सातदोबाटोको मन छुने जित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement
'ए' डिभिजन लिग

सातदोबाटोको मन छुने जित

कीर्तिमान आठपल्टको विजेता मनाङमाथि प्राप्त सातदोबाटोको यो सफलतालाई धेरै पछाडिसम्म प्रसिद्ध जितका रुपमा सम्झिइनेछ
एपीएफ १–० हिमालयन शेर्पा, सातदोबाटो २–१ मनाङ
हिमेश

काठमाडौँ — लिग सुरु हुनुअगाडि नै प्रशिक्षक मेघराज केसीले दाबी गरेका थिए, माथिल्लो डिभिजनमा नवप्रवेशी सातदोबाटो युवा क्लबको प्रदर्शन गर्विलो हुनेछ । नवौं चरणमा शुक्रबार सातदोबाटोले मनाङ मर्स्याङ्दीमाथि प्राप्त गरेको जित यस्तै रह्यो । मन छुने खालको जित । कीर्तिमान आठपल्टको विजेता मनाङमाथि प्राप्त सातदोबाटोको यो सफलतालाई धेरै पछाडिसम्म प्रसिद्ध जितका रूपमा सम्झिइनेछ । भाग्यले साथ दिएको भए सातदोबाटोले ५ गोल गर्नुपर्ने थियो ।

मनाङको प्रदर्शन यति साह्रो किन खराब रह्यो त ? यसको उत्तर दुई प्रकारले दिन सकिन्छ । पहिलो, मनाङको टिम अहिले ठूलै समस्यामा छ । त्यसो भनेको टोलीका ५ देखि ६ खेलाडी कोभिड–१९ बाट संक्रमित भएका छन् । त्यसैले टिमले राम्रो खेल्न सकेन । यो तात्कालिक कारण भयो । दोस्रो कारण भने गम्भीर छ । सातदोबाटो प्रशिक्षक केसीकै अनुसार पनि अहिलेको मनाङ खासमा राम्रो टिम नै होइन, त्यसैले सातदोबाटोले अहिले प्राप्त जितलाई स्तब्धपूर्ण पनि भन्नुपर्दैन, किनभने यो स्वाभाविक नतिजा हो ।

यो यस्तो नतिजा हो, जुन लिग उपाधि होडमा निर्णायक हुनसक्छ । मनाङको यो अहिलेको लिगमा दोस्रो हार हो । यससँगै टिम १९ अंकमै सीमित रह्यो । डिफेन्डिङ च्याम्पियन मछिन्द्रसँग २० अंक छ । टोलीले नवौं चरणको खेलमा जित निकालेर मनाङमाथि ४ अंकको ठोस अग्रता लिन सक्छ । यस्तोमा मनाङको यो हारले मछिन्द्रलाई धेरै हदसम्म उत्साहित बनाउने छ । मनाङ आफैंका लागि भने यो निकै खराब नतिजा रहनेछ ।

मनाङका प्रशिक्षक टोपे फुजाले पनि माने, आफ्नो टिमले खेल्नै सकेन । उनले भने, ‘हाम्रो प्रदर्शन वास्तवमै खराब रह्यो, विशेषतः पहिलो हाफमा । दोस्रो हाफमा केही सुधारिएको खेल प्रदर्शन गरे पनि यो खेलमा फर्कन पर्याप्त रहेन । हाम्रा ५–६ खेलाडी कोभिडबाट संक्रमित छन्, त्यसैले क्लब आफैं संकटमा छ । अब लिग एक महिना रोकिने छ र यो हाम्रा लागि ठूलो राहतका रूपमा रहनेछ ।’

लिग उपाधिबाट आफ्नो टिम टाढिएको भने उनले मानेनन् । उनले भने, ‘लिगमा अझै केही चरणका खेल बाँकी छन्, त्यसैले अहिले नै यस्तै हो भनेर भन्न हतार हुन्छ । तर हाम्रा लागि अहिलेको हार ठूलो धक्का हो । हेरौं, अबका दिनमा के हुने हो ।’ यो जितपछि सातदोबाटोको भने १२ अंक भएको छ । टोली छैटौं स्थानमा उक्लेको छ । आकर्षक सुरुआत लिएको सातदोबाटोले लिगको चौथो चरणयता जित निकाल्न सकेको थिएन । तर मनाङलाई हराएयता अब सातदोबाटोले शीर्ष चारका लागि प्रयास गर्न सक्नेछ ।

तीन अफ्रिकी खेलाडीको गोल

दशरथ रंगशालामा भएको यो खेलको विशेषता रह्यो । सम्भव भएका तीनै गोल अफ्रिकी मूलका खेलाडीको नाममा रह्यो । सातदोबाटोले ११ औं मिनेटमा मार्टिन एडेल्फे सिलोको गोलमा अग्रता लिएको थियो । आकाश बुढामगरको कर्नरमा सुदीप गुरुङले हेडबाट उपलब्ध गराएको पासमा एडेल्फेले नजिकको दूरीबाट गोल गरे । अजयी मार्टिन्सले ३८ औं मिनेटमा दोस्रो गोल थपे । प्रशान्त अवस्थीको क्रममा अनमार्क रहेका अजयीले हेड गर्दै सजिलै गोल गरे ।

