नेपाली फुटबलको विकासबारे एन्फा र साउदी फुटबलबीच सम्झौता

एन्फाका अनुसार फुटबलका कार्यक्रमहरू आदानप्रदान गर्न दुवै पक्ष सहमत भएका छन् । राष्ट्रिय टोलीबीच अन्तर्राष्ट्रिय मैत्रीपूर्ण खेलहरू आयोजना गर्ने तथा उमेर समूह (यू–१७, यू–१९ र यू–२३) को टोलीबीच प्रशीक्षण शिविरहरू आयोजना गर्नेबारे पनि सम्झौता भएको छ ।

युथ फुटबल विकासमा विशेषज्ञ सेवा प्रदानका साथै दक्ष जनशक्ति उत्पादनका लागि कार्यशाला गोष्ठी, सेमिनार र वार्ताहरू नियमित जारी राख्ने सहमति भएको एन्फाले जनाएको छ । रेफ्रीको क्षमता अभिवृद्धि, रेफ्री शिक्षा, भिडियो असिस्टेन्ट रेफ्री (भार) बारे चेतना तथा दुवै देशमा आयोजित प्रतियोगिताहरूमा रेफ्री आदानप्रदानमा पनि दुवै पक्ष सहमत भएका छन् ।

साउदी भ्रमणका क्रममा एन्फा अध्यक्ष शेर्पाले एएफसी महासचिव दातो विन्डसर जोन र उपमहासचिव वाहिद कर्दानीसँग पनि भेटवार्ता गरेका थिए । उक्त भेटवार्तामा एएफसीले एन्फालाई प्रदान गर्ने प्राविधिक सहायता कार्यक्रम पुनः सुरु गर्ने सहमति भएको थियो ।