अस्ट्रेलियन ओपन : मेदभेदेभ अघि बढे, सबालेन्का बाहिरिइन्- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

अस्ट्रेलियन ओपन : मेदभेदेभ अघि बढे, सबालेन्का बाहिरिइन्

एजेन्सी

मेलबर्न — उपाधिको प्रबल दाबेदार मानिएको डानियल मेदभेदेभले अमेरिकी म्याक्सिम क्रेसीको कडा चुनौती पार गर्दै सोमबार अस्ट्रेलियन ओपन टेनिसको अन्तिम आठको यात्रा तय गरेका छन् । महिलातर्फ फ्रान्सेली भेट्रान खेलाडी एलिज कोर्नेट आफ्नो लामो खेलजीवनमा पहिलोपल्ट ग्रान्ड स्लामको क्वाटरफाइनल पुग्न सफल भएका छन् । 

दोस्रो वरीयताका रुसी खेलाडी मेदभेदेभले तीन घण्टा ३० मिनेट खर्चेर क्रेसीमाथि ६–२, ७–६, ६–७, ७–५ को जित पाएका थिए । ‘आजको खेल निकै गाह्रो र लामो भयो, पहिलो सेटलाई छाडेर आजको पूरा खेल निकै कठिन रह्यो,’ मेदभेदेभले भने, ‘मैले चौथो सेट जित्न नसकेको भए मेरो प्रदर्शन निकै कमजोर भएको साबित हुन्थ्यो ।’ यसअघि लगातार अन्तिम १६ मा हार बेहोरिइरहेकी कोर्नेटले क्वाटरफाइनल यात्रा तय गरिन् । यसअघि उनी ६३ ग्रान्ड स्लाम प्रतियोगितामा सुरुआती चरणमै रोकिने गरेकी थिइन् । अब सेमिफाइनल पुग्नका लागि उनले अमेरिकी खेलाडी डेनियल कोलिन्सको सामना गर्नेछिन् ।

सन् २००५ मा पहिलोपल्ट ग्रान्ड स्लाममा डेब्यु गरेकी कोर्नेट शनिबार मात्रै ३२ वर्षकी भइन् । उनी यसअघि पाँचपल्ट ग्रान्ड स्लाम चौथो चरण पुगे पनि अघि बढ्न सकेकी थिइनन् । यसपल्ट भने उनले पूर्व विश्व नम्बर एक रोमानियाली सिमोना हालेपलाई ६–४, ३–६, ६–४ ले पराजित गरिन् । जितपछि कोर्नेटले भनिन्, ‘निकै खुसीको अनुभव गरिरहेकी छु ।’ उनले दोस्रो चरणमा विश्व नम्बर ३ गार्बिन मुगुरुजालाई हराएकी थिइन् ।

२७ औं वरीयताकी कोलिन्सले भने जितका लागि उत्तिकै संघर्ष गर्नुपरेको थियो । उनले २ घण्टा ५१ मिनेट चलेको खेलमा बेल्जियमकी एलिस मार्टेन्सलाई ४–६, ६–४, ६–४ ले पराजित गरिन् । सन् २०१९ मा मेलबर्नमा सेमिफाइनल खेलेकी कोलिन्सले जितपछि भनिन्, ‘जितका लागि निकै कडा संघर्ष गर्नुपर्‍यो ।’

पुरुषतर्फ नवौं वरीयताका क्यानडाका फेलिक्स अगुर एलिसिमले सन् २०१८ मा मेलबर्नको फाइनल खेलेका क्रोएसियाका मारिन सिलिचलाई २–६, ७–६ (९–७), ६–२, ७–४ ले हराए ।

महिलातर्फ पोल्यान्डकी सातौं वरीयताकी इगा स्विटेकले रोमानियकी सोराना क्रिस्टियालाई ५–७, ६–३, ६–३ ले हराएर क्वाटरफाइनल तय गरिन् । विश्व नम्बर दुई बेलारुसकी अर्यना सबालेन्का पराजित भएकी छन् । पहिलो ग्रान्ड स्लामको आसमा रहेकी उनलाई इस्टोनियाकी भेट्रान खेलाडी कैया कानेपीले ५–७, ६–२, ७–६ (१०–७) ले हराएकी थिइन् । ३६ वर्षे कानेपी पछिल्लो आठ पटकमा मेलबर्नमा पहिलोपल्ट क्वाटरफाइनल पुगेकी हुन् ।

प्रकाशित : माघ ११, २०७८ ०८:४१
प्रतिक्रिया
पठाउनुहोस्

नेपाललाई ‘बलियो’ मान्छ मोरिसस

नेपालका लागि मोरिससविरूद्धको खेल घरेलु मैदानमा आत्मविश्वास बढाउने बलियो अवसर हुनेछ
हिमेश

काठमाडौँ — केही झिनो अन्योलबीच नेपाल र मोरिससबीचको दुई अन्तर्राष्ट्रिय मैत्रीपूर्ण खेल हुने नै भयो । दशरथ रंगशालामा हुने खेलका लागि दर्शकले प्रवेश पाउनेछन् वा छैनन्, पाए कतिले पाउनेछन् ? यी सबै प्रश्न अझै अनुत्तरित छन् । तर मोरिसस टिम सोमबार नेपाल आइपुगेपछि खेललाई लिएर अन्योल रहेन । र, यससँगै तय भएको छ, नेपालले पहिलोपल्ट ऐतिहासिक रूपमा अफ्रिकी प्रतिद्वन्द्वीको औपचारिक सामना गर्ने । 

