पोखरा — फुटबलर अञ्जन विष्टलाई पोखराको सहारा क्लबले सर्वोत्कृष्ट राष्ट्रिय फुटबल खेलाडी-२०७८ बाट पुरस्कृत गरेको छ ।
पोखरा रंगशालामा बिहीबारदेखि सुरू भएको २०औं आहा-रारा गोल्डकपको उद्घाटन समारोहमा उनलाई पुरस्कृत गरिएको हो । अखिल नेपाल फुटबल संघ (एन्फा) अध्यक्ष कर्मा छिरिङ शेर्पाले ३५ हजार रूपैयाँसहित विष्टलाई सम्मान गरे ।
राष्ट्रिय तथा अन्तर्राष्ट्रिय फुटबल प्रतियोगितामा राष्ट्रको प्रतिनिधित्व गरी उत्कृष्ट खेल प्रदर्शन गरेकोले उनलाई पुरस्कृत गरिएको सहारा क्लबका अध्यक्ष हरिराम गुरूङले बताए ।
उद्घाटन समारोहमै क्लबले कान्तिपुरकर्मी हिमेशरत्न बज्राचार्यलाई 'विशेष सम्मान' प्रदान गरेको छ ।
आहा-रारा गोल्डकपको दुई दशक यात्राको फेहरिस्त समेटिएको पुस्तक 'सहारा'को लेखन, सम्पादन र प्रकाशनमा योगदान पुर्याएको भन्दै उनलाई सम्मान गरिएको हो । उक्त पुस्तकको विमोचन एन्फा अध्यक्ष शेर्पाले गरेका थिए ।
प्रकाशित : माघ ६, २०७८ १५:३१