लिगमा ५३ सेकेन्डमै गोल - खेलकुद - कान्तिपुर समाचार

लिगमा ५३ सेकेन्डमै गोल 

पुलिस १–१ हिमालयन । मछिन्द्र २–० जावलाखेल
हिमेश

काठमाडौँ — भावनामा चुर्लुम्म डुबेका अनुभवी प्रशिक्षक । रिस थाम्न नसकेका युवा प्रशिक्षक । अनि ५३ सेकेन्डमै गोल । सहिद स्मारक लिग ‘ए’ डिभिजन फुटबलको बुधबार तेस्रो चरणको अन्तिम दुई खेलको सार लगभग यही रह्यो ।

सबैभन्दा पहिले खेल सुरु भएको मिनेट नबित्दै भएको गोलबाट चर्चा सुरु गरौं । दशरथ रंगशालामा बुधबार दिनको पहिलो खेलमा हिमालयन शेर्पाले पुलिसविरुद्ध ५३ सेकेन्डभित्रै गोल निकालेको थियो । यसका नायक थिए कप्तान विश्वास श्रेष्ठ ।

हिमालयनले बल अगाडि बढाएको पहिलो अवसरमै विश्वासले गोल गरे । यो यसपालिको लिगमा अहिलेसम्मकै कम समयमा सम्भव गोल रह्यो । के यो नेपाली लिग इतिहासकै सबैभन्दा कम समयमा भएको गोल हो त ? होइन । विश्वासको यो गोलले २१ वर्षअगाडिको अर्को त्यस्तै गोललाई सम्झाउने अवसर भने जुराएको छ । ०५७ सालको लिगमा थ्रीस्टारले एनआरटीविरुद्ध खेल सुरु भएको १८ सेकेन्डमै गोल गरेको थियो ।

यो नै लिगबारे स्पष्ट अभिलेख राख्न थालेयताको सबैभन्दा कम समयमा भएको गोल हो । यसका नायक थिए, दीपक अमात्य । त्यो खेलमा थ्रीस्टार विजयी रह्यो ।

यस्तै भाग्य हिमालयनको रहेन । नतिजा पुलिसविरुद्ध बराबरीमै चित्त बुझाउनुपर्‍यो । पुलिसका लागि सुमन लामाले ६० औं मिनेटमा गोल गरे । पुलिस ३ खेलमा अहिलेसम्म अपराजित छ, तर त्यसमध्ये दुई खेल बराबरीमा टुंगेको छ । टिम ५ अंकको स्थितिमा छ ।

त्यस अर्थमा पुलिसका लागि बराबरी पनि सन्तोषजनक नतिजा रह्यो । त्यसैले यो नतिजामा प्रशिक्षक अनन्त थापाले धेरै गुनासो गरेनन् । पुलिसले जुमनु राई र भोला सिलवालका रूपमा दुई भेट्रान खेलाडीलाई सब्स्टिच्युटमा उतारेको थियो । त्यसपछाडि प्रशिक्षक थापाको तर्क थियो, टिमलाई अनुभवी खेलाडी पनि आवश्यक छ, किनभने उनीहरूविना टिम निकै युवा छ । पुलिस अहिलेसम्म जुमनु र भोलाकै भरमा पर्नु के ठीक हुनेछ त ? त्यो समयले भन्ला ।

लिगजस्तो लामो समय चल्ने प्रतियोगितामा यो प्रयोगले काम नगर्न सक्छ । डर यसमै छ । अथवा यसको कारण कतै टिममा राम्रा खेलाडीको अभावमा प्रशिक्षक थापा आफ्ना पुरानै खेलाडीमा भर पर्नुपरेको त होइनन् ? जुमनु र भोला पुलिसका खेलाडी नहुँदो हो त यस्तो स्थिति उत्पन्न नहुन सक्थ्यो कि ? बराबरीमा हिमालयनका प्रशिक्षक युगलकिशोर राई पटक्कै खुसी देखिएनन् । उल्टै पूरा खेल अवधिमा यी प्रशिक्षक रिसको एकपछि अर्को शृंखलाबाट गुज्रिइरहेका थिए ।

