अस्ट्रेलियन ओपनमा राडुकानुको डेब्यु- खेलकुद - कान्तिपुर समाचार

अस्ट्रेलियन ओपनमा राडुकानुको डेब्यु

एएफपी

मेलबर्न — पूर्वविश्व नम्बर एक एन्डी मरेले मंगलबार अस्ट्रेलियन ओपन टेनिसमा निकै संघर्ष गर्दै जित निकालेका छन् । उपाधिका बलियो प्रत्याशी डानियल मेदभेदेभले भने दोस्रो चरणमा निक किर्गियोसको कडा चुनौती सामना गर्नुपर्ने भएको छ ।

महिलातर्फ शीर्ष दसौं वरीयतामा रहेका स्पेनका गाब्रिन मुगुरुजा, पोल्यान्डका इगा स्वाटिक र इस्टोनियाका एनेट कोन्टाभेटले सहज निकालेका छन् । रोमानियाका सिमोन हालेप र बेलारुसकी आर्यन सवालेन्काले संघर्ष गर्दै जित आत्मसात् गरे ।

यूएस ओपन विजेता बेलायती किशोरी इमा राडुकानुले पनि अस्ट्रेलियन ओपनमा डेब्यु गरिन् । र, जित हात पारिन् । तर क्यानडेली १९ वर्षीया लेयलाह फर्नान्डेज भने पराजित पहिलो चरणमै पराजित रहिन् । उनलाई नै हराएर राडुकानुले यूएस ओपन जितेकी थिइन् । प्रतियोगितामा २३ औं वरीयताप्राप्त फर्नान्डेज अस्ट्रेलियाली वाइल्डकार्ड प्राप्त खेलाडी म्याडिसन इनगिल्ससँग ६–४, ६–२ ले पराजित रहिन् । प्रतियोगिताले दोस्रो दिन छुँदा आफ्नो स्वाभाविक बाटो लिएको छ ।

आइतबारमात्रै पुरुषतर्फका डिफेन्डिङ च्याम्पियन तथा नम्बर एक नोभाक जोकोभिचको प्रवेशाज्ञा रद्द भएयता चर्चा कोर्टमै केन्द्रित रह्यो । मरेले पनि त्यसको फाइदा उठाए । वाइल्ड कार्डप्राप्त गरेर खेलिरहेका ३४ वर्षीय मरेले आफू किन तीनपल्टको ग्रान्ड स्लाम विजेता रहेका थिए भनेर प्रमाणित गरे । उनले पाँच सेटको म्याराथन खेलमा २१ औं वरीयताप्राप्त निकोलोज बासिलाभिलीलाई ६–१, ३–६, ६–४, ६–७, ६–४ पराजित गरे ।

खेलपछि मरेले भने, ‘पाँच सेटको खेल जित्नुको रोमाञ्च अलग्गै छ । यो जित मेरो लागि निकै सुखद छ ।’ रुसी खेलाडी मेदभेदेभले भने आफ्नो जितका लागि संघर्ष गर्नुपरेन । दोस्रो वरीयताका मेदभेदेभले ९१ औं वरीयतामा रहेका हेनरी लाकसोननलाई ६–१, ६–४, ७–६ ले हराए । जोकोभिच र रोजर फेडेररको अनुपस्थितिमा २५ वर्षीय रुसी खेलाडी र स्पेनी अनुभवी खेलाडी राफेल नडाल उपाधिका लागि बलियो प्रत्याशी रहेका छन् ।

गत वर्षको अस्ट्रेलियन ओपन फाइनलमा मेदभेदेभ भने जोकोभिचकै हातबाट पराजित रहेका थिए । तर, उनले यूएस ओपनको फाइनलमा भने सर्बियाली खेलाडीलाई पन्छाएका थिए । यसपल्ट उनले उपाधिको यात्रा तय गर्न सबैभन्दा पहिले प्रतिभाशाली घरेलु खेलाडी किर्गियोसलाई दोस्रो चरणमा परास्त गर्नुपर्नेछ ।

