भारतद्वारा न्युजिल्यान्डलाई कठिन लक्ष्य- खेलकुद - कान्तिपुर समाचार

भारतद्वारा न्युजिल्यान्डलाई कठिन लक्ष्य

एएफपी

कानपुर — भारतले न्युजिल्यान्डसामु पहिलो टेस्टको चौथो दिन आइतबार जितका लागि २ सय ८४ रनको लक्ष्य दिएको छ । भारतीय पुछारका ब्याट्सम्यानले बलियो प्रदर्शन गरेपछि घरेलु टिम चुनौतीपूर्ण लक्ष्य तयार पार्न सफल भएको थियो । यसअघि न्युजिल्यान्डले भारतको माथिल्लो क्रमलाई सस्तोमा समेटेको थियो । रविचन्द्रन आश्विनले दोस्रो अन्तिम ओभरमा विल योङको विकेट लिए र उनले खालि दुई रन मात्र बनाउन सके ।

तर उनले आफ्नो विकेट गुमाएको स्थिति भने दुर्भाग्यपूर्ण रह्यो । न्युजिल्यान्डको पहिलो इनिङ्समा ८९ रन बनाएका योङले समयमै रिभ्यु लिन सकेनन् । अन्यथा आश्विनको बलले स्टम्प छुने थिएन । अब अन्तिम दिनको खेलमा टम लथानले दुई रनबाट अगाडि खेल्नेछन् र टिम एक विकेट गुमाएर चार रनको स्थितिमा छ ।

उनलाई साथ दिइरहेका स्पिनर विलियम समरभेलले खाता खोलेका छैनन् । भारतको पहिलो इनिङ्समा ‘डेब्यु’ शतक बनाएका श्रेयस ऐरले दोस्रो इनिङ्समा पनि अर्धशतक बनाए । उनले आश्विन र रिद्धिमान साहसँग दुई महत्त्वपूर्ण साझेदारी गरे । श्रेयसले ६५ रन बनाए । रिद्धिमन भने ६१ रनमा अविजित रहे र भारतले चिया सत्रपछि सात विकेट गुमाएर २ सय ३४ रनमा आफ्नो दोस्रो इनिङ्स समाप्तिको घोषणा गर्‍यो । भारतले दिनको सुरुआत एक विकेट गुमाएर १४ रनको स्थितिमा गरेको थियो र त्यति बेला घरेलु टिमलाई ६३ रनको अग्रता प्राप्त थियो । अक्षर पटेलले पाँच विकेट लिएपछि न्युजिल्यान्ड शनिबारको खेलमा २ सय ९६ रन बनाएर अलआउट भएको थियो ।

तर न्युजिल्यान्डका केली जेमिसन र टिम साउथीले घातक बलिङ गर्दै खेल आफ्नो पक्षमा मोडे । त्यस स्थितिमा भारत पाँच विकेट गुमाएर ५१ रनको स्थितिमा पुगेको थियो । श्रेयसले आश्विनसँग ५२ रनको साझेदारी गर्दै टिमलाई संकटबाट मुक्त गरे । आश्विन जेमिसनको बलमा ३२ रन बनाएर आउट भए । जेमिसनले चेतेश्वर पुजारालाई २२ रनमा आउट गर्दै भारतको माथिल्लो विकेटको पतन सुरु गरेका थिए । भारतले ४१ रन बनाउँदासम्म निमित्त कप्तान अजिन्के रहानेलाई पनि गुमाएको थियो ।

त्यसपछि साउथीको विकेट लिने पालो थियो र उनले आफ्नो मेडन ओभरमा दुई विकेट लिए । अनुभवी बलरले मयन्क अग्रवाललाई १७ बलमा आउट पारे । उनी दोस्रो स्लिपमा टम लथानबाट समातिए । लगत्तै उनले अलराउन्डर रविचन्द्र जडेजालाई शून्यमा आउट पारे र भारत खराब स्थितिमा पुगेको थियो । चिया सत्रसम्म पुग्दा सम्हालिएको भारत सात विकेट गुमाएर १ सय ६७ रनमा पुगेको थियो । श्रेयस आफैं पनि साउथीको सिकार बने ।


