कुमार र जयराम अगाडि- खेलकुद - कान्तिपुर समाचार

कुमार र जयराम अगाडि

कान्तिपुर संवाददाता

काठमाडौँ — कुमार कामी र जयराम श्रेष्ठ ६ अन्डर ६२ स्कोर गर्दै रोयल नेपाल गल्फ क्लबमा सोमबार सुरु सूर्य नेपाल काठमाडौं ओपनमा पहिलो दिन संयुक्त रूपमा शीर्षस्थानमा रहेका छन् ।

पार ६८ को गल्फ कोर्समा भुवन कुमार रोका (५ अन्डर ६३), भुवन नगरकोटी (५ अन्डर ६३), रवि खड्का (४ अन्डर ६४), धनबहादुर थापा (१ अन्डर ६७) र सञ्जय लामा (१ अन्डर ६७) ले पनि राम्रो प्रदर्शन गरे । सूर्य नेपाल गल्फ टुर २०२१–२२ को पहिलो प्रतियोगिताको पहिलो दिन कृष्णमान राजवाहक, दिनेश प्रजापति, एमेच्योर सुवास तामाङ र रमेश अधिकारी इभन पार ६८ स्कोर गर्दै शीर्ष दसमा रहे ।

कुल ६ लाख ४० हजार रुपैयाँ पुरस्कारको प्रतियोगितामा कुमार र जयरामले सुरुका ९ होल र पछिल्ला ९ होलमा समान ३ अन्डर ३१ स्कोर गरे । बोगीरहित खेल्नेक्रममा कुमारले होल नम्बर १, ४, ५, १०, ११ र १२ औं होलमा बर्डी गरे । जयरामले पार ५ को पहिलो होल तीन स्ट्रोकमा टुंग्याउँदै इगल गरेका थिए । त्यसपछि तेस्रो र सातौं होलमा बर्डी गरेका उनले नवौं होलमा बोगी बेहोरे । उनले ११, १३ र १६ औं मा पनि एक–एक स्ट्रोक जोगाए ।


कुमार कामी

शीर्ष वरीयताका प्रो भुवन नगरकोटीसँगै तेस्रोमा रहेका भुवनकुमार रोकाले सुरुका ९ होल ३ अन्डर ३१ मा टुंग्याए पनि पछिल्ला ९ होलमा एक स्ट्रोक बढी (३२) खेलेका थिए । त्यसक्रममा उनले पहिलो, चौथो, पाँचौं, १०, १२ र १८ औं होलमा एक–एक स्ट्रोक बचाउँदै बर्डी गरे । उनी १४ औं होलमा एक स्ट्रोक बढी खेल्दै बोगीमा परेका थिए ।

नगरकोटीले पनि सुरुका ९ होलमा ३१ र पछिल्ला ९ होलमा ३२ स्ट्रोक खेले । त्यसक्रममा उनले पार ५ को चौथो होलमा दुई स्ट्रोक कम खेल्दै इगल गरे भने आठौं होलमा बर्डी खेले । बोगीरहित खेल्ने क्रममा उनले १३ र १८ औं होलमा पनि बर्डी बनाए । १३ औं दक्षिण एसियाली खेलकुद (साग) २०१९ मा व्यक्तिगत र टिम स्पर्धामा गरी दुई स्वर्ण पदक जितेका सुवास सुरुका ९ होल र पछिल्ला ९ होलमा समान ३४ स्ट्रोक खेल्दै एमेच्योरतर्फ शीर्षस्थानमा छन् । उनलाई निश्चयजंग रायमाझी (४ ओभर ७२) र सुरेश तामाङ (५ ओभर ७३) ले पछ्याइरहेका छन् । चार दिने प्रतियोगितामा ४० प्रो र १५ एमेच्योर सहभागी छन् । ३६ होलको खेलपछि शीर्ष २१ मा रहने प्रोसँगै उत्कृष्ट ६ एमेच्योर अन्तिम दुई चरणलाई छनोट हुनेछन् ।

प्रकाशित : मंसिर २१, २०७८ ०८:०२
प्रतिक्रिया
पठाउनुहोस्

३ हजार मिटरमा जुम्ला हाबी

कान्तिपुर संवाददाता

काठमाडौँ — दशरथ रंगशालामा सोमबार सुरु युथ एथलेटिक्स च्याम्पियनसिपमा पहिलो दिन १४ स्वर्णको छिनोफानो भएको छ ।

बंगलादेशी खेलाडीले आफू सहभागी स्पर्धामा प्रभावशाली नतिजा निकालेका छन् । मध्यम दूरीमा जुम्लाका खेलाडीले बाजी मारेका छन् ।

३ हजार मिटर दौडको यू–२० ब्वाइजमा जुम्लाका प्रकाश कठायतले स्वर्ण जिते । उनले ९ मिनेट २२.७ सेकेन्डमा दूरी पूरा गरे । कपिलवस्तुका अजय पाण्डेले ९ मिनेट ४० सेकेन्डबाट रजत र एक सेकेन्डले पछि परेका ललितपुरका महेश सिदलीले कांस्य जिते ।