यसक्रममा उनले आफ्नो ‘क्याप’ लाई एकभन्दा बढी अवसरमा रिसमा भुईंमा बजारे । पछि उनले भने, ‘यो रिस नियन्त्रणभन्दा बाहिरको त थिएन । तर टिमले रणनीतिअनुसार खेल्न सकेन ।’ पुलिसको खेल सुक्ष्म अध्ययन गरेर प्रशिक्षक राईले एक साता आफ्नो टिमको तयारी गरेका थिए, तर मैदानमा उनका खेलाडीले त्यसअनुसार खेल्नै सकेनन् । यस्तोमा हिमालयन तीन खेलबाट २ अंकमै सीमित रह्यो र रेलिगेसन क्षेत्रको नजिक रह्यो ।

अपराजित यात्रामा मछिन्द्र

जावलाखेललाई हराएपछि मछिन्द्रका प्रशिक्षक प्रवेश कटुवाल खुसी नै रहे । डिफेन्डिङ च्याम्पियन मछिन्द्रले यसक्रममा आफ्नो अपराजित यात्रा कायम राखेको छ ।

टोलीले सीमान्त थापाको आत्मघाती गोलले १४ औं मिनेटमा अग्रता लिएपछि २१ औं मिनेटमा रञ्जित धिमालले दोस्रो गोल थपे । यो जितपछि मछिन्द्रको ३ खेलबाट ७ अंक भएको छ । यो खेलबाट देखियो, मछिन्द्र उपाधि रक्षा गर्ने मनसायमा छ । मछिन्द्रसँगै ७ अंकमा तीन टिम छन् । सातदोबाटो र मनाङ मर्स्याङ्दीको पनि ७ अंक छ ।

जावलाखेलको भने यो लगातार तेस्रो हार हो । टोली अंकविहीन रहेर रेलिगेसन क्षेत्रमा छ । जावलाखेलले लिगका सुरुआती तीनै खेलमा गोल गर्न सकेको छैन । उल्टै आत्मघाती गोल गरेको छ । खेलपछि जावलाखेलका प्रशिक्षक किशोर केसी खुबै भावनात्मक रूपमा प्रस्तुत भए । उनको चित्त दुखाइ प्रस्ट रूपमा धेरै थियो, विशेषतः आफ्नै खेलाडीप्रति । त्यसो त दुई दशकभन्दा लामो समयदेखि प्रशिक्षकको भूमिकामा सक्रिय केसीले बिरलै आफ्ना खेलाडीको आलोचना गरेका छन् ।

तर मछिन्द्रविरुद्धको खेलपछि विशेषतः उनले दुई खेलाडीको आलोचनामा शब्द खर्चे । त्यसमा पहिलो खेलाडी थिए, गोलरक्षक टेकेन्द्रसिंह थापा । प्रशिक्षक केसीको निचोड थियो, टेकेन्द्रले केही जिम्मेवारीपूर्ण खेल खेलेको भए, यी दुवै गोल हुने थिएनन् ।

यी दुवै गोलमा तिनै गोलरक्षकको कमजोरी देखिएको थियो । प्रशिक्षक केसीलाई टिमका एकमात्र राष्ट्रिय टिमका सदस्य खेलाडी सुरज ठकुरीमा पनि गुनासो थियो । उनको तर्क थियो, सुरजको खेल टिमलाई चाहिएजस्तो रहेन ।

प्रशिक्षक केसीले थपे, ‘खेलाडीमात्र होइन, प्रशिक्षक पनि तरबारको धारमा छन् । प्रशिक्षक बर्खास्तगीको सम्भावनाबाट गुज्रिरहेको हुन्छ । त्यसैले खेलाडीको प्रदर्शनलाई लिएर उत्पन्न हुने असन्तोष आफ्नै मनमा धेरै गुम्साइरहे पनि ठीक हुन्न ।’ हुन पनि दुई गोलको जितले मछिन्द्रको त्यो सफलता सजिलो देखिन्छ । तर खेल यस्तो थिएन, जावलाखेलले लगभग बराबरीकै चुनौती पेस गरेको थियो । अनि केही सटिक आक्रमण बुनेको थियो । तर, पराजित रह्यो । यस्तोमा जावलाखेलले समस्या ठ्याक्कै कहाँनिर छ, खोज्न हतार भइसकेको छ ।

प्रकाशित : मंसिर २३, २०७८ ०८:०५
प्रतिक्रिया
पठाउनुहोस्

‘हामी मतदाता मात्र कहिलेसम्म ?’