माल्दिभ्समा भएको साफ च्याम्पियनसिपपछि नेपाल फर्केयता पहिलोपल्ट पत्रकार सम्मेलनमा मुख्य प्रशिक्षक अब्दुल्लाह अल्मुताइरीले दाबी गरेका थिए, नेपालले अब आफूभन्दा माथिको वरीयताको टिमविरुद्ध खेल्नेछ । कम्तीमा अहिले यस्तो भएको छैन । मोरिसस नेपालभन्दा फिफा वरीयतामा पछाडि छ । नेपालका लागि यस टिमविरुद्धको खेल आफ्नो घरेलु मैदानमा आत्मविश्वास बढाउने जितलाई प्रयास गर्ने बलियो अवसर हुनेछ ।

मोरिसस स्वयं पनि मान्छ, आफ्नो तुलनामा नेपाली टिम बलियो छ । मोरिससका प्रशिक्षक हुन्, टोनी फ्रान्सिस । उनी नेपालविरुद्धको खेललाई लिएर उत्साही छन् । त्रिभुवन अन्तर्राष्ट्रिय विमानस्थलमा ओर्लेयता उनले भने, ‘सबैभन्दा पहिले नेपालले हामीलाई दुई खेलका लागि निमन्त्रण दिएकोमा धन्यवाद । नेपाल बलियो टिम हो तर यी टिमबीचको खेल प्रतिस्पर्धात्मक हुनेछ । हाम्रो टिम आफूले राम्रो चुनौती पेस गर्नेमा विश्वस्त छ । हामी अहिले कहाँ छौं नेपालविरुद्धको खेलले देखाउने छ ।’

अफ्रिकी कप अफ नेसन्सको अर्को संस्करणको प्रारम्भिक छनोट अबको केही महिनापछि मार्चमा सुरु हुँदै छ । मोरिससले नेपालको भ्रमणलाई यसकै तयारीका रूपमा लिएको छ । फिफा वरीयतामा मोरिसस १ सय ७२ औं स्थानमा छ । यो अफ्रिकी फुटबल महासंघ (काफ) सँग आबद्ध भएको देश हो । क्षेत्रीय रूपमा भने यो काउन्सिल अफ साउथर्न अफ्रिकन फुटबल एसोसिएसनमा आबद्ध छ । मोरिसस फुटबलको अहिलेसम्मको सबैभन्दा ठूलो उपलब्धि भन्नु नै सन् १९७४ को अफ्रिकी कप अफ नेसन्स खेल्नु हो ।

सोमबार नेपाल आइपुगेको मोरिसस फुटबल टोलीलाई त्रिभुवन विमानस्थलमा स्वागत गरिँदै । तस्बिर : एन्फा

संयोग कस्तो भने त्यतिबेलासम्म नेपालले औपचारिक फुटबल खेल्न सुरु गरेको थिएन । त्यस अर्थमा मोरिससको अन्तर्राष्ट्रिय फुटबलको इतिहास लामो छ । नेपालले सन् १९८२ पछि मात्र फिफा मान्यताप्राप्त अन्तर्राष्ट्रिय खेल खेल्न थालेको हो । मोरिसस फुटबल खेल्नका लागि नेपाल आउने पहिलो अफ्रिकी देश पनि हुनेछ । नेपालले अहिलेसम्म तीन अवसरमा अफ्रिदी देशको फुटबल मैदानमा सामना गरेको छ, तर त्यो सबै औपचारिक मान्यताप्राप्त खेल भने थिएन ।

सन् १९८३ मा नेपालले मलेसियामा भएको मर्डेका कपमा सहभागिता जनाउनेक्रममा अल्जेरिया–११ को सामना गरेको थियो । त्यसमा नेपाल २–० ले पराजित रह्यो । दोस्रो अवसर सन् २००८ मा जुरेको थियो, जतिबेला मलेसियामै भएको मर्डेका कपका क्रममा नेपालले सियरा लियोनको यू–२० टिमको सामना गरेको थियो । नेपाल त्यसमा ३–१ ले पराजित रह्यो । यो खेल भने निकै विवादास्पद छ । साह आलम स्टेडियमको लगभग विनादर्शक भएको खेल नेपालका लागि लिग चरणको अन्तिम खेल थियो ।

त्यसअगाडि नेपाल मलेसियासँग ४–० ले पराजित रहेको थियो भने अफगानिस्तानविरुद्धको खेल २–२ को बराबरीमा टुंगिएको थियो । यस्तोमा अन्तिम खेलमा निश्चित जित निकाल्दै नेपालसामु सेमिफाइनल प्रवेशको अवसर थियो । तर केही विदेशी मिडिया र यसै प्रतियोगितालाई लिएर लेखिएका पुस्तकले भने यो खेलमा मिलेमतो भएको दाबी गर्छ । त्यो खेलमा नेपाल ३–१ ले पराजित भएको थियो । नेपालका लागि एकमात्र गोल जुमनु राईले ४० औं मिनेटमा पेनाल्टीबाट गरेका थिए ।

यससँगै खेल १–१ को बराबरीमा पुगेको थियो, जुन सट्टेबाजको योजनाअनुसार थिएन । त्यसपछि सियरा लियोनले दोस्रो हाफमा दुई गोल गरेको थियो । त्यसको चार वर्षपछि सन् २०१२ मा नेपालले फेरि एकपल्ट नेहरू कपमा क्यामरुनविरुद्ध लिग चरणमा खेल्ने अवसर पाएको थियो । यो क्यामरुनी टिम कुनै औपचारिक टिम थिएन । तर यो खेलमा नेपाल नमीठोसँग ५–० ले पराजित रह्यो । क्यामरुनी टिम आफैंमा बलियो भने थियो । सम्भवतः मोरिसस नेपालले अहिलेसम्म सामना गरेका यी तीन टिम जत्तिको छैन ।

प्रकाशित : माघ ११, २०७८ ०८:३७
पूरा पढ्नुहोस्
प्रतिक्रिया
पठाउनुहोस्
×