ए डिभिजन लिग : मनाङ र संकटाबीच बराबरी- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

ए डिभिजन लिग : मनाङ र संकटाबीच बराबरी

कान्तिपुर संवाददाता

काठमाडौँ — सहिद स्मारक ए डिभिजन लिग २०७८ मा शनिबार संकटा र मनाङ मर्स्याङ्दीले २–२ को बराबरी खेलेका छन् । दुईपटक पछि परे पनि सम्हालिएको प्रदर्शन गरेर पोखरेली टोली मनाङ मर्स्याङदीले संकटा क्लबसँग अंक खोस्न सफल भएको हो ।

त्रिपुरेश्वरस्थित दशरथ रंगशालामा भएको सहिद स्मारक ए डिभिजन लिग फुटबलमा मनाङले दुई पटक पछि परेको अवस्थाबाट संकटाले २–२ गोलको बराबरी खेल्दै अंक खोस्न सफल भएको हो ।

अंक गुमाएको मनाङ लिग तालिकाको शीर्ष स्थानमा उक्लिने मौका गुमाएको छ । यससँगै जारी सहिद स्मारक ए डिभिजन लिगमा मनाङले आफ्नो अपराजि यात्रा तेस्रो खेलमा पनि निरन्तरता दिएको छ भने मनाङको विजयी यात्रामा पूर्णविराम पनि लागेको छ । २–२ को बराबरी खेल्दै अंक बाड्ने क्रममा संकटाका लागि निरज बस्नेत र उत्तम राईले एक/एक गोल गर्दा मनाङका दयानन्द सिंह र फ्रान्कलिन क्वेटाले एक एक गोल गरे ।

कीर्तिमानी आठ पटकको च्याम्पियन मनाङविरुद्ध ३० औं मिनेटमा निरजले गोल गर्दै संकटालाई सुरुआती अग्रता दिलाएका थिए । लक्ष्मण रुचालको फ्रिकिकमा निरजले हेडरमार्फत जाली चुमाउन सफल भएका थिए ।

तर, खेलको ३५ औं मिनेटमा दयानन्दले गोल गर्दै मनाङलाई १–१ गोलको बराबरीमा फर्काए । पुजन उपरकोटीको फ्रिकिकमा फ्रान्कलिन क्वेटाको पासमा भारतीय मिडफिल्डर दयानन्दले हेडरमार्फत गोल गरेका हुन् । त्यसपछिको पहिलो हाफमा दुबै टोलीबाट थप गोल हुन सकेन ।

दोस्रो हाफमा दुबै टोलीले आक्रामक खेल देखाए । खेलको ७० औं मिनेटमा उत्तमले गोल गर्दै संकटालाई २–१ को अग्रता दिलाए । वैकल्पिक खेलाडीको रुपमा मैदान प्रवेश गरेका उत्तमले फोडे फोफानाको पासमा जाली चुमाउन सफल भएका थिए । त्यसपछि दबाबमा परेको आठ पटकको च्याम्पियन मनाङका लागि इन्जुरी समयमा फ्रान्कलिनले गोल गर्दै मनाङलाई २–२ गोलको बराबरीमा ल्याउँदै टोलीलाई हारबाट जोगाए ।

यस बराबरीसँगै मनाङले ३ खेलमा ७ अंक जोडेको छ । मनाङ दोस्रो स्थानमा यथावत रहेको छ । संकटा भने ५ अंक जोडेर तेस्रो स्थानमा उक्लिएको छ । खेलमा संकटका टाम्पी अर्नेस्ट म्यान अफ दि म्याच चुनिँदा संकटाकै जय गुरुङ इमर्जिङ प्लेयर घोषित भए ।

प्रकाशित : मंसिर १८, २०७८ १५:४४
प्रतिक्रिया
पठाउनुहोस्

चितवनमा दाहालले भने- ‘गठबन्धन टुटाउने अनेक कसरत भएका छन्’

रमेशकुमार पौडेल

काठमाडौँ — सत्ता साझेदारको प्रमुख घटक नेकपा (माओवादी केन्द्र)का अध्यक्ष पुष्पकमल दाहालले अहिलेको गठबन्धन भत्काउने प्रयास सुरु भएको बताएका छन् । पार्टी निकटको पत्रकारहरुको संस्था प्रेस सेन्टर नेपालको शनिबारदेखि भरतपुरमा सुरु भएको चौथो राष्ट्रिय महाधिवेशनको उद्घाटन गर्दै दाहालले भने, ‘मान्छेहरु यो गठबन्धन टुटाउनलाई अनेक खालका कसरत गरेका छन् । मलाई धेरै कुरा बडो डिटेलमा थाहा छ ।’ ती कुरा अहिल्यै नभन्ने पनि उनले बताए ।

गठबन्धन बनाएर सरकार निर्माण भएपछि जनतामा, देशमा र अन्तर्राष्ट्रिय क्षेत्रमा जे सन्देश दिन खोजेको हो त्यसमा अझै सफल नभएको उनले स्वीकार गरे । ‘त्यो दिशातर्फ हाम्रो कदमै चलेका छैन भन्ने पनि हैन । तपाईं पत्रकार साथीहरुले अलि वैचारिक ढंगले, आक्रमक ढंगले सरकारलाई सकारात्मक ढंगले उत्प्रेरित गर्ने काम पनि छाड्नु हुँदैन’, दाहालले अपिल गरे ।

मंसिर २८ मा संसद् बसे पनि एमसीसी र न्यायालयको विवादका विषयमा सहमतिबाटै काम कारबाही अगाडि बढ्ने उनले बताए । ‘कसैले एमसीसीका लागि कसैले महाभियोगका लागि संसद् बोलाएको होला कि भनेर सोचेका छन् । यो हिउँदे अधिवेशन हो । बोलाउने गर्दथ्यो । एमसीसी बारेमा पनि राष्ट्रिय सहमति र दलहरुको समझदारीबाटै जान्छौं । जबर्जस्ती गरेर कसैले हुने कुरा छैन’, दाहालले भने ।

न्यायालयको विवाद निरुपणको विषयमा पनि महाअभियोग लगाउने वा नलगाउने भन्ने निर्क्योल सहमतिमै गर्ने उनले बताए । ‘महाअभियोग पनि राष्ट्रिय हितअनुसार राजनैतिक सहमतिको आधारमा लगाउन हुने/नहुने कुरा हुन्छ । त्यसैले यी विषयमा चिन्ता नमान्नु होला’, दाहालले भने ।

चितवनमा हालै १० औं राष्ट्रिय महाधिवेशन गरेपछि एमाले पार्टी मण्डलेहरु, पञ्चायती र निरंकुशतावादीको मोर्चामा पतन भएको दाहालको टिप्पणी थियो ।

प्रकाशित : मंसिर १८, २०७८ १५:३९
पूरा पढ्नुहोस्
प्रतिक्रिया
पठाउनुहोस्
x
×