प्रकाशको मिश्रित नतिजा- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

प्रकाशको मिश्रित नतिजा

कान्तिपुर संवाददाता

काठमाडौँ — नेपाली ब्याडमिन्टन खेलाडी प्रकाश अधिकारीले एसियाली युथ पारा गेम्सको ब्याडमिन्टनमा मिश्रित प्रदर्शन गरेका छन् । बहराइनको मानामामा जारी प्रतियोगिताको चार राष्ट्रका खेलाडीसम्मिलित समूह ‘सी’ को खेलमा प्रकाशले समान १–१ जित र हार सामना गरे ।

एसएल–४ क्याटगोरीअन्तर्गत पुरुष सिंगलमा इन्डोनेसियाका मोहम्मद फर्जी इब्राहिमसँग २१–१५, २१–९ को सोझो सेटमा पराजित प्रकाशले अर्को खेलमा भारतका नेहाल गुप्तालाई २१–१३, २१–१८ को सेटमा हराए ।

प्रकाशले लिगको अन्तिम खेलमा यूएईका हुमेद फाउजी अल्सेनानीविरुद्ध खेल्ने पारा तेक्वान्दो प्रशिक्षक कविराज नेगी लामाले जनाएका छन् । गेम्समा तेक्वान्दोका तीन खेलाडी प्रतिस्पर्धी छन् । ब्याडमिन्टनमा नेपालबाट प्रकाश एक्लो सहभागी हुन् । उद्घाटनको मार्चपासमा पारा ओलम्पियन तेक्वान्दोकी पलेशा गोबर्द्धन (तस्बिरमा) ले नेपालको झन्डा बोकेकी थिइन् । गेम्म डिसेम्बर ६ सम्म चल्नेछ ।

प्रकाशित : मंसिर १८, २०७८ ०८:२४
प्रतिक्रिया
पठाउनुहोस्

पर्वतमा सवारी दुर्घटना : एकको मृत्यु, २३ जना घाइते

अगन्धर तिवारी

पर्वत — मध्यपहाडी लोकमार्गअन्तर्गत पर्वतको कुश्मा नगरपालिका–८ परादीमा शनिबार बिहान बस दुर्घटना हुँदा एक किशोरको घटनास्थलमै मृत्यु भएको छ । मृत्यु हुनेमा मध्यपहाडी लोकमार्गमै कार्यरत सडक मजदुर रहेको पर्वत प्रहरीले जनाएको छ ।

विरगञ्जबाट बागलुङतर्फ आउँदै गरेको ग २ ख ००९८ नम्बरको यात्रुबाहक बसले सडक मजदुर लिएर पातीचौरबाट दोबिल्ला आउँदै गरेको को १ च ६४२७ नम्बरको ट्याक्टरलाई बिहान ७ बजे ठक्कर दिएको प्रहरीले जनाएको छ ।

मृत्यु हुनेमा उदयपुर जिल्लाको चौदण्डीगढी नगरपालिका–२ का १८ वर्षीय विशाल लामिछाने रहेको पर्वत प्रहरी प्रमुख प्रहरी नायब उपरीक्षक शिवराज बुढाथोकीले बताए । उनका अनुसार तीव्र गतिमा गुडेको रात्रीबसले सोही दिशातर्फ गुडिरहेको ट्याक्टरलाई ठक्कर दिएको थियो ।

निर्माणाधीन मध्यपहाडी सडकको कामका लागि २४ जना मजदुर लिएर ट्याक्टर दोबिल्ला आउँदै गरेको थियो । प्रहरीका अनुसार गम्भीर घाइते पाँच जना मजदुरलाई उपचारका लागि पोखरा पठाइएको छ । अन्य १८ जनाको पर्वत अस्पतालमा उपचार भइरहेको प्रनाउ बुढाथोकीले कान्तिपुरलाई बताए ।

बस तीव्र गतिमा रहेकोले सोही दिशामा रहेको ट्याक्टरलाई पछाडिबाट ठक्कर दिएको हुन सक्ने देखिएको प्रहरीको प्रारम्भिक अनुसन्धानले देखाएको छ । ठक्कर दिने बस र चालकलाई प्रहरीले नियन्त्रणमा लिएको छ ।


प्रकाशित : मंसिर १८, २०७८ ०८:१७
पूरा पढ्नुहोस्
प्रतिक्रिया
पठाउनुहोस्
×