प्रशिक्षक केसीले यस खेलका लागि अजयीलाई मिडफिल्डबाट उतार्दै गोल गर्नका लागि उनलाई उत्प्रेरित राखेका थिए । अजयीको यो पाँचौं व्यक्तिगत गोल हो । यससँगै सर्वाधिक गोलकर्ताको सूचीमा उनी दोस्रो स्थानमा रहे । मनाङका लागि ५७ औं मिनेटमा ओलावाले आफिजले एक गोल फर्काए । पूजन उपरकोटीको कर्नरलाई सातदोबाटोका डिफेन्डरले राम्रोसँग क्लियर गर्न नसकेपछि ओलावालेले गोल गरेका हुन् । ओलावालेको यो छैटौं व्यक्तिगत गोल हो ।

एपीएफलाई ठूलो राहत

नवौं चरणको पहिलो खेलमा एपीएफ क्लबले हिमालयन शेर्पालाई हरायो । यो जितपछि एपीएफमाथि रहेको रेलिगेसनको डर लगभग समाप्त भएको छ । प्रशिक्षक कुमार थापाकै भाषामा भन्दा अब एपीएफले लिगमा मज्जाले श्वास फेर्न सक्नेछ । उनले भने, ‘यो खेलमा पराजित भएको भए हामीलाई निकै गाह्रो हुन्थ्यो । त्यसैले हाम्रा लागि यो खेल निकै महत्त्वपूर्ण थियो र यसमा जित आवश्यक थियो । त्यसैले पनि यो जितमा हामी खुसी छौं ।’ दशरथ रंगशालामै भएको खेलमा आवास लामिछानेले निर्णायक गोल गरेका थिए । उनले दोस्रो हाफको इन्ज्युरी समयको पहिलो मिनेटमा नवीन लामाको कर्नरलाई हेड गर्दै उत्कृष्ट गोल गरे । यो जितपछि एपीएफको १० अंक भएको छ । टोली नवौं स्थानमा उक्लेको छ । एपीएफ अब रेलिगेसन क्षेत्रबाट ५ अंकले अगाडि रह्यो । हिमालयन भने ११ अंकमा सातौं स्थानमा झरेको छ । एपीएफविरुद्ध पूरा खेल अवधिमा हिमालयनले निकै कमजोर प्रदर्शन गरेको थियो ।

खेलपछि प्रशिक्षक युगलकिशोर राईले आफ्ना खेलाडीको प्रदर्शन निकै खराब रहेको बताए । उनले भने, ‘यो खेलमा हाम्रो प्रदर्शन वास्तवमै निकै खराब रह्यो । नवौं चरण आइपुग्दा यो नै हाम्रो सबैभन्दा तल्लो स्तरको खेल हो । हाम्रा खेलाडीले धेरै गल्ती गरे । हाम्रो आजको खेल सामान्य स्कुलको टिमविरुद्ध पनि हार बेहार्ने खाले रह्यो । एपीएफले जुन प्रकारको रणनीतिले खेलेको थियो, त्यसविरुद्ध खेल्न हामी चुक्यौं । अबका खेल हाम्रा लागि गाह्रो हुने निश्चित छ ।’

प्रकाशित : माघ १, २०७८ ०७:५५
प्रतिक्रिया
पठाउनुहोस्

माघ २ गतेदेखि कोरोनाविरुद्ध बुस्टर मात्राको खोप दिइने

माघ २ गतेदेखि अग्रपंक्तिमा खटिने र माघ १४ गतेदेखि ६० वर्षमाथिका र खोपको पूर्ण मात्रा लगाएको ६ महिना भएकालाई बुस्टर मात्रा दिइने
कान्तिपुर संवाददाता

काठमाडौँ — सरकारले माघको पहिलो हप्तादेखि कोरोना भाइरसविरुद्धको बुस्टर मात्रा खोप दिने भएको छ । स्वास्थ्य मन्त्रालयका अनुसार पुस २८ गते माघको पहिलो हप्तादेखि बुस्टर मात्रा दिने मन्त्रीस्तरीय निर्णय भएको हो ।

स्वास्थ्य मन्त्रालयले ७ वटै प्रदेश स्वास्थ्य निर्देशनालय, प्रदेश स्वास्थ्य आपूर्ति व्यवस्थापन केन्द्र र ७७ वटै स्वास्थ्य कार्यलयलाई पत्र लेख्दै बुस्टर मात्राको खोप लगाउन निर्देशन दिएको छ । माघ २ गतेदेखि अग्रपंक्तिमा खटिने व्यक्ति र माघको १४ गतेदेखि ६० वर्षमाथि र खोपको पूर्ण मात्रा लगाएको ६ महिना पूरा भएका व्यक्तिलाई बुस्टर मात्राको खोप दिइने स्वास्थ्य मन्त्रालयले जानकारी दिएको छ । बुस्टर मात्रामा पहिले लगाएकै खोप दिइने पनि मन्त्रालयले जानकारी दिएको छ ।

सरकारले अहिलेसम्म २ करोड ७४ लाख ७५ हजार ९ सय ९५ मात्रा खोप लगाइसकेको छ । त्यसमध्ये कम्तीमा एक मात्रा लगाउनेको संख्या १ करोड ५६ लाख ६ हजार २१ र पूर्ण मात्रा लगाउनेको संख्या १ करोढ १८ लाख ६९ हजार ९ सय ७४ रहेको मन्त्रालयले जनाएको छ ।

अहिलेसम्म विभिन्न मुलुकबाट खरिद गरिएको र सहयोगस्वरूप प्राप्त गरी नेपालमा कुल ४ करोड ३ लाख ८८ हजार ८ सय ४० मात्रा खोप प्राप्त भएको छ ।

प्रकाशित : माघ १, २०७८ ०७:५३
पूरा पढ्नुहोस्
प्रतिक्रिया
पठाउनुहोस्
x
×