अस्ट्रेलियाको जित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

अस्ट्रेलियाको जित

एएफपी

ब्रिसबेन — अस्ट्रेलियाले इंग्ल्यान्डमाथि पहिलो टेस्टमा ९ विकेटको जित हासिल गर्दै एसेज शृंखलामा १–० को अग्रता लिएको छ । इंग्ल्यान्डलाई दोस्रो इनिङ्समा २ सय ९७ रनमा अलआउट पारेपछि अस्ट्रेलियालाई जितनिम्ति २० रन आवश्यक थियो ।

भेट्रान अफ स्पिनर नाथन लायनले ४ सय टेस्ट विकेट पुर्‍याएको खेलमा अस्ट्रेलियाका लागि मार्कस ह्यारिसले विजयी चौका प्रहार गर्दै ५.१ ओभरमै जित दिलाए । ओपनिङ ब्याटिङ गरेका एलेक्स केरी ९ रनमा आउट भए ।

नियमित ओपनर डेविड वार्नर पहिलो इनिङ्समा चोटग्रस्त भएपछि केरीले उपल्लो क्रमको जिम्मेवारी पाएका हुन् । टेस्ट कप्तानीको पहिलो खेलमै अस्ट्रेलियालाई जित दिलाएपछि प्याट कमिन्सले भने, ‘यसपल्ट धेरै कुरा सकारात्मक रह्यो । सबैजना मलाई हेरेर मुस्कुराइरहेका छन् । वास्तवमा मलाई सबैप्रति गर्व छ । मेरो विचारमा यो हाम्रो पूर्ण प्रदर्शन थियो ।’

गावामा ब्याट र बल दुवैमा ध्वस्त बनेको इंग्ल्यान्डले आफूलाई फेरि संगठिन गर्नुपर्नेछ । पहलो इनिङ्समा १ सय ४७ रनमै अलआउट इंग्ल्यान्ड बलमा पनि सकारात्मक प्रदर्शन गर्न असफल रह्यो । प्लेयर अफ द म्याच ट्राभिस हेड (१५२), वार्नर (९४) र मार्नस लावुसचेन (७४) ले इंग्लिस बलरमाथि धावा बोले ।

विशेष गरी बायाँहाते स्पिन ज्याक लिच सबैभन्दा बढी निशानामा परे । पाहुना टोलीले तेस्रो दिन कप्तान जो रुट र डेभिड मलानबीच एक उत्कृष्ट साझेदारीले पुनरागमन प्रयास गरेको थियो । अघिल्लो दिन अविजित दुवै ब्याटर शनिबार छिट्टै आउट भए । तब इंग्लिस ब्याटिङक्रम तीव्र गतिमा पतन भयो ।

‘निराशाजनक रह्यो । हामीले यो खेललाई नियन्त्रणमा लिन वास्तवमै कडा मिहिनेत गरेका थियौं । चौथो दिनको पहिलो सत्र कति महत्त्वपूर्ण हुन्छ भन्ने हामीले राम्ररी बुझेका थियौं,’ इंग्लिस कप्तान रुटले भने, ‘हामीले नयाँ बलमा राम्ररी खेलेर साझेदारी अगाडि बढाउन सकेको भए विपक्षीमाथि प्रतिस्पर्धात्मक स्कोर खडा गर्न सक्थ्यौं ।’ इंग्ल्यान्डले २२०–२ को स्थितिबाट दिनको सुरुआत गरेको थियो । शनिबार चौथो दिन पहिलो सत्रमा ७७ रन जोड्दा बाँकी विकेट गुमायो । गावामा बिजुलीको समस्याका कारण ४५ मिनेटको खेल टेलिभिजनबाट प्रशारण हुन पाएन । त्यो अवधिमा कुनै पनि विकेट गएन ।

३४ वर्षीय अफ स्पिनर लायन शुक्रबार आफ्नो टेस्ट करिअरको ४ सय विकेटको कोसेढुंगा पार गर्न असफल थिए । तर ८२ रनको स्कोरमा खेलिरहेका अघिल्लो दिनका अविजित ब्याटर मलानलाई आउट गरेपछि उनको खुसी हेर्नलायक थियो । आफ्नो १ सय १ औं टेस्टमा ४ सय विकेट लिने उनी विश्वका १६ औं क्रिकेटर बने । यो कीर्तिमानमा पुग्ने शेन वार्न र ग्लेन म्याकग्रापछि उनी तेस्रो अस्ट्रेलियाली खेलाडी बने ।

अर्को ओभरमा अस्ट्रेलियाका विकेटकिपर एलेक्स केरीले रुटको विकेट अवसर गुमाए । त्यसलगत्तै क्यामरुन ग्रिनले अस्ट्रेलियामा पहिलो टेस्ट शतक खोजीमा रहेका रुटलाई ८९ रनमा आउट गरेपछि इंग्ल्यान्ड २२९–४ को स्थितिमा पुग्यो । ओलि पोपलाई स्लिपमा स्टिभ स्मिथबाट क्याच गराएर लायनले अर्को विकेट लिए । बेन स्टोक्स र जस बटलरले इंग्ल्यान्डलाई अझै अगाडि लैजाने प्रयासस्वरुप केही राम्रा शटहरू खेले । कप्तान कमिन्स आफैं बलिङ गर्न आए र तत्कालै सफलता पाए ।