सोही स्पर्धाको गर्ल्सतर्फ जुम्लाका खेलाडीद्वय राममाया बुढा (१० मिनेट ४४.५ सेकेन्ड) र बन्दना बुढा (११ मिनेट २१.९सेकेन्ड) ले क्रमशः स्वर्ण र रजत जिते । ११ मिनेट ४३.० सेकेन्डसहित सुर्खेतकी विमला कार्कीले कांस्य जितिन् । बन्दनाले मंसिर पहिलो साता नेपालगन्ज म्याराथनको ५ किमिमा तेस्रो स्थान हात पारेकी थिइन् ।


यू–२० ब्वाइज ४ सय मिटर दौडमा बंगलादेशका जेल्दा सर्जिल हसन खानले स्वर्ण जिते । उनले ५१.६० सेकेन्डमा दूरी पूरा गरे । ५१.८ सेकेन्डसहित बंगलादेशकै मिहिबुल्लाह मोहम्मद खालिदले रजत र नवलपुरका नारायण चौधरीले ५२.४२ सेकेन्डबाट कांस्य जिते । गर्ल्सतर्फ बंगलादेशकी रुना नुसरत जाहानले १ मिनेट ००.४ सेकेन्डबाट स्वर्ण जितिन् । दुई सेकेन्डले पछि परेकी दाङकी अरुणा रिजालले रजत र वीरगन्जकी संगीताकुमारी यादवले कांस्य जिते ।

लङजम्प यू–२० ब्वाइजतर्फ बर्दियाका रामलखन थारुले स्वर्ण जिते । समान ६.३३ मिटर जम्प गरे पनि सबै चरणको प्रदर्शनका आधारमा रामले नवलपरासीका सलिम देवानलाई पछि पारे । कांस्य विजेता बर्दियाकै रोशन थारुले ५.९७ मिटर जम्प गरे ।

गर्ल्सतर्फ बंगलादेशकी सोनिया अख्तरले ५.७७ मिटर जम्प गरी स्वर्ण जितिन् । दाङकी सीमा चौधरी (४.६४ मिटर) र बर्दियाकी रबिना थारु (४.२४ मिटर) ले कांस्य जिते ।


सोही स्पर्धाको यू–१६ उमेर समूहमा कपिलवस्तुका सुदीप थारूले ६.६८ मिटर जम्प गरी स्वर्ण जिते । उनले यू–२० का स्वर्ण विजेताले भन्दा बढी जम्प गरेका हुन् । कपिलवस्तुका रामजित विश्वकर्मा (५.७७ मिटर) र चितवनका सुदीप महतो (५.६३ मिटर) ले क्रमशः रजत र कांस्य जिते । गर्ल्सतर्फ दाङकी करुणा रिजाल (४.२७ मिटर) ले स्वर्ण, दाङकी सुशीला चौधरी (४.२० मिटर) ले रजत र नुवाकोटकी धनु राई (४.०५ मिटर) ले कांस्य जितेका थिए ।

यू–१६ सटपुट ब्वाइजमा चितवनका दीपेश महतो १३.४० मिटर), कपिलवस्तुका तुलसीराम थारू (१२.५४) र वीरगन्जका आदेशकुमार यादव (१०.२१) तथा यू–२० सटपुट गर्ल्समा दाङकी सुशीला चौधरी (९.८२ मिटर), विजेश्वरीकी निशा भुजेल (७.७०) र झापाकी कञ्चन विमली (७.५३) क्रमशः शीर्ष तीन स्थानमा विजयी भएका छन् ।

४ गुणा १०० मिटर रिले दौडको यू–१६ ब्वाइजतर्फ वीरगन्जका आदेश यादव, पुष्पराज यादव, आलोक गुप्ता र शत्रुधन पटेल तथा गर्ल्सतर्फ कालिकोटका लक्ष्मी शाही, मल्टा शाही, भावना र रमिला शाहीको टिमले पहिलो स्थान हासिल गरेका छन् ।

प्रतियोगितामा बंगलादेशका ८ सहित ४ सयभन्दा बढी खेलाडीको सहभागिता रहेको आयोजक एथलेटिक्स परिवार नेपालका अध्यक्ष राजन खत्रीले बताए । युवास्तरमा प्रतिभावान खेलाडी उत्पादन गर्ने लक्ष्यसहित आयोजित प्रतियोगितामा बंगलादेशी टोलीको उपस्थितिले नेपाली खेलाडीमा प्रतिस्पर्धात्मक भावनाको विकास हुने आयोजकको दाबी छ । स्वर्ण, रजत र कांस्य विजेताले क्रमशः ३ हजार, २ हजार र १ हजार रुपैयाँ पुरस्कार पाउनेछन् । रिलेतर्फ ६ हजार, ४ हजार र २ हजार रुपैयाँ पुरस्कार जित्नेछन् । अरू स्पर्धाको फाइनल मंगलबार हुनेछ ।

प्रकाशित : मंसिर २१, २०७८ ०८:०१
पूरा पढ्नुहोस्
प्रतिक्रिया
पठाउनुहोस्
×