एपीएफले रेलिगेसन टार्‍यो- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एपीएफले रेलिगेसन टार्‍यो

राजु घिसिङ

काठमाडौँ — सशस्त्र प्रहरी बलको एपीएफ क्लब सुरुका तीनै खेल हारेपछि संकटमा परेको थियो । धेरैले अनुमान गरेका थिए, अब एपीएफ ए डिभिजनमा अडिँदैन । त्यसपछि विदेशी खेलाडी अनुबन्ध गर्ने पहिले विभागीय टिम हुँदै एपीएफले लय समात्यो । नामै नचलेका एपीएफका आफ्नै खेलाडीले पनि राम्रै खेल्न थाले । सुधारिएको खेललाई निरन्तरता दिँदै एपीएफले एक गोलले पछाडि परेको स्थिति उल्टाउँदै बिहीबार मनाङ मर्स्याङदीलाई ३–१ स्तब्ध पार्‍यो ।

तस्बिर : हेमन्त श्रेष्ठ/कान्तिपुर

दशरथ रंगशालामा आशिष लामा, मणिकुमार लामा र कप्तान नवीन लामाको गोलमा यो लिगमा अपराजित यात्रा आठौं खेल पुर्‍याउँदै एएपीएफ ११ खेलबाट १४ अंकसहित आठौं स्थानमा उक्लियो । यससँगै एपीएफले सहिद स्मारक ‘ए’ डिभिजन लिगमा कायमै रहने निश्चित गर्‍यो । ३ जित, ५ बराबर र ३ हारको नतिजा निकाले एपीएफले रेलिगेसन क्षेत्रको टिमलाई ७ अंकले पछाडि पार्‍यो । हिमालयन शेर्पा (१३ अंक), पुलिस (११), जावलाखेल (१०), फ्रेन्ड्स (७), ब्रिगेड ब्वाइज (७) र च्यासल युवा क्लब (६) छन् । यसपालि पुछारका दुई टिम रेलिगेसनमा पर्नेछन् ।

‘मनाङ कठिन टोली हो, लिगको दोस्रोमा छ,’ लिगमा मनाङविरुद्ध एपीएफलाई १५ वर्षयता पहिलो जित दिलाएका प्रशिक्षक कुमार थापाले भने, ‘खेलाडीले मिहिनेत गरे । पछाडि परेर पनि कमब्याक गरे । यो बानी राम्रो भइरहेको छ । यसमा खुसी छौं । अब यस वर्ष रेलिगेसन टर्‍यो । एकदम खुसी छौं ।’ २०६२ सालमा मनाङ ए डिभिजन लिग हुँदाका कप्तान हुन् उनी । त्यसपछि उनी एपीएफ पुगे । त्यही वर्ष (२०६३) एपीएफले मनाङलाई २–१ ले हराएको थियो । त्यसयता लिगमा एपीएफले मनाङमाथि जित पाएको यसैपालि हो । थापाले प्रशिक्षकको रूपमा पनि यसपल्ट नै लिगमा डेब्यु गरेका हुन् ।

आफ्नो पूर्वक्लबमाथिको जितबारे प्रशिक्षक थापाले भने, ‘फुटबल भनेको अहिले हो, मैले त्यो प्रमाणित गरें । हिजो त के थियो के थियो भोलि कहाँ हुन्छ थाह छैन । अहिले रिजल्ट ल्यायौं । इतिहास त छँदै छ । धेरै पछाडि मनाङलाई पराजित गर्दा खुसी छौं ।’ कीर्तिमान आठपल्टको लिग च्याम्पियनको प्रदर्शनबारे उनी बोले, ‘मनाङ सधैं राम्रो टिम हो, के मिलिरहेको छैन, मैले बुझिरहेको छैन ।’ मनाङ २० अंकसहित दोस्रोमा यथावत रह्यो ।

पछिल्ला तीन खेलमा १ अंकमात्रै जोडेको मनाङले तेस्रो हारसँगै आर्मी (१९ अंकसहित तेस्रोमा) सँगको अन्तर ४ अंक बनाउने अवसर गुमायो । उपाधि भने ११ खेलमा २९ अंक जोड्दै मछिन्द्रले दुई खेल बाँकी छँदै कब्जा गरिसकेको छ । त्यसैले अब दोस्रो स्थानका लागि मनाङ, आर्मी, थ्रीस्टार (१८ अंक) र एनआरटी (१७) को चर्को प्रतिस्पर्धा हुने देखिएको छ । यी चार टिम ३ अंकभित्र छन् ।

एपीएफले दुई साताअघि पोखारामा पहिलोपल्ट आहा–रारा गोल्डकप उपाधि जित्दा पनि फाइनलमा मनाङलाई २–२ को बराबरीपछि पेनाल्टी शुटआउटमा सिकार बनाएको थियो । ‘पोखरामा रमाइलो गर्न गएका थियौं, प्रतियोगिता पनि जित्यौं । आहा–रारा जितेपछि खेलाडीमा गर्नुपर्छ भन्ने उच्च आत्मविश्वास थियो । त्यो प्रमाणित भयो,’ प्रशिक्षक थापाले भने, ‘यो नतिजा पहिला नै सोचेका थियौं । सुरुका तीन हारपछि चुनौती बढेको र विभिन्न पोजिसनमा नयाँ खेलाडी ल्याएपछि टिममा परिवर्तन आएको हो ।’

