टाइगर कप भलिबल : आर्मी र हेल्प नेपाल फाइनलमा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

टाइगर कप भलिबल : आर्मी र हेल्प नेपाल फाइनलमा

कान्तिपुर संवाददाता

पोखरा — त्रिभुवन आर्मीको महिला र पुरुषतर्फ दुवै टोली दोस्रो टाइगर कप आमन्त्रित खुल्ला क्लब च्याम्पियनसिप भलिबल प्रतियोगिताको फाइनल पुगेका छन् ।

पुरुषतर्फ शीर्षस्थानमा रहेको पुलिसलाई राउन्ड रोबिन लिगको अन्तिम खेलमा शुक्रबार विभागीय डर्बीमा आर्मीले ३–० को सोझो सेटमा पाखा लगायो । आर्मीले २५–१५, २५–१८, २५–१३ ले सेट जितेको थियो । पराजयसँगै पुलिस तेस्रो स्थानमा खुम्चियो । आर्मीले ९ अंकसहित लिगमा दोस्रो स्थान बनाएर फाइनल प्रवेश गर्दा पहिलो स्थानमा भने १० अंकसहित टिपटप हेल्प नेपाल स्पोटर््स क्लब छ ।

शुक्रबार हेल्प नेपालले साविक विजेता गण्डकी प्रदेशलाई २५–१८, २५–१५, २५–२३ को सेटमा पन्छाउँदै फाइनल सुनिश्चित गरेको हो । शनिबार आर्मी र हेल्प नेपालबीच फाइनल हुनेछ ।

महिलातर्फ दुई विभागीय डर्बीमै फाइनल प्रतिस्पर्धा हुने भएको छ । उपाधिका लागि आर्मी र एपीएफ भिड्ने छन् । शुक्रबार आर्मीले पुलिस क्लबलाई ३–१ को सेटमा पराजित गर्दै फाइनल यात्रा तय गर्‍यो । पहिलो सेट २१–२५ ले गुमाएको आर्मीले बाँकी ३ सेटमा पुलिसलाई कुनै मौका दिएन । लगातार तीन सेट २५–१८, २५–२०, २५–१८ ले आर्मीले आफ्नो पक्षमा पार्‍यो ।

आयोजक टाइगर ग्रुपलाई एपीएफले ३–१ कै सेटमा हराएर फाइनलमा आफ्नो स्थान सुरक्षित बनायो । पहिलो दुई सेट २५–१४, २५–२० ले जितेको एपीएफले तेस्रो सेट जोगाउन नसक्दा २३–२५ ले टाइगर ग्रुपलाई सुम्पिनुपर्‍यो । प्रतिस्पर्धात्मक चौंथो सेट २८–२६ ले रक्षा गर्दै एपीएफले फाइनलमा स्थान बनायो ।

प्रकाशित : पुस ३०, २०७८ २०:२४
प्रतिक्रिया
पठाउनुहोस्

ओमिक्रोन संक्रमण रोकथाम आदेश जारी

कान्तिपुर संवाददाता

काठमाडौँ — सरकारले कोभिड–१९ को तेस्रो लहर रोकथाम तथा नियन्त्रणका लागि माघ मसान्तसम्म लागू हुने गरी आदेश जारी गरेको छ । सिंहदरबारमा शुक्रबार बसेको मन्त्रिपरिषद् बैठकले कोभिड–१९ को नयाँ भेरिएन्ट ओमिक्रोनको संक्रमण फैलिन नदिन एक महिने आदेश जारी गरेको हो ।

शुक्रबारको बैठकले ‘कोभिड–१९ महामारीको तेस्रो लहर रोकथाम तथा नियन्त्रण आदेश ०७८’ जारी गरेको एक मन्त्रीले जानकारी दिए । उनका अनुसार आदेशमा यसअघि कोभिड–१९ संकट व्यवस्थापन केन्द्रबाट सिफारिस भएका विषयहरु नै समेटिएका छन् ।

आदेशमा माघ मसान्तसम्म सार्वजनिक स्थलमा भीडभाड गर्न नपाइने, आमसभा, जुलुस र सभा सम्मेलन गर्न नपाइने, सपिङ मल, डिपार्टमेण्ट स्टोरहरूमा एक पटकमा २५ जनाभन्दा बढी मान्छेहरूको भीड नहुने गरी सञ्चालन गर्नुपर्ने तथा स्वास्थ्य मापदण्ड पालनामा कडाई गर्नेलगायत विषय समेटिएका छन् ।

मन्त्रिपरिषद् बैठकले पूर्वनिर्धारित विश्वविद्यालय र जनशक्ति भर्नासम्बन्धी परीक्षाहरू स्वास्थ्य मापदण्ड अपनाएर सञ्चालन गर्ने, तर नियमित पठनपाठनलाई भने भर्चुअल माध्यमबाट सञ्चालनका लागि प्रोत्साहित गर्ने निर्णय गरेको छ ।

त्यस्तै, खोप अभियानलाई प्रभावकारीरुपमा र प्राथमिकताका साथ सञ्चालन गर्ने निर्णय गरेको ती मन्त्रीले जानकारी दिए ।

प्रकाशित : पुस ३०, २०७८ २०:२१
पूरा पढ्नुहोस्
प्रतिक्रिया
पठाउनुहोस्
×