प्रकाशित : मंसिर २६, २०७८ ०७:४५
प्रतिक्रिया
पठाउनुहोस्

पोखरामा बन्ने भो आईटी पार्क

जग्गा माग गरेको डेढ वर्षमा स्वामित्व
प्रतीक्षा काफ्ले

(कास्की) — जग्गा अभावका कारण लामो समयदेखि अलपत्र सूचना प्रविधि (आईटी) पार्क परियोजनाको निर्माण कार्य थालिएको छ । पहिलो चरणमा कम्पाउन्डका लागि टेन्डर निकालिसकिएको गण्डकी प्रदेशको कानुन, सञ्चार तथा प्रदेशसभा मामिलामन्त्री बिन्दुकुमार थापाले जनाए ।

गण्डकी सरकारको आफ्नै स्वामित्वमा जग्गा नहुँदा निर्माण प्रक्रिया ढिला सुरु भएको उनको भनाइ छ । डिजिटल प्रदेश बनाउने, प्रदेशलाई अन्तर्राष्ट्रिय बजारसँग जोड्ने उद्देश्यले गण्डकी सरकारले पोखरा–१८ जामुनबोटमा सूचना प्रविधि पार्क निर्माण गर्ने योजना सार्वजनिक गरेको थियो ।

आईटी पार्क प्रदेश सरकारको प्रदेश गौरवको आयोजना हो । संघीय सरकारको नाममा रहेको जग्गाको अधिकार प्रदेशलाई नहुँदा पार्कलगायत योजना प्रभावित बनेको मन्त्री थापाले बताए । ‘जग्गा माग गरेको डेढ वर्षमा स्वामित्व पाएका छौं,’ उनले भने । गण्डकी सरकार गठन भएको पहिलो वर्षमा नै सार्वजनिक गरिएको यो आयोजना सरकार गठन भएको चार वर्ष पूरा हुँदासम्म कार्यान्वयनमा आउन नसकेको हो । २०७६ असोजमा बसेको मन्त्रिपरिषद्को बैठकले संघीय सरकारसँग जग्गा माग गरेको थियो । त्यसअनुसार संघीय सरकारकै नाममा रहने तर जग्गाको भोगाधिकार मात्र प्रदेशलाई हुने गरी संघीय मन्त्रिपरिषद्को २०७७ पुस २० को निर्णयले ९६ रोपनी १३ आना २ दाम जग्गा दिएको मन्त्रालयले जनाएको छ ।

पार्कको कम्पाउन्ड निर्माणका लागि चालु वर्ष १ करोड ७० लाख रुपैयाँ विनियोजन भएको मन्त्रालयका कानुन अधिकृत श्रीप्रसाद तिवारीले बताए । ‘एक करोड संघीय सरकारको ससर्त अनुदान हो,’ उनले भने, ‘७० लाख रुपैयाँ प्रदेशबाटै छुट्टिएको छ ।’ कुल बजेटबाट डीपीआरका लागि ५ लाख रुपैयाँ छुट्टिएको भए पनि विगतका वर्षमा रकम खर्च हुन नसकेको उनले बताए । यस्तै, मन्त्रालयले डीपीआरका लागि संघीय अर्थ मन्त्रालयसँग थप बजेट माग गरेको मन्त्री थापाले बताए । पोखरा–१८ ग्यारजाती जामुनबोटस्थित रत्न आधारभूत विद्यालयको नाममा रहेको १८३ नम्बरको कित्ता प्रस्तावित सूचना प्रविधि पार्क निर्माण प्रयोजनका लागि गण्डकीलाई उपलब्ध गराइएको हो ।

मन्त्रालयले यस योजनाका लागि गत आवमा ३५ लाख रुपैयाँ विनियोजन गरेको थियो । सो रकमबाट सम्भाव्यता अध्ययन गरिएको मन्त्रालयले जनाएको छ । प्रदेश सरकारले नै सञ्चालन गरेको गण्डकी विश्वविद्यालयबाट यही शैक्षिक सत्रदेखि आईटी कक्षा सञ्चालन भएको छ । यदि आईटी पार्क निर्माण भएको भए पार्कभित्रै आईटीका कक्षा सञ्चालन गर्न सकिने गण्डकी विश्वविद्यालयका रजिस्ट्रार डा. कैलाश तिमिल्सिनाले जानकारी दिए । पार्क निर्माण भएपछि आईटीका कक्षा पार्कभित्रै सञ्चालन गरिने उनले बताए । हाल गण्डकी विश्वविद्यालयले आईटी कक्षा महेन्द्रपुलस्थित सञ्चालन गर्दै आएको छ । आईटी कक्षा सञ्चालनका लागि गण्डकी विश्वविद्यालयलाई अधिकार पनि प्राप्त भएको र स्रोतसाधनको पनि व्यवस्था भएको विश्वविद्यालय स्रोतले जनाएको छ ।

प्रकाशित : मंसिर २६, २०७८ ०७:४२
पूरा पढ्नुहोस्
प्रतिक्रिया
पठाउनुहोस्
×