विदेशस्थित जनसम्पर्क समितिबाट १९५ महाधिवेशन प्रतिनिधि सहभागी हुँदै छन् तर उम्मेदवार बन्न पाउँदैनन् 
कान्तिपुर संवाददाता

काठमाडौँ — जापानको टोकियोमा बसोबास गर्ने राजेन्द्र जमकट्टेल काठमाडौं आइपुगेका छन् । उनी नेपाली कांग्रेसको १४ औं महाधिवेशनमा नेपाली जनसम्पर्क समिति जापानबाट महाधिवेशन प्रतिनिधि चुनिएका छन् । महाधिवेशनमा सहभागी हुन आएका उनको हैसियत भने मतदातामै सीमित छ । उनी उम्मेदवार बन्न पाउने छैनन् । 

कांग्रेसमा लामो समयदेखि विदेशस्थित जनसम्पर्क समितिका लागि आरक्षिततर्फ केन्द्रीय सदस्य कोटा छुट्याउनुपर्ने माग उठे पनि सम्बोधन भएको छैन । यसले गर्दा जमकट्टेलजस्ता विदेशबाट आउने ‘पाहुना प्रतिनिधि’ नेतृत्व तहमा पुग्नबाट वञ्चित छन् । ‘अघिल्लो महाधिवेशनमै जनसम्पर्क समितिलाई एक भौगोलिक क्षेत्र मानेर केन्द्रीय समितिमा कोटा छुट्याउन माग गरेका थियौं,’ जमकट्टेलले भने, ‘माग सुनुवाइ भएन, केन्द्रीय समितिमा समेत हाम्रो एजेन्डा लगिदिने कोही पनि भएन ।’

कांग्रेसका विभिन्न ३७ देशमा जनसम्पर्क समिति छन् । यस पटक २९ जनसम्पर्क समितिबाट १ सय ९५ जनाले महाधिवेशनमा भाग लिँदै छन् । बुधबारसम्म अधिकांश प्रतिनिधि काठमाडौं आइसकेका छन् । केन्द्रीय निर्वाचन समितिका सचिव केशव रिजालका अनुसार भारत, जापान, अमेरिका र बेलायतबाट १४–१४ जना, जर्मनी, नर्वे, इजरायल, बहराइन, कतार, ओमन, मलेसिया, साउदी अरब, हङकङ, स्पेन, बेल्जियम, दक्षिण कोरिया, स्विडेन, अस्ट्रेलिया, पोर्चुगल, क्यानडा, मकाउ, डेनमार्क, यूएईबाट ७–७ जना र नेदरल्यान्ड्स, पोल्यान्ड, साइप्रस, कुबेत, फ्रान्स र आयरल्यान्डबाट १–१ जना प्रतिनिधि निर्वाचित भएका छन् ।

निर्धारित समयमा अधिवेशन सम्पन्न गरेका जनसम्पर्क समितिले मात्र महाधिवेशनमा भाग लिन पाउने उनले बताए । विभिन्न कामको सिलसिलामा विदेशमा बसोबास गर्ने कांग्रेसमा आबद्ध नेपाली नागरिक जनसम्पर्क समितिमार्फत क्रियाशील सदस्य हुन पाउँछन् । २ हजारभन्दा बढी क्रियाशील सदस्य भएको देशबाट सभापतिसहित १४ जना, ५ सयदेखि २ हजारसम्म क्रियाशील सदस्य भएको देशबाट सभापतिसहित ७ जना र ५ सयभन्दा कम क्रियाशील सदस्य भएको देशबाट एक जना महाधिवेशन प्रतिनिनिधि छनोट हुने कांग्रेसको नियमावलीमा उल्लेख छ । १३ औं महाधिवेशनमा १९ देशका जनसम्पर्क समितिको सहभागिता थियो ।

