एट्लेटिको अन्तिम १६ मा- खेलकुद - कान्तिपुर समाचार

एट्लेटिको अन्तिम १६ मा

एएफपी

पेरिस — स्पेनको एट्लेटिको म्याड्रिडले तनावपूर्ण खेलमा एफसी पोर्टोमाथि जित हासिल गरी च्याम्पियन्स लिग फुटबलको अन्तिम–१६ मा स्थान बनाएको छ । इंग्लिस टोली लिभरपुल र नेदरल्यान्ड्सको अयाक्सले समूह चरणमा शतप्रतिशत जित पाएका छन् ।

सन् २०१४ र ०१६ को फाइनलमा रियल म्याड्रिडसँग पराजित डिएगो सिमोनीको एट्लेटिकोका लागि नकआउट चरणमा पुग्न पोर्टोमाथि जित आवश्यक थियो ।

तीन रातो कार्ड देखाइएको खेल स्पेनिस च्याम्पियन एट्लेटिकोले ३–१ ले जितेको हो । पोर्टोलाई छनोट हुन कम्तीमा बराबरी चाहिन्थ्यो । एट्लेटिको समूह ‘बी’ मा दोस्रो स्थानमा रहेर छनोट भएको हो । लिग चरणका सबै ६ खेल जितेको लिभरपुलभन्दा ११ अंकले पछि रह्यो । लिभरपुलले एसी मिलानलाई उसकै मैदानमा २–१ गोलले हरायो ।

यता सान्टियागो बेर्नाबेउमा इन्टर मिलानमाथि २–० को जितसँगै रियल म्याड्रिडले समूह ‘डी’ को शीर्षस्थान सुरक्षित गर्‍यो । एम्स्टर्डमको बन्द रंगशालामा अयाक्सले पोर्चुगलको स्पोर्टिङ लिस्बनमाथि ४–२ को जित निकाल्यो । समूह ‘सी’ मा अयाक्सले शतप्रतिशत जित निकाल्यो । लिस्बन पनि समूह उपविजेता भएर अगाडि बढ्यो ।

अन्तिम १६ का लागि छनोट भइसकेको म्यानचेस्टर सिटीले आरबी लाइप्जिगसँग २–१ को हार बेहोरेको छ । यो समूहमा पेरिस सेन्ट जर्मेन (पीएसजी) भने क्लब ब्रुगलाई ४–१ ले हराएर समूह उपविजेता बन्न सफल रह्यो ।

प्रकाशित : मंसिर २३, २०७८ ०९:३२
प्रतिक्रिया
पठाउनुहोस्

पहिलो ४ महिनामा २ अर्ब बढी राजश्व संकलन

नारायण शर्मा

पूर्वी नवलपरासी — आन्तरिक राजस्व कार्यालय पूर्वी नवलपरासीले चालु आर्थिक वर्ष २०७८ र ७९ को पहिलो चौमासिकमा भन्दा २ अर्ब बढी राजस्व असुली गरेको छ । प्रमुख कर अधिकृत टेक बहादुर अर्यालका अनुसार चालु आवको प्रथम चौमासिकमा लक्ष्यभन्दा १ अर्ब ९४ करोड ८९ लाख बढी राजस्व असुली गरेको हो ।

५ अर्ब ८१ करोड ४२ लाख ६६ हजार राजस्व असुली गर्ने लक्ष्य लिएकोमा ७ अर्ब ७६ करोड ३१ लाख ७१ हजार राजस्व संकलन गर्न सफल भएको अर्यालले जानकारी दिए । कार्यालयले सबैभन्दा बढी राजस्व अन्तःशुल्क शीर्षकमा असुली गरेको छ ।

प्रथम चौमासिकमा अन्तःशुल्क शीर्षकमा ५ अर्ब ५६ करोड ५२ लाख ४८ हजार राजस्व असुली गर्ने लक्ष्य लिएको कार्यालयले ७ अर्ब ४८ करोड ९४ लाख ८६ हजार राजस्व सङ्कलन गरेको हो ।

आयकर शीर्षकमा १३ करोड ९७ लाख ८७ हजार, मूल्य अभिवृद्धि कर भ्याट शीर्षकमा ९ करोड ८८ लाख १२ हजार, ब्याज शीर्षकमा रु एक करोड ७६ लाख १८ हजार, स्वास्थ्य सेवा शीर्षकमा १ करोड आठ लाख ७० हजार, घरबहाल कर शीर्षकमा ६५ लाख ३५ हजार तथा शिक्षा शीर्षकमा ६३ हजार राजस्व सङ्कलन गरेको छ ।

कार्यालयले स्वास्थ्य सेवा शीर्षकमा लक्ष्यको तुलनामा ३९२ प्रतिशत, आयकरमा लक्ष्यको तुलनामा १५३ प्रतिशत र अन्तःशुल्क शीर्षकमा १३४ प्रतिशत प्रगति हासिल गरेको छ । यसैगरी घरबहाल कर, ब्याज, मूल्य अभिवृद्धि कर र शिक्षा शीर्षकमा भने कार्यालयले लक्ष्यअनुसारको प्रगति भेटाउन नसकेको अर्यालले बताए ।

कार्यालयले घरबहाल करमा ८९ प्रतिशत, मूल्य अभिवृद्धि करमा ८० प्रतिशत, ब्याजमा ७५ प्रतिशत र शिक्षामा तीन प्रतिशत प्रगति हासिल गरेको छ । गण्डकी प्रदेशका ११ जिल्लामा सबै भन्दा बढी राजश्व संकलन गर्ने जिल्ला पूर्वी नवलपरासी हो ।

प्रकाशित : मंसिर २३, २०७८ ०९:२९
पूरा पढ्नुहोस्
प्रतिक्रिया
पठाउनुहोस्
×