शुक्र सेन्ट्रल ओपन च्याम्पियन- खेलकुद - कान्तिपुर समाचार

शुक्र सेन्ट्रल ओपन च्याम्पियन

कान्तिपुर संवाददाता

काठमाडौँ — शुक्रबहादुर राईले सूर्य नेपाल सेन्ट्रल ओपन गल्फको उपाधि जितेका छन् । शुक्र गोकर्ण गल्फ क्लबमा शुक्रबार एक ओभर ७३ स्कोर गर्दै ७२ होलको कोर्समा कुल १० अन्डर २ सय ७८ को कार्ड बनाएर च्याम्पियन बने ।

उनले रवि खड्कालाई एक स्ट्रोकले पछाडि पारे । सूर्य नेपाल गल्फ टुर २०२१–२२ को तेस्रो इभेन्टमा शुक्रको यो दोस्रो उपाधि हो । दुई साताअघि उनले गृहनगर धरानमा सूर्य नेपाल इस्टर्न ओपन जितेका थिए । उनले अघिल्लो दिनको खेल समाप्तिमा रवि र भुवन नगरकोटीमाथि ६ स्ट्रोकको अग्रता लिएका थिए ।

अन्तिम दिन चार अन्डर ६८ खेलेका रविले ९ अन्डर २ सय ७९ को कार्ड बनाए । इभन पार ७२ खेलेका भुवन नगरकोटी ६ अन्डर २ सय ८२ को स्कोर बनाउँदै तेस्रो भए । शुक्रले १ लाख ३५ हजार, रविले ८८ हजार र भुवनले ६५ हजार रुपैयाँ नगद पुरस्कार पाए ।

सुवास तामाङ ४ अन्डर २ सय ८४ अंकसाथ चौथो भए । एमेच्योरतर्फको उपाधि जितेका सुवासले अन्तिम दिन इभन पार ७२ को स्कोर बनाए । एमेच्योरमै दोस्रो स्थानमा रहेका सद्भाव आचार्य ५ अन्डर २ सय ९३ को कार्ड बनाउँदै समग्रमा सातौं स्थानमा रहे । नेपाल प्रोफेसनल गल्फर्स संघले सूर्य नेपालको प्रायोजनमा गरेको प्रतियोगितामा व्यावसायिकतर्फ ३९ र एमेच्योरमा १९ गल्फरले भाग लिएका थिए । विजयी खेलाडीलाई सूर्य नेपालका सहायक ब्रान्ड म्यानेजर नवीन सरोज र आयोजक संघका सल्लाहकार घनश्याम थापाले पुरस्कृत गरेका थिए ।

प्रकाशित : माघ १, २०७८ ०७:५१
प्रतिक्रिया
पठाउनुहोस्

आज संकटा र थ्री स्टार भिड्दै

कान्तिपुर संवाददाता

काठमाडौँ — सहिद स्मारक 'ए' डिभिजन लिग ०७८ मा शनिबार दुई खेल हुनेछन् । त्यसमध्ये सबैभन्दा महत्त्वको खेल हुनेछ– संकटा र थ्री स्टारबीच । यो खेलको नतिजाले अंक तालिकाको शीर्ष चारमा रहने टिमको निर्णय हुन सक्नेछ ।

अहिलेसम्म अपराजित संकटा आठ खेलबाट १४ अंक जोडेर तेस्रो स्थानमा छ । थ्री स्टार भने समान आठ खेलबाट १३ अंक जोडेर पाँचौं स्थानमा छ । यसअघि दशरथ रंगशालामा हुने खेलमा आर्मीले फ्रेन्ड्सको सामना गर्नेछ ।

आर्मी आठ खेलबाट १४ अंकसहित चौथो स्थानमा छ । फ्रेन्ड्स भने रेलिगेसनबाट बच्न संघषरत छ र उसको आठ खेलबाट तीन अंक मात्र रहेको छ ।

प्रकाशित : माघ १, २०७८ ०७:४१
पूरा पढ्नुहोस्
प्रतिक्रिया
पठाउनुहोस्
×