'ए' डिभिजन लिग : आज तीन खेल हुँदै
काठमाडौँ — सहिद स्मारक 'ए' डिभिजन लिग ०७८ मा शनिबार सातौं चरणका तीन खेल हुनेछन् । दशरथ रंगशालामा हुने पहिलो खेलमा थ्री स्टारले जावलाखेल युथ क्लबको सामना गर्नेछ ।
थ्री स्टार ६ खेलबाट ७ अंक जोडेर आठौं स्थानमा छ । यस्तै, जावलाखेल ६ खेलबाट समान ७ अंकमा नवौं स्थानमा छ । मनाङ मर्स्याङ्दी र ब्रिगेड ब्वाइजबीच पोखरामा अर्को खेल हुनेछ ।
मनाङ ६ खेलबाट १३ अंकसहित दोस्रो स्थानमा छ । उसमाथि एएफसी कप छनोट खेल्नका लागि यो खेल जित्नै पर्ने दबाब छ । ब्रिगेड ब्वाइज ६ खेलबाट ५ अंकमा १२ औं स्थानमा छ ।
दिनको तेस्रो खेल दशरथ रंगशालामा हुनेछ । त्यस खेलमा संकटा र च्यासल भिड्ने छन् । संकटाको ६ खेलबाट १२ अंक छ र तेस्रो स्थानमा छ । च्यासल भने समान ६ खेलबाट ४ अंकमै सीमित रहेर १३ औं स्थानमा छ ।
प्रकाशित : पुस १७, २०७८ ०८:००