सन्तोषको शतकमा प्रदेश २ को जित- खेलकुद - कान्तिपुर समाचार

सन्तोषको शतकमा प्रदेश २ को जित

कान्तिपुर संवाददाता

काठमाडौँ — सन्तोष कार्कीको शतकमा प्रदेश नम्बर २ ले वाइवाइ यू–१९ राष्ट्रिय क्रिकेट प्रतियोगितामा आइतबार वाग्मती प्रदेशलाई ६ विकेटले पराजित गरेको छ । तीन खेलमा दोस्रो जित हात पारेपछि प्रदेश २ तेस्रो स्थानमा उक्लिएको छ । 

सन्तोषले १ सय ११ रन बनाएपछि प्रदेश २ ले त्रिवि क्रिकेट मैदान कीर्तिपुरमा ४१ ओभरमा २ सय ५५ रन बनाउँदै विजय लक्ष्य पूरा गर्‍यो । सन्तोषले १ सय १५ बल खेली १४ चौका र ३ छक्का प्रहार गरे । उनले रोहन विकसँग पहिलो विकेटमा १३ ओभरमा ६४ रन जोडी प्रदेश २ लाई राम्रो सुरुआत दिलाए ।

रोहनले ६ चौका प्रहार गरी ३९ बलमा २६ रन बनाए । तृतराज दास १ र अमित यादव ७ रनमा आउट भए पनि कप्तान विवेक यादवले अविजित ८६ रन बनाउँदै प्रदेश २ लाई जित दिलाए । विवेकले ७३ बल खेली ६ चौका र ७ छक्का प्रहार गरे । सन्नी शाह ९ रनमा अविजित रहे । वाग्मतीका तिलक भण्डारीले २ तथा प्रतिश जीसी र प्रशान्त महतले १–१ विकेट लिए ।

यसअघि स्वप्निलसिंह अधिकारी र विपिन शाहीको अर्धशतकमा टस हारेर ब्याटिङमा आएको वाग्मती ४९.३ ओभरमा २ सय ५३ रनमा अलआउट भएको थियो । दोस्रो अन्तिम ओभरमा आउट हुनुअघि स्वप्निलले ८३ बल खेली ६ चौका र ५ छक्कासहित ८५ रन बनाए । ओपनर विपिनले पनि ८३ बल खेली ६ चौका र १ छक्का प्रहार गरे । फरिद खान र विवेक मगर समान ११, प्रशान्त महत ६, प्रतीक श्रेष्ठ १५, प्रतिश जीसी ९, गौतम केसी ८ रनमा आउट भए । प्रदेश २ का पुरज ढुंगेलले १० ओभरमा १ मेडन राख्दै ३३ रन खर्चेर ३ तथा विवेक, गुलशन झा, अजय यादव र प्रदीप पासवानले समान १–१ विकेट लिए ।

सुदूरपश्चिमको पहिलो जित

सुदूरपश्चिमले पहिलो जित हात पारेको छ । मूलपानीमा भएको खेलमा सुदूरपश्चिमले कर्णालीलाई १० विकेटले पराजित गर्‍यो । पहिला ब्याटिङमा निम्त्याइएको कर्णाली १६.५ ओभरमा ६६ रनमै अलआउट भयो । प्रकाश जैसी १५, रमेश बुढा १२ र रूपक दाहाल ११ बाहेक अन्यले दोहोरो स्कोर बनाउन सकेनन् । सुदूरपश्चिमका आकाश चन्द, नारायण जोशी र शेर मल्लले ३–३ विकेट लिए ।

खडक बोहराले ४२ बलमा ४१ र नरेश भट्टले ३१ बलमा १६ रन बनाएपछि सुदूरपश्चिमले १२.१ ओभरमा लक्ष्य पूरा गर्‍यो । खडकले ५ चौका र २ छक्का तथा नरेशले ३ चौका प्रहार गरे ।

वाग्मती, सुदूरपश्चिम, कर्णाली र गण्डकीको १–१ जित रहेको छ । वाग्मती र कर्णालीले ४–४ तथा सुदूरपश्चिम र गण्डकीले ३–३ खेल खेलेका छन् । प्रदेश १ र लुम्बिनी प्रदेश ६–६ अंकका साथ पहिलो दुई स्थानमा छन् ।


