फ्रेन्ड्ससँग हारेपछि च्यासल रेलिगेसनमा

यो हारपछि बी डिभिजनमा झर्ने दुई टिममध्ये च्यासल एक बन्ने निश्चित भएको हो । कम्तीमा बराबरीमा नतिजामा च्यासलको झिनो सम्भावना कायम रहने थियो । त्यसको ठीक विपरीत फ्रेन्ड्सको रेलिगेसनबाट बच्ने सम्भावना भने बलियो भएको छ । च्यासल छ अंकमा अन्तिम स्थानमा छ र अब उनले आफ्नो अन्तिम खेलमा सातदोबाटोको सामना गर्नेछ ।

त्यस खेलसँगै तीन संस्करणको पहिलो डिभिजनमा उसको उपस्थितिमा पूर्णविराम लाग्नेछ र अब उसले बी डिभिजनमा खेल्नु परेको छ । च्यासलले पहिलो पल्ट वर्ष ०७५ मा ए डिभिजन खेलेको थियो र त्यसलाई वर्ष ०७६ मा पनि कायम राख्न सफल भएको थियो । जितले भने फ्रेन्ड्सको १० अंक भएको छ र १२ औं स्थानमा रह्यो ।

फ्रेन्ड्सका यस जितमा जमोल एन्थोनीले दुई गोल गरे । उनले ३८ औं मिनेटमा पहिलो गोल गरेपछि ४३ औं मिनेटमा पेनाल्टीबाट दोस्रो गोल थपे । खेलको ५६ औं मिनेटमा च्यासलले एक गोल फर्काएको थियो । मोसा अबगानाले पेनाल्टीबाट च्यासलका लागि गोल गरेका हुन्, तर अन्त्यमा यो सान्त्वना गोल मात्र साबित भयो ।