ओभरमा ३६ रन खर्चिए ।
नेपालले पहिलो खेलमा पपुवा न्युगिनीलाई २ विकेटले पराजित गरे पनि अर्को खेलमा यूएईसँग नै ४० रनले पराजित भएको थियो ।
प्रकाशित : चैत्र ७, २०७८ १८:१०