राष्ट्रिय महिला हक्की प्रतियोगिता : आर्मी र गण्डकी विजयी- खेलकुद - कान्तिपुर समाचार

राष्ट्रिय महिला हक्की प्रतियोगिता : आर्मी र गण्डकी विजयी

शंकर आचार्य

पर्सा — वीरगन्जमा जारी चौंथो सहाना प्रधान स्मृति राष्ट्रिय महिला हक्की प्रतियोगिताअन्तर्गत बिहीबारको पहिलो खेलमा नेपाल आर्मीले प्रदेश १ विरुद्ध ७–० गोलको फराकिलो अन्तरले जित हात पारेको छ । खेलमा आर्मीकी कमला चन्द एक्लैले ४ गोल गरेकी थिइन् । निलम पाण्डेले २ र सीतामाया बलले १ गोल गरेका थिए । 

चन्दले खेलको सातौं मिनेटमा पहिलो गोल गरेर खाता खोलेकी थिइन् । त्यसपछि १० र १८ औं मिनेटमा पाण्डेले लगातार दुई गोल गरिन् । २८ औं र ४७ औं मिनेटमा फेरि चन्दले लगातार २ गोल गरिन् । ५६ औं मिनेटमा बलले गोल गरेको २ मिनेट नबित्दै चन्दले अर्को गोल गरेकी थिइन् । आर्मीकी अन्जना चन्द ठकुरी ‘उमन अफ द म्याच’ घोषित भइन् । जितसँगै आर्मी सेमीफाइनलमा प्रवेश गरेको छ ।

दोस्रो खेलमा गण्डकीले लुम्बिनी प्रदेशलाई २–० ले पराजित गरेको छ । गण्डकीका लागि खेलको सातौं मिनेटमा कमलादेवी घर्ती पुनले र नवौं मिनेटमा नानु गुरुङले गोल गरेका थिए । गण्डकीकी सविना पुन राना ‘उमन अफ द म्याच’ घोषित भइन् । जितसँगै गण्डकी पनि सेमीफाइनलमा प्रवेश गरेको छ । प्रतियोगिताअन्तर्गत बिहीबार लिग चरणका सम्पूर्ण खेल सकिएको छ ।

शुक्रबार पहिलो सेमीफाइनल खेल नेपाल आर्मी र गण्डकी प्रदेश तथा दोस्रो सेमीफाइनल खेल सुदूरपश्चिम र मधेस प्रदेश टीमबीच हुने सहआयोजक सानो पाइला संस्थाका कार्यक्रम प्रमुख रौनकराज सर्राफले जानकारी दिए ।

प्रकाशित : माघ ६, २०७८ १७:१६
प्रतिक्रिया
पठाउनुहोस्

नेपाल-भारत सीमामा कोरोना पुष्टि हुनेको संख्यामा वृद्धि

शंकर आचार्य

पर्सा — वीरगन्ज नाका हुँदै भारतबाट नेपाल प्रवेश गर्नेहरूमा कोरोना संक्रमण उच्च संख्यामा देखिन थालेको छ । बुधबार सीमास्थित हेल्थ डेस्कमा हालसम्मकै धेरै संक्रमित पुष्टि भएको डेस्ककी प्रमुख डा अनिशा महतोले जानकारी दिइन् । 

महतोका अनुसार बुधबार कूल ४ सय ७७ जनाको एन्टिजेन परीक्षण गर्दा ४५ जनामा कोरोना संक्रमण पुष्टि भएको छ । संक्रमित हुनेमा अधिकांश भारतीय नागरिक थिए । उनीहरूलाई भारत नै फर्काइएको छ । उनीहरू नेपालको वीरगन्ज, नारायघाट, काठमाडौं लगायतका सहरमा मजदुरी गर्न आउने श्रमिकहरू भएको महतोले जनाइन् ।

केही महिलाहरू भने भारतस्थित आफ्नो माइती गएर फर्किने वा नेपालस्थित आफन्तको घरमा पाहुना लाग्न आएकाहरू थिए ।

कोरोनाको तेस्रो लहर सुरु भएयता डेस्कमा पहिलो पटक एकै दिन ४५ जनामा कोरोना संक्रमण पुष्टि भएको डा महतो बताउँछिन् । पुस ८ देखि दैनिक १/२ जना संक्रमित पुष्टि हुन थालेकोमा पुस २० देखि दैनिक १०/११ जना संक्रमित फेला पर्न थालेका थिए । डेस्कमा पुस महिनाभरिमा मात्र १ सय ५६ जनामा कोरोना संक्रमण पुष्टि भएको थियो ।

माघ लागेपछि संक्रमितको संख्या बढ्न थालेको छ । बिहीबार पनि साँझ ४ बजेसम्म २ सय ३९ जनाको एन्टिजेन परीक्षण गर्दा १९ जनामा कोरोना संक्रमण पुष्टि भएको छ । परीक्षण जारी रहेकाले संक्रमित थपिने सम्भावना रहेको उनले बताइन् ।

यसरी कोरोना संक्रमण पुष्टि हुनेहरूको संख्या बढ्नुले कोरोनाको तेस्रो लहर उच्च बिन्दुतर्फ लाग्दै गरेको संकेत मिलेको डा महतो बताउँछिन् ।

प्रकाशित : माघ ६, २०७८ १७:१४
पूरा पढ्नुहोस्
प्रतिक्रिया
पठाउनुहोस्
×