काठमाडौँ — नेपालले एसीसी यू–१९ एसिया कप क्रिकेटमा सहभागिताको रूपमा मात्र नभई फाइनल पुग्ने लक्ष्य बनाएको छ । यूएईमा हुने यू–१९ एसिया कपमा सहभागिता जनाउन नेपाल यू–१९ टोली सोमबार राति त्यसतर्फ गएको छ ।

नेपाल समावेश समूह ‘बी’ मा बंगलादेश, श्रीलंका र कुवेत रहेका छन् । समूह ‘बी’ का सबै खेल शारजहाँमा हुनेछ । डिसेम्बर २३ देखि ३१ सम्म हुने यू–१९ एसिया कपको समूह ‘ए’ मा रहेका भारत, पाकिस्तान, अफगानिस्तान र यूएईले सबै खेल दुबईमा खेल्नेछन् । डिसेम्बर ३० मा दुबई र शारजहाँमा सेमिफाइनल तथा ३१ मा दुबईमा फाइनल खेल हुने तालिका छ ।

एसियाली क्रिकेट परिषद् (एसीसी) को आयोजनामा हुने प्रतियोगितामा नेपालले पहिलो दिन बंगलादेशसँग खेल्नेछ । त्यस्तै डिसेम्बर २५ मा यूएई र २८ मा कुवेतसँग खेल्नेछ । नेपालले यू–१९ एसिया कपमा सहभागी हुन अघिल्लो साता वाइवाइ यू–१९ राष्ट्रिय प्रतियोगिता गरेर नेपालको टोली बनाएको थियो ।

एसीसी यू–१९ एसिया कप क्रिकेटमा नेपालको सहभागिता मात्र नभई उपाधि लक्ष्य भएको प्रशिक्षक वसन्त शाही र कप्तान देव खनाल बताउँछन् ।

‘यू–१९ एसिया कपलाई हामीले सहभागिताको हिसाबमा मात्र हेर्न हुँदैन । एउटा अनुभवको पाटो त छँदै छ । युवा खेलाडीले त्यसमा सहभागिता भएर पाउने अनुभव हो । तर हाम्रो पहिलो लक्ष्य टेस्ट खेल्ने राष्ट्रलाई आश्चर्यचकित बनाएर नकआउट चरणमा पुग्नु नै हुनेछ,’ प्रशिक्षक शाहीले भने । कप्तान देवले पनि प्रशिक्षककै भनाइमा सहमत छन् ।

यो यू–१९ एसिया कपको नवौं संस्करण हो । भारतले सात संस्करण जितेको छ, त्यसमा एकपल्ट पाकिस्तानसँग संयुक्त विजेता बनेको थियो । अर्कोर् एकपल्ट यो प्रतियोगिता जित्ने टोली अफगानिस्तान हो । अफगानिस्तानले सन् २०१७ मा मलेसियामा सम्पन्न फाइनलमा पाकिस्तानलाई १ सय ८५ रनले पराजित गरेको थियो । नेपाल एकपल्ट सेमिफाइनलमा पुगेको त्यही संस्करणमा मात्र हो । अन्यथा नेपाल सहभागितामै सीमित रहँदै आएको छ ।

विगतमा नेपाल धेरैपल्ट बलियो मानिएको भारत, पाकिस्तानको समूहमा पर्दै आएको थियो । यसपालि नेपालले फरक प्रतिद्वन्द्वी पाएकाले पनि मनोबल उच्च देखिएको हो त ? प्रशिक्षक शाही असहमत रहे, ‘श्रीलंका र बंगलादेशलाई कदापि कमजोर ठानेका छैनौं । बंगलादेश पछिल्लो पटक यू–१९ विश्वकपको च्याम्पियन हो । हामी डिफेन्डिङ च्याम्पियनको समूहमा छौं, त्यो पनि सोच्नुपर्छ ।’

श्रीलंका टोली इंग्ल्यान्डसँग ५ एकदिवसीय खेलको शृंखला खेलेर यूएई पुगेको छ । एक्सपोजर नपाए पनि नेपालको तयारी राम्रो भएका प्रशिक्षक शाही मान्छन् । ‘वास्तवमा तयारीका लागि समय त्यति थिएन, १२–१३ दिनको क्याम्प गर्‍यौं । यो समयमा हाम्रा जति पनि कमिकमजोरी थिए त्यसलाई सुधारेर टिम राम्रो बनाएका छौं,’ शाहीले भने, ‘यू–१९ राष्ट्रिय प्रतियोगिता जसरी राउन्ड रोबिन हिसाबमा भयो, त्यसले पनि तयारीलाई राम्रो साथ दियो । अन्तिममा भए पनि हामीले एपीएफ र पुलिससँग दुई अभ्यास खेल खेल्यौं, त्यसले पनि तयारी सृदुढ बनाएको छ ।’

उनले नेपालको ब्याटिङ पक्ष सबल रहेको सुनाए । ‘यू–१९ राष्ट्रिय प्रतियोगितामा जसरी रनहरू बन्यो, तीन शतक बने, थुप्रै अर्धशतक बने । नेपालको ब्याटिङ जहिल्यै पनि कमजोर रहन्छ भन्दै आइएको थियो, अहिले ब्याटिङ स्ट्रेन्थ राम्रो देखेको छु । बलिङमा अलिकति काम गर्नुपर्ने देखिन्छ,’ उनले भने ।

कप्तान देव पनि क्याम्प राम्रो भएको र सबैको प्रयास राम्रो रहेको जनाउँछन् । नेपाली यू–१९ टोलीमा रहेका तीव्र गतिका बलर गुलशन झाले सेप्टेम्बरमा नेपाली राष्ट्रिय टोलीबाट ओमानमा विश्वकप लिग २ खेलेका थिए । टोलीका अरू धेरै खेलाडी पहिलो पटक अन्तर्राष्ट्रिय यात्रामा निस्केका हुन् । देवको पनि यो पहिलो अन्तर्राष्ट्रिय प्रतियोगिता हो । त्यसमा उनले कप्तानी गरिरहेका छन् । ‘कप्तानी लिनु एउटा जिम्मेवारी हो, जुन जिम्मेवारी मैले पाएको छु, त्यो धेरैको सपना नै हुन्छ,’ छनोटको आधार रहेको यू–१९ राष्ट्रिय प्रतियोगितामा चार अर्धशतक बनाएका उनले भने ।

२० सदस्यीय नेपाली टोलीमा १५ खेलाडी र ५ अफिसियल छन् । तर एक खेलाडीमा कोभिड–१९ को शंका देखिएपछि नेपाल एक खेलाडी कम लिएर यूएई गएको हो ।