आफू नेतृत्वमा पुग्न नपाए पनि पार्टीमा नेतृत्व चुन्नका लागि विदेशबाट महाधिवेशन प्रतिनिधि महँगो खर्चमा आउँछन् । जमकट्टेलका अनुसार सामान्यतया एक प्रतिनिधिले सरदर ७ लाख रुपैयाँसम्म खर्च गर्छ । ‘विदेशबाट आतेजाते, यहाँ आएपछि खानबस्नको खर्च त सामान्य भइहाल्यो,’ उनले भने, ‘विदेशबाट आएको भनेपछि साथीभाइ र उम्मेदवारले पनि आस गरिहाल्छन्, हाम्रो खर्च त केन्द्रीय सदस्यका उम्मेदवारको भन्दा बढी हुन्छ ।’

विदेशस्थित जनसम्पर्क समितिहरू पार्टीका नेताका लागि आर्थिक स्रोतका माध्यम पनि हुन् । जनसम्पर्क समितिसँग महाधिवेशनमा चन्दा माग्ने र अन्य बेला उनीहरूको सहयोगमा विदेश सयर गर्ने गर्छन् । ‘धेरै नेपालीलाई विदेशमा आए पनि राजनीतिको नसाले छोड्दैन, बरु पसिनाको कमाइमा नेताहरूलाई मोजमस्ती गराउने होड नै चल्ने गर्छ,’ जनसम्पर्क समितिबाट आएका एक महाधिवेशन प्रतिनिधि भन्छन्, ‘यति गरेबापत महाधिवेशनका बेला भोट हाल्नेबाहेक अरू कुनै फाइदा छैन ।’

कतिपय नेपाली भने जनसम्पर्क समितिमार्फत राजनीति गर्ने अवसर पाएको बताउँछन् । कुनै कामका लागि निश्चित समयसम्म विदेशमा रहे पनि पछि स्वदेश फर्केर राजनीति गर्ने उद्देश्य बोकेका व्यक्तिलाई यसले फाइदा गर्ने जनसम्पर्क समिति जापानमा निवर्तमान सभापति डीपी कँडेलको भनाइ छ । ‘हामी विदेशमा भए पनि राजनीतिमार्फत नेपाली धरातलसँग जोडिएको महसुस गर्छौं,’ उनले भने, ‘कांग्रेसको जनसम्पर्क समितिजस्ता संस्था विदेशमा बस्ने नेपालीलाई देशको राजनीतिक, आर्थिक र सामाजिक अभियानसँग जोड्ने भरपर्दो माध्यम सावित भएका छन् ।’

कांग्रेस सहमहामन्त्री प्रकाशशरण महतले जनसम्पर्क समितिबाट आउने महाधिवेशन प्रतिनिधिलाई उम्मेदवार बन्न पाउने अधिकार दिनुपर्ने भए पनि विधानमा व्यवस्था नभएको बताए । ‘विदेशबाट आउने महाधिवेशन प्रतिनिधिलाई पनि उम्मेदवार बन्न पाउनुपर्ने माग जायज छ, पार्टीभित्र छलफल पनि भइरहेको छ,’ उनले भने ।

यसैबीच, महाधिवेशनमा सहभागी हुन इन्टरनेसनल कांग्रेस र भारतीय जनता पार्टीबाट अतिथि आउने भएका छन् । पार्टी सहमहामन्त्री एवं पाहुना स्वागत तथा सत्कार समितिका संयोजक प्रकाशशरण महतले यसका साथै अन्य केही पार्टीबाट पनि अतिथि आउने बताए ।

महाधिवेशन प्रतिनिधि करिब ४ हजार ५ सय

कांग्रेसको आगामी महाधिवेशनमा करिब ४ हजार ५ सय महाधिवेशन प्रतिनिधि सहभागी हुने भएका छन् । केन्द्रीय निर्वाचन समितिले बुधबार सार्वजनिक गरेको प्रारम्भिक सूचीमा महाधिवेशन प्रतिनिधिको संख्या ४ हजार ३ सय १९ छ । निर्वाचन समितिका सचिव केशव रिजालका अनुसार यसमा विदेशस्थित २९ वटा जनसम्पर्क समितिबाट १ सय ९५ जना थपिनेछन् । ३१ वटा भ्रातृ संघ तथा शुभेच्छुक संस्थाबाट १ सय २७ जना प्रतिनिधि चुनिन्छन् ।

प्रकाशित : मंसिर २३, २०७८ ०७:५९
पूरा पढ्नुहोस्
प्रतिक्रिया
पठाउनुहोस्
×