सातदोबाटोको ‘फ्लाइङ स्टार्ट’- खेलकुद - कान्तिपुर समाचार
कान्तिपुर वेबसाईट
AdvertisementAdvertisement
‘ए’ डिभिजन लिग

सातदोबाटोको ‘फ्लाइङ स्टार्ट’

थ्री स्टार १–१ फ्रेन्ड्स
सातदोबाटो ४–१ एपीएफ
हिमेश

काठमाडौँ — सातदोबाटो युवा क्लबले सपना देख्दा केही फरक पर्ने छैन । फुटबलमा सपना देख्ने बहादुरले नै हो । मनाङ मर्स्याङ्दीले वर्ष ०४२ मा सहिद स्मारक लिगको ‘बी’ डिभिजन जितेर लगत्तै ०४३ मा ‘ए’ डिभिजन पनि जितेको थियो । त्यतिबेला मनाङले ‘बी’ डिभिजनमा एउटै पनि खेल गुमाएको थिएन । सातदोबाटोले पनि ‘बी’ डिभिजन जित्दा कुनै पनि खेल गुमाएन ।

के अब सातदोबाटोले यस्तै उपलब्धि हात पार्न सक्छ त ? लिगमा अझै धेरै खेल बाँकी छ र कसैलाई हतार गर्न आवश्यक छैन ।

कम्तीमा अहिले तत्काल भन्न सक्छौं, सातदोबाटोले स्वप्निल सुरुआत भने लिएको छ । खेलभाषामा भन्दा ‘फ्लाइङ स्टार्ट’ । प्रशिक्षक मेघराज केसीको नेतृत्वमा खेलिरहेको सातदोबाटोको शुक्रबारको जितमा नायक रहे नाइजेरियाली खेलाडी अजयी मार्टिन्स । उनले यस लिगमा पहिलो ह्याट्रिक गरे । अजयीले ४३ औं मिनेटमा पहिलो गोल गरे अनि पहिलो हाफ इन्ज्युरी समयको पाँचौं मिनेटमा दोस्रो गोल थपे । उनको ह्याट्रिक ५८ औं मिनेटमा पूरा भयो ।

सातदोबाटोको अर्को गोल सुशील राईको नाममा रह्यो । उनले ५० औं मिनेटमा गोल गरेका थिए । एपीएफको तर्फबाट सम्भव एकमात्र गोल आत्मघाती रह्यो । खेलको ४९ औं मिनेटमा भएको त्यो गोल करण राउतको नाममा थियो । यो पनि यस लिगको पहिलो आत्मघाती गोल रह्यो । थ्रीस्टार क्लबबाट प्रशिक्षक केसीसँगै सातदोबाटो आएका अजयीले आफ्नो तीन गोलको उपलब्धिमा खुसी व्यक्त गरे । सुरुमा उनले आफ्ना प्रशिक्षक केसीलाई धन्यवाद दिए र पछि आफ्नो उत्कृष्ट प्रदर्शनका लागि कडा मिहिनेत गरेको सुनाए ।

सायद प्रशिक्षक केसी पनि उत्साही छन् । उनले भनेका छन्, ‘अबका १० खेलमा पनि हामीले जित्नका लागि खेल्नेछौं ।’

शुक्रबार खेलको नतिजापछि यी दुई टिमले दुई फरक दिशा लिएका छन् । जहाँ सातदोबाटो ३ खेलबाट ७ अंकसहित शीर्षस्थानमा उक्लेको छ । त्यहीं एपीएफ तीनै खेलमा अंकविहीन रहेर पुछारमा झरेको छ । लिगमा एपीएफको यो लगातार तेस्रो हार हो । यस्तोमा प्रश्न उठेको छ, के यसपल्ट एपीएफ रेलिगेसनमा पर्ने छ त ?

लिगमा तीन चरणका खेल सकिँदा मात्र एपीएफको भविष्यबारे कल्पना गर्नु हतार हुनेछ । तर, स्पष्ट संकेत मिल्न थालेको छ, एपीएफले फेरि एकपल्ट संघर्ष गर्नुपर्नेछ । वर्ष ०७६ को लिगमा पनि एपीएफको प्रदर्शन कमजोर रहेको थियो । ९ अंकसहित १४ टिममध्ये १२ औं स्थानमा रहेको थियो । त्यस लिगमा एपीएफ ८ खेलमा पराजित रहेको थियो । त्यो लिगका सुरुआती तीन खेलमा एक अंक बटुलेको एपीएफले यसपल्ट त्योभन्दा खराब सुरुआत लिएको छ ।