प्रकाशित : मंसिर १३, २०७८ ०८:००
प्रतिक्रिया
पठाउनुहोस्

भारतद्वारा न्युजिल्यान्डलाई कठिन लक्ष्य

एएफपी

कानपुर — भारतले न्युजिल्यान्डसामु पहिलो टेस्टको चौथो दिन आइतबार जितका लागि २ सय ८४ रनको लक्ष्य दिएको छ । भारतीय पुछारका ब्याट्सम्यानले बलियो प्रदर्शन गरेपछि घरेलु टिम चुनौतीपूर्ण लक्ष्य तयार पार्न सफल भएको थियो । यसअघि न्युजिल्यान्डले भारतको माथिल्लो क्रमलाई सस्तोमा समेटेको थियो । रविचन्द्रन आश्विनले दोस्रो अन्तिम ओभरमा विल योङको विकेट लिए र उनले खालि दुई रन मात्र बनाउन सके ।

तर उनले आफ्नो विकेट गुमाएको स्थिति भने दुर्भाग्यपूर्ण रह्यो । न्युजिल्यान्डको पहिलो इनिङ्समा ८९ रन बनाएका योङले समयमै रिभ्यु लिन सकेनन् । अन्यथा आश्विनको बलले स्टम्प छुने थिएन । अब अन्तिम दिनको खेलमा टम लथानले दुई रनबाट अगाडि खेल्नेछन् र टिम एक विकेट गुमाएर चार रनको स्थितिमा छ ।

उनलाई साथ दिइरहेका स्पिनर विलियम समरभेलले खाता खोलेका छैनन् । भारतको पहिलो इनिङ्समा ‘डेब्यु’ शतक बनाएका श्रेयस ऐरले दोस्रो इनिङ्समा पनि अर्धशतक बनाए । उनले आश्विन र रिद्धिमान साहसँग दुई महत्त्वपूर्ण साझेदारी गरे । श्रेयसले ६५ रन बनाए । रिद्धिमन भने ६१ रनमा अविजित रहे र भारतले चिया सत्रपछि सात विकेट गुमाएर २ सय ३४ रनमा आफ्नो दोस्रो इनिङ्स समाप्तिको घोषणा गर्‍यो । भारतले दिनको सुरुआत एक विकेट गुमाएर १४ रनको स्थितिमा गरेको थियो र त्यति बेला घरेलु टिमलाई ६३ रनको अग्रता प्राप्त थियो । अक्षर पटेलले पाँच विकेट लिएपछि न्युजिल्यान्ड शनिबारको खेलमा २ सय ९६ रन बनाएर अलआउट भएको थियो ।

तर न्युजिल्यान्डका केली जेमिसन र टिम साउथीले घातक बलिङ गर्दै खेल आफ्नो पक्षमा मोडे । त्यस स्थितिमा भारत पाँच विकेट गुमाएर ५१ रनको स्थितिमा पुगेको थियो । श्रेयसले आश्विनसँग ५२ रनको साझेदारी गर्दै टिमलाई संकटबाट मुक्त गरे । आश्विन जेमिसनको बलमा ३२ रन बनाएर आउट भए । जेमिसनले चेतेश्वर पुजारालाई २२ रनमा आउट गर्दै भारतको माथिल्लो विकेटको पतन सुरु गरेका थिए । भारतले ४१ रन बनाउँदासम्म निमित्त कप्तान अजिन्के रहानेलाई पनि गुमाएको थियो ।

त्यसपछि साउथीको विकेट लिने पालो थियो र उनले आफ्नो मेडन ओभरमा दुई विकेट लिए । अनुभवी बलरले मयन्क अग्रवाललाई १७ बलमा आउट पारे । उनी दोस्रो स्लिपमा टम लथानबाट समातिए । लगत्तै उनले अलराउन्डर रविचन्द्र जडेजालाई शून्यमा आउट पारे र भारत खराब स्थितिमा पुगेको थियो । चिया सत्रसम्म पुग्दा सम्हालिएको भारत सात विकेट गुमाएर १ सय ६७ रनमा पुगेको थियो । श्रेयस आफैं पनि साउथीको सिकार बने ।


प्रकाशित : मंसिर १३, २०७८ ०७:५७
पूरा पढ्नुहोस्
प्रतिक्रिया
पठाउनुहोस्
×