महिलातर्फ विश्व नम्बर तीन स्पेनी खेलाडी मुगुरुजाले फ्रान्सेली क्लारा बुरेलाई ६–३, ६–४ ले पन्छाए । दुई वर्षअगाडि मुगुरुजाले मेलबर्नमा फाइनल खेलेकी थिइन् ।

पूर्व विश्व नम्बर एक हालेपले पोल्यान्डका माग्दालेना फ्रेचलाई ६–४, ६–१ लाई हराइन् । दोस्रो वरीयताकी सवलेन्काले आफ्नो उत्कृष्ट लय देखाउन असफल रहिन् । तर, उनको त्यो खेल पनि स्ट्रोम सान्डर्सलाई ५–७, ६–३, ६–२ ले हराउन पर्याप्त रह्यो ।

दिनको अन्तिम खेलमा राडुकानुले अमेरिकी प्रतिद्वन्द्वी स्लोनी स्टेफेन्समाथि ६–०, २–६, ६–१ को जित रचिन् । यो जितपछि बेलायती खेलाडीले पनि आफू उपाधि होडमा रहेको प्रमाणित गरिन् ।

प्रकाशित : माघ ४, २०७८ २१:५७
प्रतिक्रिया
पठाउनुहोस्

प्रिन्स आफ्नै कलेजबाट सम्मानित

कान्तिपुर संवाददाता

काठमाडौँ — ब्याडमिन्टन जुनियर विश्व वरीयताको शीर्षस्थानमा पुगेका नेपाली खेलाडी प्रिन्स दाहाललाई उनी अध्ययनरत पिनाकल कलेजले नगदसहित सम्मान गरेको छ । अघिल्लो साता जुनियर विश्व नम्बर एक बनेका १८ वर्षीय प्रिन्स पिनाकलमा ११ कक्षामा अध्ययनरत छन् ।

पिनाकलले प्रिन्सलाई ४० हजार रुपैयाँसहित सम्मान गरेको हो । कलेजका प्रिन्सिपल ऋषि तिवारीले अन्तर्राष्ट्रिय रूपमा देशको गौरव प्रिन्सलाई शिक्षा क्षेत्रमा दीक्षित गर्ने जिम्मा कलेजको भएको बताए । उनले कलेजस्तरीय राष्ट्रिय ब्याडमिन्टन प्रतियोगिता गर्ने घोषणासमेत कार्यक्रममा गरेका छन् ।

उच्च शिक्षालय तथा माध्यमिक विद्यालय संघ (हिसान) का अध्यक्ष रमेश सिलवाल, प्रिन्सपल ऋषि तिवारी, कलेजका प्लस टु संयोजक रविप्रसाद तिमिल्सिनालगायतले प्रिन्सलाई प्रोत्साहन पुरस्कारसहित सम्मानित गरेका हुन् ।

‘दार्चुलाजस्तो दुर्गम क्षेत्रमा जन्मिएर विश्वकै उत्कृष्ट हुनु चानेचुने होइन । हामीले खेलकुदको प्रशिक्षण दिन नसके पनि शिक्षाको प्रशिक्षण दिएर उत्कृष्ट खेलाडीलाई उच्च शिक्षा हासिल गर्ने माध्यम बन्ने प्रयास गरेका हौं,’ प्रिन्सिपल तिवारीले भने ।

पिनाकलले शिक्षा, होस्टेल सुविधा (आवश्यक परेमा), स्टेसनरी, कलेज पोसाकलगायत सबै सुविधा निःशुल्क उपलब्ध गराएको जानकारी दिएको छ ।

राखेप सदस्य–सचिव रहिसकेका हिसानका अध्यक्ष सिलवालले प्रिन्सलाई खेलकुदसँगै पढाइमा पनि केन्द्रित हुन सुझाए । ‘करिअरलाई अझै उचाइमा पुर्‍याउन शिक्षामा पनि उत्तिकै ध्यान दिनुपर्छ,’ सिलवालले भने ।

प्रकाशित : माघ ४, २०७८ २१:४४
पूरा पढ्नुहोस्
प्रतिक्रिया
पठाउनुहोस्
×