विवादको भुमरीबीच नेसन्स कप
जोहानेसबर्ग — अफ्रिकी फुटबलको सबैभन्दा ठूलो प्रतियोगिता अफ्रिकन कप अफ नेसन्स आइतबारदेखि क्यामरुनमा सुरु हुँदै छ । यो स्पर्धा हुनेछ विवादको भुमरीबीच । विवाद कस्तो भने गलत समयमा भएको प्रतियोगिताका लागि खेलाडीको बोलावट, आयोजक देशको तयारीमा कमजोरी अनि कोरोना भाइरस संक्रमण महामारीको सम्भावित अर्को लहर । एउटा तथ्य पक्कै निश्चित छैन । यो हो, फेब्रुअरी ६ मा फाइनल हुनेछ, सम्भावित विजेताबारे पटक्कै अनुमान गर्न सकिन्न ।
यो प्रतियोगिताको विशेषता भनेकै बलियो मानिएका टिमको कमजोर प्रदर्शन छ । त्यसैले केही पनि भविष्यवाणी गर्न गाह्रो छ । अल्जेरिया प्रतियोगिताको डिफेन्डिङ च्याम्पियन हो । सन् २०१९ मा इजिप्टमा भएको पछिल्लो प्रतियोगितायता यो टिम अपराजित थियो । यो निकै लामो छ । टिम आफैं म्यानचेस्टर सिटीका रियाद महारेजको नेतृत्वमा छ । पछिल्ला २४ महिनामा यो टिमले बिरलै कुनै बलियो चुनौती र अवस्थाको सामना गर्नुपरेको छ ।
तर, प्रतियोगितामा अल्जेरियाले बलियोभन्दा बलियो चुनौती सामना गर्नुपर्नेमा दुविधा रहने छैन । इजिप्ट, मोरक्को र ट्युनिसियासँग अन्य उत्तर अफ्रिकी देश पनि उपाधिका बलिया प्रत्याशी हुन्, तर यी सबै टिमले पछिल्ला संस्करणमा राम्रो गर्न सकेका छैनन् । त्यसमध्ये पनि मोरक्को यसअघि पनि प्रतियोगितामा बलियो प्रत्याशी रहेको थियो । तर, प्रत्येकपल्ट टोलीको प्रदर्शन निराशाजनक साबित भएको छ । पश्चिमी अफ्रिकी देश घाना, आइभोरी कोस्ट र नाइजेरिया सबै पूर्वविजेता हुन् ।
त्यसैले यी टिममा सबैको नजर हुनेछ, तर यी टिमको प्रदर्शन पनि पछिल्लो समय ठीक छैन । गत महिनामात्रै नाइजेरियाले आफ्ना प्रशिक्षक ग्रेनोट रोहरलाई बर्खास्त गरेको थियो । विश्वकप छनोटको समूह चरणमा विजेता रहे पनि त्यसपछि टिमको लगातार खराब प्रदर्शनपछि प्रशिक्षकले आफ्नो जिम्मेवारी गुमाएका हुन् । आयोजक क्यामरुन पनि उत्तिकै खराब लयबाट गुज्रिइरहेको छ । टोलीमाथि पनि आफ्नो घरमा राम्रो प्रदर्शनका लागि चर्को दबाब रहनेछ ।
विश्वकप छनोटमा नोभेम्बरमै मात्र आइभोरी कोस्टलाई हराएको हुनाले टिम आफैं पनि उत्साही छ । सेनेगल सन् २०१९ को उपविजेता हो, त्यसैले यो पनि उपाधिका लागि सबल दाबेदार रहनेछ । फ्रान्समा जन्मेहुर्केका सेनेगली मूलका खेलाडीलाई टिममा भित्र्याउन सफल रहेका हुनाले यो टिम अत्यधिक बलियो देखिएको हो । लिभरपुलका साडियो मानेले टिमका लागि महत्त्वपूर्ण भूमिका निभाउन सक्नेछन्, देशलाई पहिलो अफ्रिकन कप अफ नेसन्स उपाधि दिलाउन ।
प्रतियोगिता आयोजकदेखि सबै सहभागी र अफ्रिकी फुटबलप्रेमीको एउटै इच्छा हो, यसक्रममा कोभिड–१९ को महामारी चर्को नहोस् । देश फर्केका केही प्रमुख खेलाडी यसैबाट संक्रमित पाइएपछि धेरै टिमको तयारी कमजोर बनेको छ ।
प्रकाशित : पुस २५, २०७८ ०७:२५
