महिला हक्की प्रतियोगितामा मधेस प्रदेश विजयी- खेलकुद - कान्तिपुर समाचार

महिला हक्की प्रतियोगितामा मधेस प्रदेश विजयी

गण्डकी र सुदूरपश्चिमबीचको खेल बराबरीमा
शंकर आचार्य

पर्सा — वीरगन्जमा जारी चौथों सहाना प्रधान स्मृति राष्ट्रिय महिला हक्की प्रतियोगिताअन्तर्गत दोस्रो दिनको पहिलो खेलमा मधेस प्रदेश टिम विजयी भएको छ । उसले प्रदेश नम्बर १ लाई ० को विरुद्ध २ गोलले पराजित गरेको हो । 

मधेस प्रदेशको पकडमा रहेको खेलको २८ औं मिनेटमा जर्सी नम्बर ११ की आकृति राईले पहिलो गोल गरेर टिमलाई अग्रता दिलाएकी थिइन् । त्यसको २ मिनेटलगत्तै मधेस प्रदेश टिमकी जर्सी नम्बर ८ की गिता कुमारीले पेनाल्टी कर्नरबाट अर्को गोल थपेर जित सुनिश्चित गरेकी थिइन् । गिता ‘उमन अफ द म्याच’ समेत घोषित भइन् ।

बुधबार नै खेलिएको गण्डकी र सुदूर पश्चिम प्रदेशबीचको दोस्रो खेल भने गोलरहित बराबरीमा टुंगियो । खेल अवधिभर दुबै टिमका खेलाडीले कुनै गोल गर्न सकेनन् ।

नेपाल हक्की संघको आयोजना तथा सानो पाइला संस्थाको सहआयोजनामा वीरगन्जको आदर्शनगर रंगशालामा प्रतियोगिता मंगलबारदेखि सुरु भएको हो । प्रतियोगितामा सात वटै प्रदेश र नेपाली सेनाको विभागीय टिम गरी ८ टिम सहभागी छन् ।

बिहीबारसम्म लिगचरणका खेल र शुक्रबारदेखि नकआउट चरणका खेल सुरु हुने सहआयोजक संस्था सानो पाइलाका कार्यक्रम प्रमुख रौनकराज सर्राफले जानकारी दिए ।

प्रकाशित : माघ ५, २०७८ १७:१९
प्रतिक्रिया
पठाउनुहोस्

कर्मचारी संक्रमित भएपछि रुपन्देही प्रशासनको अत्यावश्यक बाहेकका सेवा बन्द

माधव ढुंगाना, सन्जु पौडेल

काठमाडौँ — कर्मचारीहरू कोरोना संक्रमित हुने क्रम बढेपछि जिल्ला प्रशासन कार्यालय रुपन्देहीमा अत्यावश्यक बाहेकका सेवा बन्द गरिएको छ । कोरोना संक्रमणको जोखिम बढ्ने भन्दै प्रशासनले सेवा बन्द गरेको हो ।


कार्यालयले बुधबार सूचना जारी गर्दै अर्को सूचना नभएसम्मका लागि अत्यावश्यक बाहेकका सेवा बन्द गरिएको जनाएको छ । प्रमुख जिल्ला अधिकारी ऋषिराम तिवारीका अनुसार नागरिकता, राहदानी, राष्ट्रिय परिचय पत्र, दर्ता/नवीकरण, पेन्सन सिफारिस/प्रमाणित, नाबालक परिचयपत्र लगायतका सेवा अर्को सूचना जारी नहुँदासम्मका लागि स्थगन गरिएको छ ।

उनका अनुसार कार्यालयमा कार्यरत केही कर्मचारी कोरोना संक्रमित भएपछि प्रशासनको सेवा बन्द गरिएको हो । केही कर्मचारीमा मिल्दाजुल लक्षण देखिएका छन् । शान्ति–सुरक्षा, मुद्दा लगायत अत्यावश्यक सेवा भने नियमित रहने उनले बताए । 'हाम्रा धेरै कर्मचारी बिरामी पर्नु भएको छ । कार्यालयमा सेवाग्राहीको भीड पनि थेगिनसक्नु छ । संक्रमण नफैलियोस् भनेर तत्कालका लागि अत्यावश्यक बाहेकका सेवा बन्द गरिएको हो,' उनले बताए ।

प्रशासनले जारी गरेको सूचनामा कोभिडको बढ्दो संक्रमणका कारण कार्यालयका अधिकांश कर्मचारी संक्रमित भई हाल आइसोलेसनमा रहेको जनाइएको छ । अत्यावश्यक सेवा लिन आउने सेवाग्राहीलाई खोप कार्ड अनिवार्य गरिएको छ ।

प्रकाशित : माघ ५, २०७८ १७:१४
पूरा पढ्नुहोस्
प्रतिक्रिया
पठाउनुहोस्
×