वर्ष ०६८ को लिगयता एपीएफको यो अहिलेसम्मकै सबैभन्दा खराब प्रदर्शन हो । त्यो लिगमा एपीएफ सुरुआती ५ खेलमा पराजित थियो । अहिलेको अवस्थालाई लिएर प्रशिक्षक कुमार थापा के भन्छन् त ? उनको प्रतिक्रिया छ, ‘लगातार तीन खेल हार्दा दबाब बढेको छ । हामीले तीन खेलबाट ९ अंक गुमाइसकेका छौं, लिगमा ९ अंक भनेको धेरै नै हो । हामीमाथि दबाब भनको रेलिगेसनबाट बच्ने नै हो र हामी बच्छौं पनि ।’

फ्रेन्ड्समाथि थ्रीस्टारको हाबी कमजोर हुँदै

ललितपुरका दुई क्लबबीचको पुरानो प्रतिद्वन्द्वितामा थ्रीस्टार लगभग सधैं फ्रेन्ड्समाथि हाबी रहेको छ । तर यो हाबी कमजोर हुँदै छ । गत सिजन फ्रेन्ड्सले ०४६ सालयता थ्रीस्टारलाई पहिलोपल्ट हराएको थियो । यसपल्ट बराबरीमा रोकेको छ । लिगको सुरुमा उपाधिको दाबेदार मानिएको थ्रीस्टारले तीन खेल खेलिसक्दा त्यो परिचय पनि गाढा हुन छाडेको संकेत मिलेको छ । त्यसैले होला थ्रीस्टारलाई फ्रेन्ड्सविरुद्ध बराबरी खेल्नु पनि उपलब्धि हुन थालेको छ ।

दशरथ रंगशालामा शुक्रबार भएको पहिलो खेलमा थ्रीस्टार एक गोलले पछाडि रहेको स्थितिबाट बराबरी नतिजा निकालेको हो । फ्रेन्ड्सले ५१ औं मिनेटमा नथानिल जुडे गार्सियाको गोलले अग्रता लिएको थियो । खेल सकिन सात मिनेटअगाडि मिक्चेन तामाङले बराबरी गोल फर्काए । यो खेलपछि थ्रीस्टारको ३ खेलबाट ४ अंक भएको छ । फ्रेन्ड्स भने अहिलेसम्म जितविहीन छ । दुई बराबरीपछि टोलीको २ अंक भएको छ । ललितपुरका दुई क्लबबीच ०४६ यता भएका खेलमा यो तेस्रो बराबरी हो ।

थ्रीस्टारलाई लिएर उल्लेखनीय पक्ष के छ भने अहिलेको टिमका अधिकांश सदस्यसँग कुनै न कुनै समय राष्ट्रिय टिमबाट खेलेको अनुभव पनि छ । नभएकाले पनि कुनै न कुनै समय उमेर समूहको राष्ट्रिय टिमबाट खेलेका छन् । के सायद टिमलाई प्रशिक्षक उर्जेन श्रेष्ठले ठीक नेतृत्व गर्न सकिरहेका छैनन् त ? यसको उत्तर दिन उनी आफैं त अगाडि आएनन् । तर उनका सहायक रवीन्द्र सिलाकारले माने, सायद प्रशिक्षकको टिममै समस्या छ कि ?


प्रकाशित : मंसिर १७, २०७८ २१:०४
प्रतिक्रिया
पठाउनुहोस्

भीमसेन मन्दिर पुनर्निर्माण अन्तिम चरणमा

कान्तिपुर संवाददाता

ललितपुर — ललितपुर उद्योग वाणिज्य संघको अगुवाईमा पुनर्निर्माण भइरहेको पाटन दरबारक्षेत्रस्थित भीमसेन मन्दिरको पुनर्निर्माण अन्तिम चरणमा पुगेको छ । मन्दिरमा सुनलेपन गरिएको गजुर हालिसकिएको छ ।

शनिबार ‘हाम्रो सम्पदा हामी आफै बनाऔ’ भन्ने नाराका साथ स्थानीय मिलेर मन्दिरको छानो झिंगटीले छाउँदै छन् । मन्दिर पुनर्निर्माण सरोकार समितिका संयोजक कृष्णलाल महर्जनले श्रमदान गर्न इच्छुक महानुभावहरुलाई आउन आग्रह गरे । ‘मन्दिर पुनर्निर्माण गर्न आवश्यक ४ करोड ९३ लाख रुपैयाँ स्थानीयको दान सहयोगबाट जुटिसकेको छ,’ उनले भने, ‘अब चाँडै नै काम समेर सर्वसाधारणका लागि खुला गरिनेछ ।’

२०७२ वैशाखको भूकम्पले क्षतिग्रस्त मन्दिरबारेमा युनेस्कोबाट आएका इटालियन विशेषज्ञको टोलीले अध्ययन गरेर तत्काल भत्काउन सुझाएको थियो । तर राज्यले चासो नदेखाएपछि २०७५ मा स्थानीय आफैं पुनर्निर्माणमा अग्रसर भएका थिए ।

प्रकाशित : मंसिर १७, २०७८ २०:५५
पूरा पढ्नुहोस्
प्रतिक्रिया
पठाउनुहोस्
×