चट्टानले जिते हेभिवेट उपाधि
सिन्धुपाल्चोक — २ लाख ६५ हजार पुरस्कार राशिको ‘सेकेन्ड आरडब्लू स्ल्याम रेस्लिङ’ को हेभिवेट रेस्लरको बेल्ट चौतारा साँगाचोकगढी नगर चौताराका चट्टानले जितेका छन् ।
जिल्ला समन्वय समितिको प्रायोजनमा नेपाल रिङ रेस्लिङ एसोसिएसनद्वारा आइतबार मेलम्ची नगरपालिका, पाँचपोखरी र इन्द्रावती गाउँपालिकाको सीमाभेग गुफाडाँडामा आयोजित प्रतियोगिताको ‘आरडब्लू हेभिवेट म्याच’मा उनले चर्चित रेस्लर साइमलाई हराएका थिए ।
मिडिलवेटमा फिट रेस्लर डेभिडले यूबीएल स्टोनलाई पछार्दै मिडिल हेभिवेट बेल्ट हत्याए । रिङबाट केही समय बाहिरिए पनि उनले जितेर छाडे । ‘हार्डकोर म्याचमा किङ रोबर्टले उत्साही नुवाकोट टाइगरलाई धेरै समय लगाएर हराउनुपर्यो । अधिक समय रिङबाहिर दौडाएर दुवैबीच घमासान खेल चल्यो । टाइगरले टेबल, फलामे कुर्सीले रोबर्टलाई प्रहार गरेर थकित बनाए पनि रोबर्टले रिङभित्र हराएर छाडे ।
रेस्लिङ म्याचभरकी एक्ली महिला रेस्लर तन्नुले सिजे वर्ल्डलाई पछार्दै लाइटवेट च्याम्पियन उपाधि जितिन् । उनले आफूलाई जिस्काइरहेका वर्ल्डलाई लक लगाएर रिङमा धकेल्दै गलाइन् । सुरुमा कमजोर देखिएकी उनले अन्तिममा जित हासिल गरिन् । रेस्लिङ विधाको रोचक खेल ट्याग टिममा योङ्ग स्याडी, एक्स हिरो र बाका गरी तीन प्रतिस्पर्धी थिए । उपाधिका लागि तीन जनाको रिङभित्र रोचक घम्साघम्सी चल्यो, अन्तिममा एक्स हिरो रिङबाट बाहिरिए, छोटो समयमा बाकालाई हराएर स्याडीले ‘ट्याग टिम’ उपाधि जिते ।
जिल्ला समन्वय समितिका अनुसार हेभिवेटले ७५ हजार, मिडिलवेटले ५० हजार, हार्डकोरले ६५ हजार, लाइटवेटले ३५ हजार र ट्याग टिमका विजेताले ४० हजार रुपैयाँ पुरस्कार पाए । पूर्वमन्त्री शेरबहादुर तामाङ, मेलम्चीका मेयर डम्बर अर्याललगायतले पुरस्कृत गरे । चार वर्षअघि ७७ जिल्लाका समन्वय समितिको प्रमुख–उपप्रमुखको उपस्थितिमा जलवायु सम्मेलन भएको गुफाडाँडामा रेस्लिङ प्रतियोगिता गरिएको जिल्ला समन्वय समितिका प्रमुख कृष्णगोपाल तामाङले बताए ।
जिल्लामा मुस्किलले हुने रेस्लिङ हेर्न स्थानीय र अन्यको भीड लागेको थियो । ‘गुफाडाँडाको पर्यटन प्रवर्द्धन होस् भनेर यो खेल आयोजना गरिएको हो, यसले जिल्लाको पर्यटन र खेलमा सघाउ पुग्ने विश्वास छु,’ उनले भने ।
प्रकाशित : पुस २०, २०७८ ०७:१२