एपीएफले जापानी गोलकिपर युया कुरियामाको गल्तीमा ३६ औं मिनेटमा गोल बेहोरेको थियो । गोलकिपर विशाल सुनारले पेनाल्टी क्षेत्रमा उपलब्ध गराएको बललाई अघि बढिसकेका युयाले क्लियर गर्न सकेनन् र त्यसैलाई कप्तान अञ्जन विष्टले खाली पोस्टको दिशा दिँदै मनाङलाई १–० को अग्रता दिलाएका थिए । तर, आशिषले ४० औं मिनेटमै गोल गर्दै एपीएफलाई बराबरीमा फर्काए । सब्स्टिच्युट मणिले ८२ औं मिनेटमा उत्कृष्ट गोल गर्दै २–१ को अग्रता दिलाए । गोलकिपर विशालले नियन्त्रण गर्न नसकेका बलमा नवीनले ८७ औं मिनेटमा गोल गरेर एपीएफको सनसनीपूर्ण जित पक्का गरिदिए । मनाङले तीनै गोल आफ्नै गल्तीमा बेहोरेको थियो । एन्फा कम्प्लेक्समा भएको खेलमा एनआरटी १–० ले संकटालाई हराएर शीर्ष पाँचमा उक्लियो । स्टेफेन समीरले २८ औं मिनेटमा गोल गरेपछि एनआरटीले चौथो जित हात पारेको हो ।

प्रकाशित : फाल्गुन ६, २०७८ ०७:२४
प्रतिक्रिया
पठाउनुहोस्

दाइजो माग्नेलाई कारबाहीको सट्टा प्रहरीले गरायो मिलापत्र

रूपा गहतराज

नेपालगन्ज — बिहेको रौनक सुरु भइसकेको थियो । भोजका लागि चाहिने सामग्रीले घर भरिएको थियो । केटा पक्षलाई लत्ताकपडा र छोरीलाई दिइने भाँडाकुँडा जुटाइएको थियो । इष्टमित्र र टाढाबाट पाहुना आउँदै थिए । प्रेसबाट छापिएर आएका एक हजार निमन्त्रणा कार्ड बाँड्न मात्रै बाँकी थियो ।

एकाएक केटा पक्षले दाइजोका अनेकौं माग राख्न थाले । केटी पक्ष अलमलमा परे । विवाद भयो । सुरुमा परिवार र समुदायमै विवाद सुल्झाउन केटी पक्षले जोड दिइरहे । नमिलेपछि प्रहरीमा उजुरी गर्न बाध्य भए ।

बाँकेको जानकी गाउँपालिकाकी २१ वर्षीया किशोरीसँग डुडुवा–१ प्रिपहवाका २४ वर्षीय युवकको बिहे गत माघ २६ का लागि पक्का गरिएको थियो । केटा डुडुवा गाउँपालिकाका कर्मचारी हुन् भने केटी अंग्रेजीमा स्नातक ।

गत मंसिर १६ मा मगनी भएको थियो । तर दाइजोले विवाद भयो । मगनीमा केटीका परिवारले ७० हजार खर्च गरेको जनाए । केटा पक्षले तिलकमै नगद मागेपछि विवाद भयो । केटा पक्षको माग बढ्दै गएपछि केटी पक्ष प्रहरीकहाँ पुगेको थियो ।

प्रहरीले भने दाइजो माग्नेविरुद्ध मुद्दा चलाउनुको सट्टा मिलापत्र गराएको थियो । मिलापत्रपछि भने केटा पक्षले बिहे अस्वीकार गरेर केटी पक्षलाई तनाव दिएको छ । ‘प्रहरी कार्यालयमा भएको छलफलमै समय चाहियो भन्दै केटा पक्षले दिन लम्ब्याउँदै गए, हामी हैरान भयौं,’ केटीका दाजुले भने, ‘सुरुमा घरको विवाद भन्दै घरमै मिलाउने प्रयास गर्‍यौं ।’ अचानक बिहे नै नगर्ने भनेर बहिनीको जीवनमाथि खेलवाड भएको उनले गुनासो गरे । ‘आफ्नै खुसीले मोटरसाइकल दिने भनेका थियौं । यामाहाको मोटरसाइकलका लागि पैसा पनि बुझाएका थियौं,’ उनले भने, ‘फेरि केटाले होन्डा साइन बाइक माग गरे । केटाको बुबाले घरमा इन्भर्टर जडान गरिदिन भने । त्यत्तिले मात्र पुगेन । केटाको नाममा जग्गा पनि दिन माग गरे ।’ दिन–प्रतिदिन माग बढ्दै गएपछि सहन नसकेको उनले बताए । ‘फेरि पनि इज्जत सोच्यौं । सहमति गर्न सल्लाह गर्दा पनि केटा पक्षले बिहे गर्न अस्वीकार गरे,’ उनले भने ।

केटी पक्ष बुधबार जिल्ला प्रहरीमा जाहेरी दिन पुगेको थियो । दुवै पक्षको राय बुझेर सहमति गराउने प्रयास थालेपछि विवाद थप बढेको जिल्ला प्रहरी कार्यालयका डीएसपी मधुसूदन न्यौपानेले बताए । ‘कानुनमा दाइजो लिन र दिन पाइँदैन,’ उनले भने, ‘लिने र दिने दुवै कानुनी सजायको भागीदार हुन्छन् ।’

प्रकाशित : फाल्गुन ६, २०७८ ०७:२१
पूरा पढ्नुहोस्
प्रतिक्रिया
पठाउनुहोस्
×