पाकिस्तानका पूर्वकप्तान मोहम्मद हफीजले लिए अन्तर्राष्ट्रिय क्रिकेटबाट संन्यास- खेलकुद - कान्तिपुर समाचार

पाकिस्तानका पूर्वकप्तान मोहम्मद हफीजले लिए अन्तर्राष्ट्रिय क्रिकेटबाट संन्यास

कान्तिपुर संवाददाता

काठमाडौँ — पाकिस्तानी अलराउन्डर तथा पूर्वकप्तान मोहम्मद हफीजले अन्तर्राष्ट्रिय क्रिकेटबाट संन्यास लिएका छन् । सन् शारजाह रंगशालामा सन् २००३ अप्रिल ३ मा जिम्बाब्वेविरुद्ध डेब्यु गरेका हफीज एकदिवसीय बलिङतर्फ नम्बर एकमा समेत पुगेका थिए ।

उनले पाकिस्तानलाई सन् २०१७ मा आईसीसी च्याम्पियन्स ट्रफीको उपाधि दिलाएका थिए । पाकिस्तानबाट उनले ३९२ अन्तर्राष्ट्रिय खेल खेलेका छन् । उनले १२, ७८० रन बनाएका छन् भने २५३ विकेट लिएका छन् । उनले ३२ वटा खेलमा पाकिस्तानको कप्तानीसमेत गरेका छन् ।

उनले सन् २००७, २०११ र २०१९ मा ओडीआई विश्वकप र २००७, २०१०, २०१२, २०१४, २०१६ र २०२१ मा ट्वान्टी-२० विश्वकप खेलेका छन् । त्यस्तै २००६, २०१३ र २०१७ मा आईसीसी च्याम्पियन्स ट्रफीमा सहभागी भएका थिए ।

संन्यासको घोषणा गर्दै हफीजले भनेका छन्, 'आज गर्व र खुसीसाथ मैले अन्तर्राष्ट्रिय संन्यासको घोषणा गर्दैछु । सुरुमा मैले सोचेभन्दा पनि सफलता हात पारेको छु । मेरो खेलजीवनमा विभिन्न तरिकाले सहयोग गर्ने सबै खेलाडी, क्याप्टेन, सपोर्ट स्टाफ र पाकिस्तान क्रिकेट बोरडलाई धन्यवाद दिन चाहन्छु । '

पाकिस्तानी क्रिकेट बोर्डका अध्यक्ष रमिज राजाले हफीजले क्रिकेटको अलग-अलग फर्म्याटमा आफूलाई कुशलतापूर्वक ढाल्दै गएको र ट्वान्टी-२० स्पेसलिस्ट बनेको बताएका छन् ।

प्रकाशित : पुस १९, २०७८ १३:३६
प्रतिक्रिया
पठाउनुहोस्

अर्थ समितिलाई कृषि सचिवको जवाफ: कर्मचारी अभाव हुँदा बजेट खर्च गर्न सकेनौं

कान्तिपुर संवाददाता

काठमाडौँ — कृषि तथा पशुपन्छी विकास मन्त्रालयका सचिव गोबिन्दप्रसाद शर्माले बिनियोजित वार्षिक बजेट खर्च हुन नसक्नुमा कर्मचारी अभाव सबैभन्दा ठूलो समस्या रहेको बताएका छन् । सोमबार अर्थ समिति बैठकमा बोल्दै कृषि सचिव शर्माले मन्त्रालय र मातहतका निकायमा कर्मचारी पर्याप्त नरहेको गुनासो गरे । 

'पुँजीगत खर्च हुन नसक्नुको मुख्य कारण कर्मचारी अभाव हो । ४५ प्रतिशतभन्दा कम कर्मचारीले काम गरिरहेका छौं' उनले भने 'मन्त्रालयअन्तर्गत सबैभन्दा बढी बजेट छुट्याइएको प्रधानमन्त्री कृषि आधुनिकरण परियोजनामै कर्मचारी छैनन् । यता कर्मचारी पठाए उता रिक्त हुने, उता पठाए यता खाली हुने अवस्था छ ।'

त्यस्तै, वार्षिक योजना तथा कार्यक्रमको पूर्व तयारीबिनै बजेट छुट्याइनु र त्यस्ता कार्यक्रममा श्रोत सुनिश्चितता नहुनु पनि समस्या रहेको उनले बताए ।चालू आर्थिक वर्षमा कृषि मन्त्रालयले ६५-७० प्रतिशत मात्रै पुँजीगत खर्च गर्न सक्ने अनुमान गरिएको पनि उनले बताए ।

प्रकाशित : पुस १९, २०७८ १३:३२
पूरा पढ्नुहोस्
प्रतिक्रिया
पठाउनुहोस्
×