प्रकाशित : मंसिर १३, २०७८ ०७:५७
प्रतिक्रिया
पठाउनुहोस्

नेपाल फेरि असफल

विश्वकपको ग्लोबल छनोटमा पुग्न जित्नैपर्ने खेलमा नेपालले यूएईलाई नतिजा सुम्पियो
कान्तिपुर संवाददाता

काठमाडौँ — नेपालले ट्वान्टी–२० महिला विश्वकप एसिया छनोट प्रतियोगिता जित्ने मौका गुमाएको छ । दुबईमा भइरहेको प्रतियोगिताको राउन्ड रोबिन लिगको अन्तिम खेलमा नेपाललाई आइतबार घरेलु टोली यूएईले ४८ रनले पराजित गर्‍यो ।

ग्लोबल छनोटमा पुग्न जित्नैपर्ने खेलमा नेपालले निकै कमजोर प्रदर्शन गर्‍यो । नेपालले टस जितेपछि ब्याटिङको निम्तो पाएको यूएईले निर्धारित २० ओभर खेल्दै ५ विकेट गुमाई १ सय २७ रन बनायो । छनोट हुन नेपालले यो खेल १८.४ ओभरमा जित्नुपर्ने थियो । तर आईसीसी एकेडेमी मैदानमा नेपाल १९.४ ओभरमा ७९ रनमा अलआउट भयो ।

यूएई सबै ५ खेल जितेर विजेता बनी २०२२ मा हुने ग्लोबल छनोटमा पुगेको छ । नेपालले अन्तिम खेलमा यूएईलाई पराजित गर्न सकेको भए विजेता बन्ने थियो । तर हारले नेपाल अंक तालिकाको तेस्रो स्थानमा झरेको छ । कुवेतलाई आफ्नो अन्तिम खेलमा ३५ रनले पराजित गरेको हङकङ दोस्रो स्थानमा उक्लेको छ ।

अपराजित रहेको यूएईले १० अंक बटुल्यो । हङकङ ८, नेपाल ६, मलेसिया ४ र भुटान २ अंकसहित दोस्रोदेखि पाँचौं स्थानमा रहे । कुवेतले सबै ५ खेलमा पराजय भोग्यो । पहिलो खेलमा हङकङसँग पराजित नेपालले त्यसपछि भुटान, कुवेत र मलेसियालाई हराएर उपाधि दौडमा यूएईसँग उभिएको थियो । प्रतियोगितामा नेपाल आईसी महिला ट्वान्टी–२० को हिसाबमा उच्च वरीयताको टिम थियो ।

पहिलो ओभरमा कविता कुँवरले इशा ओजालाई ४ रनमा बोल्ड गरे पनि नेपालका लागि त्यो खुसी लामो समय रहेन । थिर्थ सतिश र कभिसा इगोडजेले दोस्रो विकेटमा ५८ रनको साझेदारी गरे । इगोडजेले २७ बलमा १ चौकासहित २२ र सतिशले ४६ बल खेली ३ चौका प्रहार गर्दै ४७

रन बनाए । चमानी सेनेभिरत्नाले ३६ बलमा ७ चौका प्रहार गर्दै ५२ रन बनाई यूएईलाई मजबुत स्थितिमा पुर्‍याइन् ।

सेनेभिरत्नालाई अन्तिम ओभरमा कविताले बोल्ड गरिन् । दुई विकेट लिनेक्रममा कविताले ४ ओभरमा २१ रन खर्चिइन् । सबनम राई, सीता रानामगर र संगीता राईले १–१ विकेट लिए ।

नेपालबाट ओपनरद्वय सीता र इन्दु बर्माले क्रमशः १३ र १५ रन बनाए । यी दुईबाहेक अन्यले दोहोरो स्कोर बनाउन सकेनन् । सीताले ३ र इन्दुले १ चौका प्रहार गरिन् । त्यो बाहेक नेपाली खेलाडीले प्रहार गरेको एक चौका काजोल श्रेष्ठको नाममा थियो । कविता ४, कप्तान रुबिना क्षेत्री २, सरिता मगर र काजल समान ८, अप्सरी बेगम ४, कविता जोशी १, करुणा भण्डारी र सबनम २–२ रनमा आउट भए । संगीता ३ रनमा अविजित रहिन् ।

प्रकाशित : मंसिर १३, २०७८ ०७:५५
पूरा पढ्नुहोस्
प्रतिक्रिया
पठाउनुहोस्
×